Sí, pasobra Dios ke pa hende bini huntu pa ador’é. Beibel ta bisa: “Laga nos presta atenshon na otro pa nos por stimulá otro pa mustra amor i hasi bon obra, i no keda sin bai e reunionnan.”—Hebreonan 10:24, 25.

 Hesus a indiká ku su siguidónan lo ta parti di un grupo organisá ora el a bisa nan: “Na esaki tur hende lo sa ku boso ta mi disipelnan, esta, si boso ta stima otro.” (Huan 13:35) Un di e maneranan prinsipal ku e siguidónan di Kristu por mustra e amor ei ta ora nan ta huntu ku otro kristiannan. Pa hasi esei, nan a ser organisá den kongregashonnan ku regularmente ta reuní huntu pa adorá Dios. (1 Korintionan 16:19) Huntu nan ta forma parti di un hermandat mundial.​—1 Pedro 2:17.

Djis ser parti di un religion no ta sufisiente

 Beibel ta mustra ku hende mester bini huntu pa adorá Dios. Sinembargo, niun kaminda Beibel no ta siña ku un hende por agradá Dios djis pasobra e ta pertenesé na un religion. Pa un hende tin e aprobashon di Dios, su religion mester tin un influensia den su bida di tur dia. Por ehèmpel, Beibel ta bisa: “E forma di adorashon ku ta limpi i sin mancha for di e punto di bista di nos Dios i Tata ta esaki: kuida huérfano i biuda ku ta pasa den tribulashon i mantené bo mes sin mancha di mundu.”—Santiago 1:27.