Ken mester siña mucha tokante asuntu seksual? Beibel ta bisa ku ta mayornan tin e responsabilidat akí i hopi mayor a haña e siguiente konsehonan práktiko:

•   No tene bèrgwensa. Beibel ta papia habrí tokante relashon seksual i tambe e ta hasi menshon di órganonan seksual. Dios a bisa e nashon di Israel pa siña “mucha” tokante e kosnan akí. (Deuteronomio 31:12, Beibel Santu; Levítiko 15:2, 16-19) Bo por usa palabranan respetuoso ku no ta kita for di e dignidat di e asuntu akí i di e partinan íntimo di kurpa humano.

•   Siña nan tiki tiki. En bes di tene ún kòmbersashon largu ku bo yu tokante asuntu seksual ora e ta serka di bira tiner, siñ’é tiki tiki segun su kapasidat di kapta kos.—1 Korintionan 13:11.

•   Siña nan normanan moral. Tin skol ku ta duna algun orientashon riba tereno seksual, pero Beibel ta animá mayornan pa bai mas aleu ku esei. Nan mester instruí nan yunan no solamente enkuanto ki funshon órganonan seksual tin, sino tambe e punto di bista korekto ku nan mester tin relashoná ku asuntu seksual.—Proverbionan 5:1-23.

•   Skucha bo yu. No sali for di bo kueru òf kore husga bo yu ora e hasi pregunta tokante asuntu seksual. Mas bien, sea “kla pa skucha, slo pa papia.”—Santiago 1:19.

Kon bo por protehá bo yu kontra hende ku ke abusá di dje seksualmente?

•   Informá bo mes. Buska pa sa kon hende ku ta abusá di mucha seksualmente sa anda.—Proverbionan 18:15; wak kapítulo 32 di e buki Lo que los jóvenes preguntan. Respuestas prácticas, (volumen 1).

•   Keda pendiente di bo yu. No laga bo yu serka ken ku ta sin hasi sigur ku ta hende ku bo por konfia, i no laga bo yu “pa su kuenta.”—Proverbionan 29:15, Beibel Santu.

•   Siña bo yu ku obedensia tin límite. Yunan mester siña obedesé nan mayornan. (Kolosensenan 3:20) Pero, si bo siña bo yu ku semper e tin ku obedesé tur hende grandi, e por kai fásilmente den man di hende ku tin mal intenshon. Por ehèmpel, un mayor kristian por bisa su yu: “Si kualke hende bisa bo pa hasi algu ku Dios no ke, no hasié.”—Echonan 5:29.

•   Train ku bo yu kon e por protehá su mes. Siña bo yu kiko e tin ku hasi ora un hende ta purba abusá di dje ora abo no t’ei. Train bo yu kiko e por hasi den un situashon asina. Esei por dun’é e konfiansa nesesario pa bisa: “Stòp, no hasi e kos ei! Mi ta bisa riba bo!” Anto siñ’é pa despues e kore limpi bai. Kisas lo bo tin ku “keda papia” tur ora bai ku bo yu pasobra e por lubidá fásilmente.—Deuteronomio 6:7, Beibel na papiamentu koriente.