Een Fon es soo aus een schoapet Massa; daut kaun eenem sea behelplich sennen un oba uk sea schoden – doano, woo eena doamet omjeit. Woo kjenn jie june Kjinja lieren, äa Fon rajcht to brucken? Woo väl Tiet aum Fon es biejlikj too väl? a

•  Waut jie weeten sellen

•  Waut jie doonen kjennen

•  “Leeftolje Elren stalen Räajlen opp”

•   Een Fon brinjt Jefoaren met sikj. Soo aus de Artikjel “Kjinja un Fons – Poat 1: Wudden onse Kjinja sellen een Fon haben?” säd, kaun een Kjint met een Fon em Internet aules seenen, waut daut doa jeft – daut goode uk daut schlajchte.

   Brenda sajcht: “Eena kaun leicht doavon vejäten, daut een Fon daut Kjint enne Jefoa brinjt, sikj met orrajchte Ieeden ooda schlajchte Menschen auftojäwen.”

•   Kjinja brucken Help. De junge Menschen haben aul äa gaunzet Läwen daut ellektroonische Jereetschoft jebrukt, oba väle, waut aul ella sent, haben noch mol jroz doamet aunjefongen. Oba daut bediet nich, daut de Elren sikj verheipts nich met daut ellektroonische Jereetschoft vestonen, ooda daut de Kjinja entscheiden kjennen, woo un wanea dee äa Fon brucken kjennen.

   Daut stemt, june Kjinja es daut leichta met een Fon omtogonen, oba doamet es nich jesajcht, daut dee weeten, woo see daut rajcht brucken kjennen. Mau rajcht soone Kjinja, waut sikj sea fein doamet vestonen, fält daut aun de Elren äare Help, daut see daut Fon weis brucken kjennen.

   Seth sajcht: “Wan du dien Kjint een Fon jefst, un dän ea nich jelieet hast, woo dee daut rajcht brucken kaun, es daut soo, aus wurscht du dien Kjint dän Koa-Schlätel jäwen, ea du dän hast lieet foaren, un dän dan latst aum Stia setten un dan de Koa aundreist un sajchst: ‘Foa väasechtich.’”

•   Lieet, waut daut Fon von june Kjinja aules kaun. Unjastot junt de Programs opp daut Fon, waut june Kjinja halpen kjennen, daut Fon veninftich to brucken. Biejlikj:

   Hab jie daut jewist, daut eena daut bie eenje Fons enstalen kaun, woo väl Tiet de Kjinja daut brucken kjennen, un uk daut dee dan nich opp aule Internet-Sieden noppgonen kjennen?

   Daut schauft nich emma, wan jie daut Fon uk soo enjestalt haben, daut de Kjinja nich opp jewesse Internet-Sieden nopp kjennen

   Je bäta jie june Kjinja äa Fon kjanen, je bäta kjenn jie dee halpen, daut rajcht to brucken.

   Waut de Schreft sajcht: “Een vestendja Maun weet woo noch stoakja to woaren” (Spricha 24:5, PB).

•   Stalt Räajlen opp. Siet junt eenich, waut jie tooloten un waut nich. Biejlikj:

   Woa jie june Kjinja loten, äa Fon met nom Owentkostdesch nämen ooda wan jie no de Famielje ooda Frind foaren spazieren?

   Kjennen june Kjinja äa Fon met no äare Stow nämen, wan dee schlopen gonen?

   Waut fa Programs kjennen dee brucken?

   Woo väl Tiet aum Fon es too väl?

   Woa jie eene Tiet bestemmen, woo lang dee daut Fon jieda Dach brucken kjennen?

   Lot june Kjinja de Räajlen weeten, waut jie oppjestalt haben, un siet uk reed, june Kjinja trajchttowiesen, wan dee sikj nich aun de Räajlen hoolen.

   Waut de Schreft sajcht: “Wäa die nich een Kjint to belieren” (Spricha 23:13, PB).

•   Unjasieekjt daut Fon. Jie motten om daut Jeheemwuat von june Kjinja äa Fon omweeten. Soo kjenn jie doa emma wada Mol nennkjikjen un seenen, waut doa fa Norechten, Bilda un Programs bowen sent, un uk opp woone Internet-Sieden dee noppgonen.

   Lorraine sajcht: “Wie säden onse Dochta, daut wie emma wada Mol wudden en äa Fon nennkjikjen, onen ar verhäa weeten to loten. Wan wie wudden enwoaren, daut see äa Fon nich rajcht jebrukt haud, dan wudd see äa Fon weinja brucken kjennen.”

   Aus Elren hab jie daut Rajcht to weeten, woo june Kjinja äare Fons brucken.

   Waut de Schreft sajcht: “Een Kjint wiest met daut, waut hee deit, auf hee goot un opprechtich es” (Spricha 20:11, PB).

•   Lieet june Kjinja daut rajchte. Halpt june Kjinja bat doa to komen, daut dee daut rajchte doonen wellen. Wuarom es daut wichtich? Wiels, wan de Kjinja waut opp äa Fon fa de Elren plietsch hoolen wellen, dan woaren dee daut uk opp irjenteene Wajch kjennen, endoont, waut de Elren doonen. b

   Doawäajen, lieet june Kjinja opprechtich to sennen, sikj to beharschen un de Veauntwuatunk opp sikj to nämen, fa daut, waut dee doonen. Een Kjint, waut daut jelieet haft, daut rajchte to doonen, woat sea woomäajlich uk sien Fon rajcht brucken.

   Waut de Schreft sajcht: “Utjewosne Menschen . . . [haben] sikj doarenn jeeeft . . ., tweschen goot un schlajcht to unjascheeden” (Hebräa 5:14, PB).