Nos Ta Siña Tokante Dios Mediante Su Profetanan
Den pasado, Dios a usa su profetanan pa duna hende mensahe importante. E mensahenan akí por mustra nos kiko nos mester hasi pa haña Dios su bendishon? Sí. Laga nos wak kiko nos por siña for di tres profeta fiel di Dios.
ABRAHAM
Dios no ta hasi distinshon di persona i ke bendishoná tur hende.
Dios a primintí Profeta Abraham ku “[mediante bo] tur e famianan di mundu lo ta bendishoná.”—Génesis 12:3.
Kiko nos ta siña? Dios ta stima nos masha hopi i ke bendishoná tur famia ku ta obedes’é, tantu hende hòmber komo hende muhé i mucha.
MOISES
Dios tin kompashon i ta bendishoná hende ku ta hasi esfuerso pa siña konos’é.
E Todopoderoso a duna Profeta Moises poder pa hasi vários milager grandi. Pero tòg Moises a pidi Dios: “Laga mi konosé bo kamindanan, pa mi konosé bo, [i] pa mi haña grasia den bo bista.” (Éksodo 33:13) Dios a keda kontentu ku loke Moises a pidié. P’esei el a bendishon’é ku sabiduria i a yud’é pa konosé Dios su kualidatnan i su manera di aktua mas mihó. Por ehèmpel, Moises a siña ku e Kreador ta “yen di kompashon i grasia.”—Éksodo 34:6, 7.
Kiko nos ta siña? Dios ke bendishoná nos tur, tantu hende hòmber komo hende muhé i mucha, basta nos ta hasi esfuerso pa siña konos’é mas mihó. Dios ta mustra nos den e Santu Skritura kon nos mester ador’é i ku e ta kla pa bendishoná nos tur.
HESUS
Hesus a mustra kompashon i a kura tur sorto di malesa
Dios lo bendishoná nos pa semper si nos siña tokante Hesus i loke el a hasi i siña otro hende.
E Palabra di Dios ta siña nos hopi kos di e bida di Hesus i di su siñansanan. Dios a duna Hesus poder pa hasi hopi milager. Por ehèmpel, el a kura hende siegu, surdu i koho. El a asta lanta hende for di morto. Di e manera ei, el a demostrá kiko ta e bon kosnan ku Dios lo hasi pa nos den futuro. Hesus a splika kiko kada un di nos mester hasi pa disfrutá di e bendishonnan ei. El a bisa: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.”—Huan 17:3.
Hesus tabata kompasivo, kariñoso i amabel. P’esei tantu hende hòmber komo hende muhé di tur edat a aseptá su invitashon: “Siña di mi, pasobra mi tin un genio suave i un kurason humilde, i boso alma lo keda refreská.” (Mateo 11:29) Hesus tabata diferente for di e hendenan di su tempu ku tabata maltratá hende muhé. Hesus a trata hende muhé ku bondat, dignidat i rèspèt.
Kiko nos ta siña? Hesus a stima hende masha hopi mes, i el a pone un ekselente ehèmpel kon nos mester trata otro hende.
HESUS NO TA DIOS TODOPODEROSO
E Santu Skritura ta siña nos ku “realmente ta ún Dios tin” i ku Hesukristu tabata Dios su humilde mensahero. (1 Korintionan 8:6) Hesus a bisa klaramente ku Dios ta mas kuné i ku ta Dios a mand’é riba tera.—Huan 11:41, 42; 14:28. *
^ par. 17 Pa haña sa mas tokante Hesukristu, wak Lès 4 di e foyeto Dios Tin Bon Notisia pa Nos! disponibel online riba www.pr418.com/pap.
Otro Artíkulo Interesante
PREGUNTA KU BEIBEL TA KONTESTÁ
Hesus Ta Dios Todopoderoso?
Kiko Hesus a bisa tokante su puesto relashoná ku Dios?
