OMESODEL A SUOBEL ER A MEDAL TIA EL BABIER | NGSEBECHEM EL MO UNGIL EL MEDENGELII A BIBLIA

Ngera Me Ngkirem el Mo Medengelii a Biblia?

“A Biblia a kmal merael a chisel el babier. Engdi ngbabier er a ngodech el beluu me ngdiak a belkul er a rechad er a Sina.”​—LIN, SINA.

“Ngdiak kungil el medengei a omesodel aike el babier er a klechelid er ngak el Hindu, me ak mekerang e mo medengelii a Chedaol Biblia?”​—AMIT, INDIA.

“Ak medengei el kmo a Biblia a kmal chuodel el babier e dirrek el mla remenges el kmo ngkmal merael a chisel. Engdi ngdirkak a ta el kisa ngii el babier.”​—YUMIKO, SIABAL.

A rebetok el chad el meliuekl er a beluulechad a oba dmolech el omengull el kirel a Biblia. Engdi ngdiak a ungil el klemedengei er tir er a tekoi er a chelsel. Tiang a klemerang el kirir a rebetok el miliol el kiei er a Asia, engdi ngar er a chelsel a lmuut el betok el beluu el bla lerusii a Biblia, e a rechad me ngdirrek el diak lungil medengelii a Biblia.

Me nguaisei, engdi ke locha mo melatk el kmo, ‘Ngera me ngkmal kirek el mo ungil el medengelii a Biblia?’ E le ungil klemedengei er kau er tia el babier a sebechel el ngosukau el mo:

• Metik er a mera el deurreng

• Mo meduch el mesmechokl a mondai er a telungalek

• Outekangel a ringelel a uldasu

• Mo meduch el teloi er a rechad

• Mo meduch el ousbech a ududem

Ka molatk er a Yoshiko er a beluu er a Siabal. Ngmle rrau a rengul el kirel a Biblia me ngtilbir el mo menguiu er ngii. Me ngera mlo rsel? Ngdmu el kmo: “A Biblia a mla rullak el mo er ngii a belkul a klengar er ngak e dirrek el mla meskak a omelatk el kirel a ngar medak el klebesei.” A Amit el dulsaod er ngii er a uchei a dirrek el tilbir el mo merriter er a Biblia. E a uriul e ngdilu el kmo: “Ngkmal mlo mechas a renguk. Tia el Biblia a kmal betok a ungil el ulekrael er a chelsel el kirir a rokui el chad.”

Me a Biblia a kmal klou a bla lerellii er a klengar er a rebetok el miliol el chad. Ngdiak el soam el mo merriter er ngii me bo el sebechem el ngmai a klungiolem er ngii?

[Baks el ngar er a 3 el llel]

A lsoam a lmuut el omesodel a rolel e ke ngmai a klungiolem er a Biblia, e momes er a babier el A Satisfying Life​—How to Attain It, el mirruul er a Resioning er a Jehovah.