Mi a krese den un bario di klase trahadó den e stat portuario di Turku. Mi tata tabata kampion di bòkseo i ami ku mi ruman hòmber mas chikitu tambe tabata práktika e deporte ei. Na skol, hopi bes nan tabata yama mi afó pa bringa; mesora mi tabata kla pa tira un par di moketa. Komo teenager mi a djòin un gang notorio, i mi a haña mi den peleanan mas violento ainda. Pero tambe mi a deskubrí e músika di heavy-metal i kuminsá soña pa bira un strea di rock.

Mi a kumpra un sèt di drùm, lanta un banda i no a dura mashá ku mi a bira e kantante prinsipal di e banda. Riba tarima mi tabata gusta di ta pa mi kuenta. Nos aparensia ròf i aspekto salbahe a hasi nos banda masha popular. Nos a kuminsá toka dilanti públiko mas grandi, i nos a hasi algun grabashon; e último a haña bon akohida. Na final di añanan ’80, nos a bai Merka pa promové nos banda i a duna vários presentashon na New York i Los Angeles. Tambe nos a logra establesé kontakto ku algun profeshonal den e mundu di farándula promé ku nos a regresá Finlandia.

Aunke mi tabata sinti mi bon den e banda, mi a deseá pa mi bida tabatin sentido. E mundu difísil i kompetitivo di músika a laga mi keda desilushoná i mi bida desenfrená tambe tabatin mi frustrá. I mi a konsiderá mi mes un mal hende i mi tabatin miedu di bai kima den fièrnu. Pa e motibu ei mi a kuminsá buska kontesta pa mi preguntanan den tur tipo di buki religioso. Tur ora bai mi tabata roga Dios pa yudansa, aunke mi a pensa ku nunka lo mi por a agrad’é.

Pa mi gana mi pan di kada dia, mi tabata traha na pòstkantor. Un dia mi a haña sa ku un di mi koleganan tabata un Testigu di Yehova. Mi a bombardi’é ku pregunta, pero su kontestanan lógiko basá riba Beibel a lanta mi kuriosidat. Pues mi a bai di akuerdo pa e duna mi lès di Beibel. Despues ku mi tabatin algun siman  ta studia, mi banda a haña un oferta atraktivo pa graba un álbum ku e posibilidat di lansa esaki na Merka. Mi a pensa ku esaki tabata e chèns di mi bida.

Mi a bisa e Testigu ku tabata duna mi estudio di Beibel ku mi tabatin masha gana di graba un álbum mas, anto despues di esei, lo mi a kuminsá tuma prinsipionan bíbliko na serio. E no a duna su opinion; e simplemente a bisa mi pa lesa loke Hesus a bisa na Mateo 6:24. E teksto ta bisa en parte: “Ningun hende no por ta esklabo di dos doño.” Ora mi a komprondé kiko e palabranan akí a nifiká, mi a keda asombrá. Pero un par di dia despues tabata e Testigu su bùrt pa keda asombrá ora mi a bis’é ku mi a sali for di e banda pasobra mi ke sigui Hesus.

Beibel tabata manera un spil ku a saka mi foutnan na kla. (Santiago 1:22-25) Mi a realisá ku mi tabata un persona di karakter agresivo, orguyoso i yen di ambishon insasiabel. Mi tabata papia palabra malu i gusta bringa, i mi tabata huma i bebe pisá. Ora mi a realisá ku mi estilo di bida no tabata kuadra mes ku e prinsipionan di Beibel, mi a sinti manera mi a dal kontra di un muraya di blòki. Apesar di esei, mi tabata dispuesto pa hasi e kambionan nesesario.—Efesionan 4:22-24.

Spesialmente na kuminsamentu, mi konsenshi tabata remordé mi pa tur e kosnan robes ku mi a yega di hasi. Pero e Testigu ku tabata duna mi estudio di Beibel a yuda mi hopi. El a mustra mi loke Beibel ta bisa na Isaías 1:18: “Maske boso pikánan ta manera skarlata, nan lo bira blanku manera sneu.” E teksto akí i otro pasashinan di Beibel a konvensé mi ku nos Tata selestial ta miserikòrdioso i e ke kura e heridanan di esnan ku ta arepentí di nan erornan.

Segun ku mi tabata siña konosé Yehova i haña amor p’e, mi deseo pa dediká mi bida na dje tambe tabata oumentá. (Salmo 40:8) Mi a batisá na 1992 na un kongreso internashonal ku Testigunan di Yehova a tene na St. Petersburg, Rusia.

Mi a haña hopi bon amigu entre sirbidónan di Yehova. De bes en kuando nos sa bini huntu pa toka músika desente i disfrutá di e don akí di Dios. (Santiago 1:17) Mi kerida esposa Kristina tabata un bendishon spesial pa mi. Kuné mi por a kompartí mi felisidat i tambe retonan di bida, i asta mi sintimentunan di mas profundo.

Si mi no a bira un Testigu di Yehova, kisas lo mi no tabata na bida awe. Den pasado mi tabata pasa di un problema pa otro i di un krísis pa otro. Awor mi bida tin berdadero propósito i mi ta sinti ku awor tur kos ta na nan lugá.