Da voah Gott is da vann es alles gmacht hott. Eah voah immah gvest un zayld immah sei. (Psalm 90:2) Di goodi sacha es ma finna in di Bivvel kumma funn Gott. (1 Timotheus 1:11) Veil’s Gott uns layva gevva hott dann sedda miah yusht een deena.​—Lays Di Offenbarung 4:11.

Kenn mensha henn selayva Gott ksenna veil eah nett flaysh un bloot is vi miah. Eah is en mechtichah Geisht. (Johannes 1:18; 4:24) Bei di sacha es eah gmacht hott, kann ma sayna vass fa Gott es eah is. Ma kann sei leevi un veisheit sayna in vi eah awl di diffahndi sadda frucht un blumma gmacht hott. So grohs vi da himmel un di eaht sinn veist uns aw vi mechtich es eah is.​—Lays Römer 1:20.

Miah kenna noch may lanna veyyich Gott bei di Bivvel laysa. Fa’n example, es sawkt uns vass Gott gleicht un vass eah nett gleicht, vi eah leit yoost, un vass eah dutt diveyya vann leit goot adda shlecht doon.​—Lays Psalm 103:7-10.

Jesus hott ksawt: “Unsah Faddah im Himmel, loss dei nohma heilich sei.” (Matthäus 6:9) Gott is feel diffahndi veyya kaysa, avvah eah hott yusht ay nohma. In yaydah shprohch is’s diffahnd ksawt. In Pennsylvania Deitsh sawkt ma “Jehova.” Ma kann Gott sei nohma finna in’s mensht Bivla so vi di King James Version.​—Lays Psalm 83:18. *

Gott sei nohma voah aus feel diffahndi Bivla gnumma, in blatz funn sell voah HAH adda Gott nei gedu. Avvah sei nohma voah drinn ivvah 7,000 moll vann di Bivvel seahsht  kshrivva voah. Vo Jesus am di leit lanna voah veyyich Gott, hott eah si vissa glost vass Sei nohma is.​—Lays Johannes 17:26.

Vatsh da video Hott Gott en Nohma?

Es hott feel soffahres gans ivvah di veld. Avvah maynd sell es Jehova is en Gott es nix drumm gebt veyyich uns? Dayl leit sawwa es eah macht uns soffahra fa uns ausboviahra, avvah sell is nett voah.​—Lays Hiob 34:10.

Gott gebt uns’s recht fa unsah aykna choices macha veil eah feeld es miah’s veaht sinn. Miah sedda frohwa sei es miah’s recht henn fa tshoosa eb miah Gott deena vella adda nett. (Joshua 24:15) Avvah feel leit tshoosa fa veeshti sacha du zu anri un sell is favass’s so feel soffahres hott. Es dutt Jehova vay fa so feel sacha sayna es nett feah sinn.​—Lays 1 Mosi 6:5, 6.

Jehova is en Gott es ebbes drumm gebt veyyich uns. Eah vill havva es miah layva enjoya. Glei zayld eah soffahres vekk nemma un aw selli es em soffahra macha. Fa nau, hott Eah en goodah reesin fa soffahres ohgay lossa fa’n sirtendi leng zeit. Miah zayla lanna vass sellah reesin is in lesson 8.​—Lays 2 Petrus 2:9; 3:7, 13.

Jehova frohkt uns fa naychah kumma zu een bei shvetza zu een in gebayt. Eah gebt ebbes drumm veyyich yaydah vann funn uns. (Psalm 65:2; 145:18) Eah dutt geahn fagevva. Even vann miah uns alsamohl fafayla, eah saynd doch vann miah hatt boviahra een pleesa. Miah doon nett immah vass recht is, avvah miah kenna doch Gott sei friend sei.​—Lays Psalm 103:12-14; Jakobus 4:8.

Siddah’s Jehova uns layva gevva hott, sedda miah een may leeva es ennich ebbah shunsht. (Markus 12:30) Vann du dei leevi veisht fa Gott bei may lanna veyyich een un du vass eah frohkt, no zaylsht du feel naychah kumma zu een.​—Lays 1 Timotheus 2:4; 1 Johannes 5:3.