E organisashon di Testigu di Yehova den tempu moderno a kuminsá na fin di siglo 19. Den e tempu ei un grupo chikitu di studiante di Beibel ku tabata biba den bisindario di Pittsburgh (Pennsylvania, Merka) a kuminsá hasi un estudio sistemátiko di Beibel. Nan a kompará doktrina di e iglesianan ku loke Beibel ta siña realmente. Despues nan a kuminsá publiká loke nan a siña den buki, korant i e revista ku awor ta konosí komo E Toren di Vigilansia—Anunsiando e Reino di Yehova Dios.

 Den e grupo di studiantenan sinsero di Beibel ei tabatin un hòmber ku yama Charles Taze Russell. Aunke Russell a dirigí e obra di prediká i tabata e promé redaktor di E Toren di Vigilansia, e no tabata fundadó di un religion nobo. E meta di Russell i e otro Studiantenan di Beibel, manera nan tabata konosí e tempu ei, tabata di proklamá e siñansanan di Hesukristu i sigui e modelo ku e kongregashon kristian di promé siglo a establesé. Ya ku e Fundadó di kristianismo ta Hesus, nos ta konsiderá é komo e fundadó di nos organisashon.—Kolosensenan 1:18-20.