Hulda Rodemii a Turrekong er Ngii
ULEKUM ke mlora Sangir Besar, el kekerei el iungs er a Indonesia er a sesei el rak er a mla me mong, e ke ulterekokl el milsterir a retedei el odos er kid el ngar er a kederang. Tirka lodengelterir a rechad el kmo te blak a rengrir lomerk er a klumech el lolengeseu er a rechad el mo medengelii a Biblia. Engdi ngar tiakid el taem e te mirruul er a kuk ta er a bedengel a ureor.
Iungs er a Sangir Besar el ngar er a diluches er a Indonesia
A kot e te merael er a daob losiik a bad e olab el mora chelechol. A bebil er aika el bad a meklou el ua meklungel a bduu er a soccer. Ongingil, te mo dengchokl er a kekerei el kingall el rruul er a kerrekar e oba martiliong el merusech ngii el bad el mo mekekerei el ua meklungel a ngisel a malk. Uriul er tiang e te otuu aika el mekekerei el bad er a chelsel a blastik el baket e mengider lolengasech er a stairs el mora blirir. E mora blirir e otuu er a klou el tutuu e ngmai longasech er a torak el bo lousbech el meruul er a rael.
Hulda el meruu a bad er a kederang
A ta er tirka el odos a Hulda. Blekerdelel a klengar er ngii a uchul me ngmle sebechel el mengoit er a klou el taem er tirke el terung el meruul er tia el ureor. Nguluusbech a kerekerengel lomechar aike el lousbech a telungalek er ngii. Engdi tiakid el taem e ngmla er ngii a lmuut el ta er a tekoi el mlara uldesuel. Ngmle soal a tablet me bo lsebechel soiseb er a JW Library®. Ngmle medengei el kmo aike el video me a lmuut el bebil el mlara app a sebechel ngosuir er a berkel a klumech e menglou er a klemedengei er ngii er a Biblia.
A Hulda uluureor el eru el sikang er a bek el tutau el ta el buil me a tedobech, el merusech a bad el sebechel mekekii a btil a kekerei el pickup. Ngmlo sebechel chudelii a udoud e mecherar a tablet.
Hulda loba tablet er ngii
Ngmelekoi el kmo, “Alta ngkmal mlo mesaul e meringel a bedengek el merusech a bad, engdi ak di mle mereched lobes a rokui el ringelel er a bo lsebechek lousbech er tia el tablet el lolengeseu er ngak el lmuut el olengeriakl er a berkel a klumech, e rullii el mo beot ak prepare el kirel a miting.” Ngdirrek el melekoi el kmo tia el tablet a ngilsuir er a uchelel a pandemic, er a bo doruul a rokui el tekoi el loeak a video conferencing. Hulda kmal dmeu a rengul el riredemii a turrekong er ngii, me kid me ngdirrek el kmal dmeu a rengud el kirel.
