OMESODEL A SUOBEL ER A MEDAL TIA EL BABIER | A ULEBONGEL NGKMEDANG?

“A Ulebongel”​—Tia Ngera Belkul?

Ngmo ua ngera uldesuem sel mrengesii a chad el dmu el kmo, “a ulebongel a kmedang”? Ke melatk er a pastor el beldoel a Biblia e blak a rengul el mengelechel er a rechad er a ikelesia er ngii? Me a lechub e ke mo melatk er a chesechesomel el rubak el oubail a bek e dechor er a tkul a rael el oba sign el kmo, “a ulebongel a kmedang”? A rebebil a mo medakt sel lolatk aika el tekoi, e a rekuk bebil a diak loumerang me te ocherchur.

Nguaisei, a Biblia a mesaod el kirel “a ulebongel er a beluulchad.” (Mateus 24:​14) Ngdirrek el mesaod er ngii el kmo, ng “klou el Sils er a Dios” me a lechub e ng “Armakedon.” (Ocholt 16:​14, 16) Me alta ngklou a rraurreng el kirel a ulebongel, el uchul me a rebetok a medakt er ngii, engdi a Biblia a kmal bleketakl a omesodel el kirel tia el tekoi. A Tekingel a Dios a dirrek el ochotii el kmo ngolekedang a ulebongel me a lechub e ngdirkak. Me a lmuut el tang, ngouchais el kirel aike el kired el meruul me bo desobel! Me a kot, e bo domuchel el sumechokl a cheleuid el uldasu el kirel a ulebongel, e donger er a ker el kmo, ngerang mera el lolisechakl a Biblia el kirel a “ulebongel”?

 A ULEBONGEL A DIAK EL . . .

1. TAEM EL BO LEMESESEB EL NGUEMED A BELUULECHAD.

A Biblia a kmo: A Dios a “mla toketekii a beluulchad el mesisiich el ngar omekedecheraol er ngii, ng kmal diak bo le mengukl.” (Psalm 104:⁠5) Tiang me a lmuut el bebil er a bades a meketeklii el kmo a Dios a kmal diak bo lokngemedii a beluulechad me a lechub e lebechititerir a rechad me lokngemedii.​​​—Olisechakl 1:4; Isaia 45:⁠18.

2. LAK LULTEREKOKL A TEMEL.

A Biblia a ochotii el kmo a Dios a mla oterekeklii a blsechel el lemei a ulebongel. A bades a kmo: “Ng diak a medengelii sel sils ma lechub e ng sel sikang a le mei, ng ka le anghel er a eanged, ma lechub e ng Ngalek; ngdi tal Chedam a medengelii. Bo mekar e mkerekikl, ele ng diak modengelii a le mer ngii isel belsechel.” (Markus 13:​32, 33) Me ngbleketakl el kmo, a Dios el “Chedam” a mla oterekeklii a “belsechel” a ulebongel.

3. TAEM EL RECHAD A TOMELLII A BELUULECHAD ME A LECHUB E NGTAEM EL KLOU EL BAD A ME SUBECHII ER A CHUTEM.

Ngmekerang a lomuchel a ulebongel? A Ocholt 19:11 a kmo: “Ak milsa eanged el menga chesmerel, e ng me chemolt er ngii a becheleleu el uos. Ngikel mlar bebul a lomekedo er ngii el Blak a Rengul e Merang.” Me a Ocholt 19:19 a kmo: “E sola e ak milsa ngikel charm ma re king er a beluulchad ma re soldau er tir el cheldull el mo oumekemad er ngikel ngar a uos ma re soldau er ngii.” (Ocholt 19:​11-​21) Me alta ngbetok a okesiu er aika el bades, engdi ngbleketakl el kmo a Dios a mo oderchii a urrurt er a rechanghel el mo mekodeterir a recherrouel.

A ULEBONGEL A . . .

1. MO ULEBENGELEL AIKE EL KABELMENT ER A RECHAD.

A Biblia a kmo: “A Dios el ngar a eanged a mo toketekii a rengedel [me a lechub e ngkabelment] el mo  diak a ulebengelel. Misel renged a diak a sebechel el mo mesisiich er ngii, e ng bai mo okngemed a ikel bebil er a renged el rokui e sola e ngii a mo medechel el mo cherechar.” (Daniel 2:​44) Me ngdi uaike el dulsaod er a uchei, e a “re king er a beluulchad ma re soldau er tir” el mlo “cheldull el mo oumekemad er ngikel ngar a uos ma re soldau er ngii” a mo nguemed.​​​—Ocholt 19:⁠19.

2. MO ULEBENGELEL A ULDIKEL ME A MEKEMAD ME A CHELEBIRUKEL.

A Dios a mo “merrob a mekemad er a beluulchad el rokir.” (Psalm 46:⁠9) “A re melemalt e diak a telemellir el chad a mo kiei er a beluu el diak bo le cheroid er ngii. Ngdi Dios a mo melai er a re dengerenger el oltobed er tir er a beluu, e mengurs er a re mekngit el chad el oltobed er tir er ngii.” (Osisechakl 2:​21, 22) Ngmo “remuul a rokui el tekoi el mo beches!”​​​—Ocholt 21:​4, 5.

3. MO ULEBENGELEL A KLECHELID EL MENGEBLAD ER A RECHAD E DIAK LORUUL A SOAL A DIOS.

“A re profet a di melekoi a blulak, e a re prist a mengedereder el oltirakl a tekingir . . . Ngdi kom mo mekerang a le mei a ulebongel?” (Jeremia 5:​31) “Sel le me Sils er a Kerrekeriil, e te betok a mo dmu er ngak el kmo, ‘Rubak, Rubak! Aki uleba ngklem el mengedecheduch a tekingel a Dios, e uleba ngklem el oltobed a mekngit el chelid e meruul a mengasireng el tekoi!’ Isei e ak mo dmu er tir el kmo, ‘Ng kmal dimlak kudengelkemiu. Bo mcheroid er ngak, kemiu el mekngit el chad!’ ”​​​—Mateus 7:​21-​23.

4. MO ULEBENGELIR A RECHAD EL SORIR A BLEKERADEL ER A BELUULECHAD ER CHELECHANG.

A Jesus Kristus a dilu el kmo: “A kerrekeriil a ultuil er tial tekoi el kmo, a llomes a mla mei er a beluulchad, e ngdi re chad a kuk sorir a ilkolk er a llomes, ele ngii el mekngit omerellir.” (Johanes 3:​19) A Biblia a mesaod el kirel a telemellel a beluulechad er a taem er a Noah el kmo, ng “uleak a ralm, e elebii a dimla beluulchad er a irechar me ng metemall. Ngdi eanged ma chutem el ngar ngii er chelechang a kldmokl el oeak a osisiu el tekingel a Dios, e medechel el kirel el mo metemall er a ngau. Ng kldmokl el mengiil er sel sils el bo le mukerrekeriil er ngii e lobals el nguemed tirkel chad el diak lomekerreu er a Dios.”​​​—2 Petrus 3:​5-7.

Ka momtab el kmo, sel merael el mei el “sils el bo le mukerrekeriil” a beluulechad a lomekesiu er ngii el ua telemellel a “beluulchad” er a taem er a Noah. Ngera sel “beluulchad” el miltemall er a irechar? A chutem a dirk ngar er ngii, me a “beluulchad” a melutk er “tirkel chad el diak lomekerreu er a Dios” el mlad er a Ieleb. Me ngdi osisiu, ngar er a merael el mei el ‘sils er a kerrekeriil,’ e a recherrouel a Dios a lmuut el mo metemall. Engdi a resechelil a Dios a mo suobel, el di ua Noah me a telungalek er ngii el silobel er a irechar.​​​—Mateus 24:​37-​42.

Ka di molatk er a klungiolel a klengar er tia el chutem er a uriul er a lemokngemed a remekngit el chad! Ngbleketakl el kmo, a omesodel a Biblia el kirel a ulebongel a kmal ungil chais. Engdi ke locha melatk el kmo: ‘A Biblia ngochotii sel taem el lemei a ulebongel? Ngdi kmedung e ngmei? Ak mekerang e mo suobel?’

[Omesodel a siasing el ngar er a 5 el llel]

NGERA MO DUUBECH ER A URIUL?

Ngmo uangerang a klengar er a uriul er a ulebongel? Ngkmal mo ungil! Ngbetok el bades a mesaod el kirel tia el ungil klengar. El uai tiang: A Dios a “ ‘mo smuld a rokui el chiuosech er a mederir. Ng dikea lluut el mor ngii a kodall, e mo diak a klengiterreng, ma langel, ma ringel. A di mla tekoi a mla mo diak.’ E ngikel dengchokl er a kingall a dilu el kmo, ‘Chelechang e ak remuul a rokui el tekoi el mo beches!’ ” (Ocholt 21:​4, 5) A ulebongel a diak le belkul a kmo ngmo ulebengelel a klengar er kau. A Dios a soal a bo desobel me ngouchais er kid el kmo kede mekerang e mo suobel.