Diabel i e demoñonan tin asina tantu influensia riba hende ku Beibel ta bisa: “Henter mundu ta den poder di e Malbado.” (1 Huan 5:19) Beibel ta mustra ku Diabel ta influensiá hende den vários manera.

•   Engaño. Beibel ta animá kristiannan pa “para firme kontra e trampanan di Diabel.” (Efesionan 6:11) Un di su trampanan ta pa laga hende kere ku su kompinchinan ta sirbidónan di Dios.—2 Korintionan 11:13-15.

•   Spiritismo. Diabel ta usa spiritista, miradó di destino, praktikante di bruheria i astrologia pa engañá hende. (Deuteronomio 18:10-12) Uso di droga, hipnotismo i téknika di meditashon pa hasi mente bashí tambe ta habri kaminda pa e demoñonan influensiá hende.​—Lukas 11:24-26.

•   Religion falsu. Religion ku ta siña doktrina falsu ta engañá hende i asina pone nan desobedesé Dios. (1 Korintionan 10:20) Beibel ta yama e siñansanan falsu ei “siñansa di demoño.”—1 Timoteo 4:1.

•   Poseí pa demoño. Beibel ta papia di hende poseí pa mal spiritu. E demoñonan ei a yega di hasi hende siegu, muda i asta pone nan maltratá nan kurpa.—Mateo 12:22; Marko 5:2-5.

Kon bo por protehá bo mes kontra influensia di Diabel?

 Bo no tin nodi di biba ku e miedu ku demoñonan por influensiá bo, pasobra Beibel ta mustra kon bo por resistí Diabel ku éksito:

•   Buska pa sa ki método Diabel ta usa, ya bo no ta bai tras di su ‘trikinan.’—2 Korintionan 2:11.

•   Haña konosementu di Beibel i apliká loke bo ta siña. Ora bo apliká prinsipio bíbliko, lo bo ta librá di influensia di Diabel.—Efesionan 6:11-18.

•   Deshasí di tur loke tin di haber ku demoño. (Echonan 19:19) Esei ta inkluí músika, buki, revista, poster i vidio ku ta promové práktika di spiritismo.