Ka molatk er tiang: A Julia sel lomes er ngii er a dirk, e ngmelatk el kmo ngkmal kedelebuu. Me ngomdasu el kmo: “Ngkmal kirek el mo mesengaked,” alta e a rechad er a blil me a resechelil a dmu er ngii el kmo “ngkmal mesengaked.”

Me a Julia a ulsiik a rolel e ngmo sebechel el lose a kesengil engdi “eim el bond.” Me a di ta el tekoi el sebechel el rullii a mo diak el lomengur el sesei el klebesei . . .

Omko ke ua uldesuel a Julia, e ke mo mekerang?

Ngkmal diak a kngtil sel dekerekikl el kirel a omengetmeklel a bedenged. A Biblia a mesaod a klebekelir a rebetok el redil me a resechal, el uldimukl er a Sara, me a Rahel, me a Abigail, me a Josef, me a dirrek el David. Ngdirrek el mesaod el kirel a redil el ngklel a Abisiag el kmo “ng kmal mle klebokel.”​—1 King 1:4.

Te betok el mekekerei el chad a kmal mo imis el bekikl er a rolel a omengetmeklel a bedengir, e tiang a sebechel el mo uchul a telemall. Mutebengii tiang:

• Ngokiu a ta el omesuub, e a 58 el basent er a rengeasek el redil a omdasu el kmo te mekedelebuu, alta engdi 17 el basent er tir a mekedelebuu.

• E a kuk ta er a omesuub, e ngochotii el kmo a 45 el basent er a redil el kmal mesengaked a omdasu el kmo te kmal oberaod!

• Ngokiu a mesisiich el uldesuir a rebebil el mekekerei el chad el sorir el mo mesengaked a uchul me te mlo smecher el anorexia el ngii a tekoi el sebechel el mo uchul a kodellel a chad e le ngdi ngii el olsengerenger er ngii.

 A lsekum e ke omdasu el kmo ke smecher er a anorexia me a lechub e ke di mekngit el omengur, e molengit a ngesou. Momuchel el ouchais er a rechad er a blim me a lechub e ngii di el klou el chad el moumerang er ngii. A Biblia a mesaod el kmo: “A sechelid a di blechoel el oubltikerreng, e a ta er kid el sechal a ngosukid er a chelebuul.”​—Osisechakl 17:17.

Ngklemera el tekoi el kmo a rengul a chad a rullii el mo olechaumad me a lechub e ngdiak. Ka molatk er a Absalom el ngelekel a King el David. A Biblia a mesaod el kmo:

“Ng dimlak a tal chad . . . el merael a chisel a klungiolel. . . . Ng dimlak a telemall er a bedengel.”​—2 Samuel 14:25.

Engdi ngika el kekerei el chad a mle kedidai a rengul, e soal a chetengakl e dirrek el mle cheblad! A Biblia a diak el lochotii a ungil el siasing er a Absalom; ngbai mesaod er ngii el kmo, ngkmal mle cheblad e durengul el osiik a rolel a kltui.

Tiaikid a uchul me a Biblia a meskid a ulekrael el kmo:

“Milemiu er a beches el klengar.”​—Kolose 3:9, 10.

“Lak momesiich a ikriu el menglebokel er kemiu . . . , A klebekeliu bai bo lecholt er sel meral kau el ngar a chelsem.”​—1 Petrus 3:3, 4.

Me alta e ngdiak el mekngit a donglebokel er kid, engdi a bai klou a ultutelel a sel mera el kid er a chelsed. A cherengel a taem, e a ungil el blekerdelem a ochau a osengir a rechad er a bai klisichel a bedengem me a lechub e ngklebekelem! A redil el ngklel a Phylicia a dilu el kmo: “A klebekeled a mereched el ochau a osengir a rechad, engdi sel mera el kau er a chelsem me a ungil el blekerdelem a kmal diak el lobes er ngii a rechad.”

Ke blechoel el diak el ungil a uldesuem el kirel a teletelem?

Ngmla ta el molatk el mo ngar er a mesisiich el diet me a lechub e ke mo er a cosmetic surgery el meruul er a teletelem?

Okmo e ngsebechem el ngodechii a teletelem, e ngera ke mo ngodechii? (Mngilt aike el soam.)

• KLEMENGETEM

• BERREDEM

• CHIUM

• TELETELEL A BEDENGEM

• MEDAM

• CHIRO ER A BEDENGEM

A lsekum a nger er kau a choi er aike el kot el teblo el ker, e dirrek el ngmilt a kldei me a lechub e nglmuut el betok er sel ongedei el ker, e molatk er tiang: Ngklou a techellir a rebebil el omes er kau el kuk ungil er sel osengem el kirem. Ngkmal beot er kau el mo bekikl er a omengetmeklem.​—1 Samuel 16:7.