“A Chedam a mo meskemiu a ngii di le ngerang el molengit er ngii el oba ngklek.”​—Johanes 16:23.

A tekingel a Jesus a bleketakl lochotii el kmo a Jehovah a soal a doluluuch el mo er ngii loeak a ngklel a Jesus Kristus, el diak loeak a bleob, santo, rechanghel, me a lechub a rebladek. Sel doluluuch el mora Dios loeak a ngklel a Jesus, e kede ochotii el kmo kede mtebengii a klungel a ultutelel a deruchellel a Jesus. A Jesus a dilu el kmo: “Ng diak a chad el mor a Chedam, a lak lokiu ngak.”​—Johanes 14:6.

“Msbedii er a ikel ngar a rengum.”​—Psalm 62:8.

Sel doluluuch el mora Jehovah, e ngkired el mengedecheduch er ngii el ua dongedecheduch er a betik er a rengud el demad. Me ngdiak dousbech a nglunguuch el bla de memorize me a lechub e ngar er a buk er a nglunguuch, kede bai oba omengull el mengedecheduch er ngii el ngar er a rengud.

“Ng rongesid a dolengit a ngii di le ngerang er ngii el ultuil er a ikel tekoi el ungilbesul er a rengul.”​—1 Johanes 5:14.

Ngar er a Biblia, e a Dios a ouchais er kid aike el bo loruul el kired me aike el soal a doruul el kirel. Me a nglunguched a morenges a lsekum ng “ultuil er a ikel tekoi el ungilbesul er a rengul.” Me ngkired el mesuub er a Biblia me bo dungil medengelii e bo el sebeched el meruul uaisei. Seikid e a nglunguched a mo odeuir a rengul.

Moluluuch el Kirel Aike el Mousbech. Ngsebeched el meluluuch el olengit aike el dousbech er a bek el sils el ua kall, bail, me a blai. Ngdirrek el sebeched el meluluuch el olengit a llomeserreng el mo ungil melilt a tekoi me a klisiich el mo outekangel a ringel. Ngsebeched el meluluuch el olengit a klaumerang, klausubes, me a ngelsuil a Dios.​—Lukas 11:3, 4, 13; Jakobus 1:5, 17.

Moluluuch el Kirir a Rebebil. A rungil loungalek a dmeu a rengrir sel sekum a rengelekir a kaubltikerreng. A Jehovah me ngdirrek el kmal soal a rengelekel er tia el chutem a bo lekaukerreu. Me ngmelemalt el tekoi a doluluuch el kirel a bechid, rengeleked, telungalek er kid, me a resechelid. A disaiplo el Jakobus a milluches el kmo: “Mkaingeseu el meluluuch el kirel a ta ma tar kemiu.”​—Jakobus 5:16.

Moluluuch el Mereng a Saul. A Biblia a mesaod er Ngika el Milebid el kmo: “Ngmerruul a ungil tekoi e milskemiu a chull ra eanged ma blsechel a sim, e milskemiu a kall e omekeek a rengmiu ra deourreng.” (Rellir 14:17, BT) Sel dolatk aike el rokui el bla leruul a Dios el kired, e ngotbechid el mo meluluuch el mo er ngii el oureng a sulel. Me nguaisei, ngdirrek el kired el ochotii a omereng el saul er kid el mora Dios loeak a rolel a klengar er kid.​—Kolose 3:15.

A lebebil e ngkora mo mekngit a rengud e le kede kmal meluluuch el ngar er a rengud e diak lemereched el monger a nglunguched. Me tia ngbelkul a kmo a Dios a diak lomekerreu er kid? Ngkmal diak! Ka molatk aika el experience el ochotii a klungel a ultutelel a dolemolem el di meluluuch.

A Steve el dulsaod er ngii er a uchei a kongei el kmo: “A lemlak a nglunguuch e nglocha mlo diak a omeltkek el kirel a klengar.” Ngmilekera mengodech a uldesuel? Ngulemuchel el mesuub a Biblia e mlo medengelii a klungel a ultutelel a loluluuch e lolemolem el meruul er ngii. Ngmelekoi el kmo: “Ak meluluuch el mora Dios el mereng a sulel el kirel a bltikerreng el resechelik a ulechotii el mei er ngak. Ngkmal dmeu a renguk er a klengar er ngak er chelechang.”

E kuk mekerang a Jenny el ulemdasu el kmo ngdiak el rredemelel a morrenges er a Dios? Ngmelekoi el kmo: “Ngar sel kot el mekngit el taem er a klengar er ngak, e ak kmal ullengit er a Dios me lengesukak el mo medengelii a uchul me a kumdasu el kmo ngkmal diak a belkuk.” Tia ngmilekera ngosuir? Ngmelekoi el kmo: “Sel kungedecheduch er a Dios e ngngosukak el mo tabesul a uldesuek, me ngsebechek el mesa el kmo a Dios a diak lomals er ngak, alta renguk a meruul uaisei. Tia mla ngosukak me ngdiak meterob e di melemolem el melasem el mo ungil a uldesuek el kirek.” Me ngera mlo rsel? Ngmelekoi el kmo: “A nglunguuch a mla ngosukak el mo mesa el kmo ngmera el ngar ngii a Jehovah, e ngii a betik a rengul Dios el omekerreu er ngak e Demak e Sechelik el blechoel el olengeseu er ngak a lsekum ak melemolem el melasem el meruul a soal.”

Molatk el dirrek el kirel a experience er a Isabel. Sera bo el dioll, e a retoktang a dilu er ngii el kmo a ngelekel a mo mechell el chitechut. Ngkmal mlo mekngit a rengul. A rebebil er tir a dilu er ngii me lolecheb er a ngelekel. Ngdmu el kmo: “Ak mlo omdasu el kmo ngak a di mo mad er a ringelel a renguk.” Ngmilekerang? Ngmelekoi el kmo: “Ak di milluluuch el olengit a ngeso er a Dios.” Cherengel a taem e ngmilechelii a ngalek el sechal el Gerard el chitechut. A Isabel, ngomdasu el kmo a Dios a ulenger er a nglunguchel? Nguaisei! Ngoeak a ngera el rolel? Ngmelekoi el kmo: “Sel kumes er a ngelekek el mla mo 14 a rekil e kmal dmeu a rengul er a klengar er ngii alta ngchitechut e ak mo melechesuar el kmo ngkot el ungil nger er a nglunguchek, el kot el ngarbab el klengeltengat el bla lebeskak a Jehovah el Dios.”

A tekingir chouaitirka el chad a rullid el mo melatk a tekingel a ta er a milluches er a psalm el kmo: “RUBAK, kau a mo remenges a urungulir a re medemedemek el chad; ke mo smisiich a rengrir, e mo orrenges er tir.” (Psalm 10:17) Aika mera el lungil luchul me kede di melemolem el meluluuch!

Ngar er a Biblia e kede metik a betok el nglunguchel a Jesus. Sel kot el merael chisel a sel lulisechakl er a redisaiplo er ngii. Ngera sebeched el suub er ngii?