Forscha sajen, daut de Hunj daut rikjen kjennen, woo oolt een aundra Hunt es ooda aus daut een Hee ooda eene See es un woo dee jesonnen es. Hunj jeit uk soo entolieren, daut dee Bommen ooda Droggs rikjen kjennen. Wan wie Menschen mieeschtens uk onse Uagen brucken toom kjikjen, waut rom ons aunjeit, brucken de Hunj oba äare Näs toom aules rom an entspakjten.

Denkj mol aun dit: Een Hunt kaun dusende Mol bäta rikjen aus wie. No de U.S. National Institute of Standards and Technology no kaun een Hunt “sea kjliene Poats von eene Sach rikjen. Dee wudd daut biejlikj kjennen rikjen, wan een Vieedel Teeläpel Zocka en een sea grootet Bodloch nenjeschett wia.”

Wuahäa kaun een Hunt soo väl schneiwa rikjen aus een Mensch?

• Eenen Hunt siene Näs es naut un doawäajen kaun dee jieda kjlienet Bietskje sea fein rikjen.

• Een Hunt haft twee Loftlienjes en siene Näs: eene toom odmen un eene toom rikjen. Wan een Hunt schneffelt, dan kjemt de Loft en daut Poat von de Näs nenn, met waut dee rikjen kaun.

• Daut Poat von eenen Hunt siene Näs, met waut dee rikjen deit, kaun 130 Zentimeeta (20 Zoll) em Veakaunt sennen ooda mea. Oba bie Menschen es daut mau 5 Zentimeeta (0,8 Zoll) em Veakaunt.

• Een Hunt kaun bat 50 Mol mea Zellen haben toom rikjen aus wie Menschen.

Wäajen aul dit kaun een Hunt de veschiedne Poats, waut en een Jeroch bennen sent, jieda oppoat rikjen. Biejlikj, wan doa eene Supp es, dan kjenn wie dee rikjen, oba een Hunt kaun jieda Sach oppoat rikjen, waut en dee Supp bennen es, no eenje Forscha no.

Forscha bie de Pine Street Foundation, waut Kjräft utforschen, sajen, daut de Hunj äa Vestaunt un dee äare Näs soo toopschaufen, daut dee “eent von de schneifste Sachen oppe Welt es toom Jeroch erkjanen”. Wissenschoftla wellen eene ellektroonische “Näs” moaken toom Bommen finjen ooda wan doa wäa waut schmuggelt ooda uk toom Krankheiten finjen, mau rajcht Kjräft.

Waut jleefst du? Kjeem daut von veselfst, daut de Hunj soo schneiw rikjen kjennen? Ooda wort daut jemoakt?