Väle foaren nich mea no de Kjoakj, wiels dee doa em jeisteljen motten hungrich bliewen un nich Moot toojesproaken woat. Waut es bie Jehova siene Zeijen äare Toopkomes dan aundasch? Woo es daut doa krakjt?

Doa sent Menschen, waut Leew haben un unjarenaunda om sikj bekjemmat sent. Bie de ieeschte Christen wia daut soo enjerecht, daut dee aus Vesaumlungen (ooda aundasch jesajcht en Gruppen) toopkjeemen, om Gott auntobäden, de Schreft to studieren un om sikj unjarenaunda Moot tootospräakjen (Hebräa 10:24-25). Wan dee met äare Gloowesbreeda toop wieren, kunnen dee werkjlich feelen, daut see mank woare Frind wieren (2. Tessalonicha 1:3; 3. Johanes 14-15). Wie nämen ons dee toom Väabilt un kjennen deeselwje Freid haben.

Doa lieet eena, woo eena no de Schreft läwen kaun. En de Bibeltiet kjeemen de Mana, de Frues un de Kjinja no de Toopkomes, un krakjt soo es daut bie ons vondoag uk. Daut jeft doa Mana, waut emstaunt sent to lieren un ons to halpen, jieda Dach no de Schreft to läwen (5. Mose 31:12; Nehemia 8:8). Aule kjennen bie de Toopkomes metmoaken un bie de Leeda metsinjen, un soo kjennen aule toop äare christelje Hopninj wiesen (Hebräa 10:23).

Doa kaun eena sienen Gloowen stoakjen. De Apostel Paulus schreef de Vesaumlunk en Room: “Ekj hab een velangen, junt to seenen, . . . daut ekj met junt toop mucht mootja woaren, wan ekj mank junt sie, beides, ekj derch junen Gloowen un jie derch mienen” (Reema 1:11-12). Wan wie eendrajchtich met onse Breeda un Sestren toop sent, dan woat ons Gloowen stoakja un wie woaren ons noch dolla aunstrenjen soo to läwen, aus sikj daut fa eenen Christ jehieet.

Wuarom kjemst nich mol no eent von onse Toopkomes, om selfst to seenen, woo daut doa es? Du best sea welkom. Eena brukt nuscht betolen un doa woat uk nich Jelt jekollakjt.

• Wan wie onse Toopkomes haben, no waut fa een Väabilt recht wie ons dan?

• Woo kjennen de christelje Toopkomes ons togood komen?