UN PERSONA A DISEÑ’É?
Kokolishi di Laman ku Djente Fuerte
Kokolishi di Laman ku kaska ku forma di seru ta biba den awa. E kokolishi di laman ei tin djente masha fuerte mes. Su djentenan ta trahá di un meskla di mineral duru i proteina mas suave. E mineral duru ei, ku na spañó yama goethita, tin hopi fibra fini den dje.
Pensa riba esaki: E kokolishinan di laman ku kaska ku forma di seru tin un kos den nan boka ku ta parse un lenga largu kubrí ku djente. E djentenan ei tin forma di kurva i ta organisá den diferente rei. Huntu nan ta fungi komo un raspu. E djentenan di e kokolishi di laman ta ménos ku un milimeter largu, i nan mester ta masha fuerte mes i duru pa raspa e lima ku tin riba piedra pa e kokolishi di laman por kome.
Algun investigadó a usa un mikroskop spesial pa por midi kon fuerte e djentenan ta. Nan a deskubrí ku djente di kokolishi di laman ku kaska ku forma di seru ta mas fuerte ku kualke otro material ku nan a yega di tèst; e ta asta mas fuerte ku hilu di seda di araña. E persona ku tabata koordiná e investigashon a bisa: “Nos mester purba di imitá e diseño di e djentenan dje kokolishinan di laman ei den e kosnan ku nos ta traha.”
E investigadónan ta kere ku nan por usa un material similar na djente di kokolishi di laman ku kaska ku forma di seru pa traha outo, boto, avion i asta djente falsu pa hende.
Kiko abo ta pensa? E struktura impreshonante di djente di kokolishi di laman ku kaska ku forma di seru ta kasualidat òf diseño?