Apòstel Huan a bisa lo siguiente tokante e Evangelio ku el a skirbi di e bida di Hesus: “Esun ku a mira esaki a duna testimonio, i su testimonio ta bèrdat, i e hòmber ei sa ku loke e ta bisa ta bèrdat, pa boso tambe por kere.”—Huan 19:35.

 Un motibu pakiko nos por konfia e relatonan den e Evangelionan di Mateo, Marko, Lukas i Huan ta ku nan a skirbi esakinan miéntras ku hopi hende ku tabata testigu di e susesonan deskribí, ainda tabata na bida. Segun algun fuente, e Evangelio di Mateo tabata skirbí rònt di aña 41 di promé siglo, apénas un ocho aña despues di e morto di Hesus. Hopi eksperto ta pensa riba un fecha mas lat ku esaki, pero en general nan ta di akuerdo ku tur e bukinan di e Skritura Griego Kristian (‘Tèstamènt Nobo’) a keda skirbí den e promé siglo.

 E hendenan ku a mira Hesus ora e tabata na bida riba tera, i ku tabata testigu di su morto i resurekshon, por a konfirmá loke tabatin skirbí den e Evangelionan. Tambe nan lo por a indiká kualke ineksaktitut den e relatonan si tabata nesesario. Profesor F. F. Bruce a bisa: “Un di e puntonan fuerte di e predikashon di e apòstelnan ta e konfiansa ku kua nan tabata hasi un yamada riba loke nan oyentenan tabata sa; nan no a djis bisa: ‘nos ta testigu di e kosnan akí,’ sino ku nan agregá tambe: ‘manera boso mes sa’ (Echonan 2:22).”