Dikon Hende Ta Muri?
E kontesta ku Beibel ta duna
Ta normal pa nos hasi nos mes e pregunta akí, foral ora nos pèrdè un ser kerí. Beibel ta bisa: “E pui ku ta produsí morto ta piká.”—1 Korintionan 15:56.
Dikon hende ta hasi piká i ta muri?
E promé hendenan, Adam i Eva, a pèrdè nan bida pasobra nan a peka kontra Dios. (Génesis 3:17-19) E úniko konsekuensia ku rebelion kontra Dios por a hiba na dje tabata morto, pasobra Dios ta “e fuente di bida.”—Salmonan 36:9, Beibel Santu; Génesis 2:17.
Adam a pasa e imperfekshon ku piká ta trese kuné pa su desendientenan. Beibel ta bisa: “Piká a drenta mundu via un solo hende i pa via di piká a bini morto. Di e manera ei piká a plama entre tur hende, pasobra tur tur hende a hasi piká.” (Romanonan 5:12, Beibel na papiamentu koriente) Pues, tur hende ta muri pasobra tur ta pekadó.—Romanonan 3:23.
Kon Dios lo kaba ku morto?
Dios a primintí ku lo yega e dia ku “e lo traga morto pa semper.” (Isaías 25:8, Beibel Santu) Pa kaba ku morto, e mester eliminá su rais, esta, piká. Dios lo hasi esaki pa medio di Hesukristu, kende lo “kita piká di mundu!”—Huan 1:29; 1 Huan 1:7.