Dios a krea kurpa di hende ku un kapasidat maravioso di kura su mes. Ora algu kòrta, raspa òf hinka e kurpa di un hende salú, e kurpa “ta kuminsá un proseso kompliká pa kura heridanan grandi i chikitu.” (Johns Hopkins Medicine) Mesora e kurpa ta stòp e sangramentu, hasi e adernan mas hanchu, kura e herida i fortifiká e tehido rònt di dje.

ALGU PA PENSA ARIBA: Si nos Kreador a traha kurpa di hende di tal manera ku e por kura herida, nos lo mester duda ku Dios tin e kapasidat pa kura nos heridanan emoshonal? E salmista a bisa: “E ta kura esnan di kurason kibrá, i ta mara nan heridanan.” (Salmo 147:3) Pero si bo ta sufri di un trouma emoshonal, kon bo por tin sigur ku Yehova lo mara bo heridanan, tantu awor komo den futuro?

Dios ta bisa nos: “No tene miedu, pasobra mi ta ku bo; no desmayá, pasobra mi ta bo Dios. Lo mi fortalesé bo, sí, lo mi yuda bo.” (Isaías 41:10) Un hende ku sa ku Yehova ta stim’é tin e pas mental i e forsa nesesario pa enfrentá problema. Apòstel Pablo a yama e pas ei “e pas di Dios ku ta surpasá tur komprondementu.” Pablo a bisa tambe: “Pa tur kos mi tin forsa pa medio di esun ku ta duna mi poder.”—Filipensenan 4:4-7, 9, 13.

Beibel ta fortalesé nos fe den loke Yehova a primintí di hasi pa humanidat. Por ehèmpel, Revelashon 21:4 i 5 (wak e sita riba e siguiente página) ta bisa nos loke Dios lo hasi i dikon nos por konfia den dje:

• “Lo e seka tur lágrima” for di nos wowo. Yehova lo eliminá tur kos ku ta pone nos sufri i ansha, asta preokupashonnan ku pa otro hende ta parse insignifikante.

• E Rei Todopoderoso di kreashon, kende ta “sintá riba e trono” selestial, lo usa su poder i outoridat pa evitá ku nos lo bolbe sufri i pa yuda nos ora nos tin mester di yudansa.

• Yehova ta sigurá nos ku su promesanan ta “digno di konfiansa i bèrdat.” Esei ke men ku Dios ta usa su reputashon komo un garantia ku lo e kumpli ku su promesanan.

“‘Lo e seka tur lágrima for di nan wowo, i lo no tin morto mas; ni tristesa ni sklamashon ni doló lo no tin mas. E kosnan ku tabata pasa ántes no t’ei mas.’ I Esun sintá riba e trono a bisa: ‘Tende! Mi ta traha tur kos nobo.’ Tambe e di: ‘Skirbi, pasobra e palabranan akí ta digno di konfiansa i bèrdat.’”—Revelashon 21:4, 5.

Beibel i kreashon ta yuda nos konosé nos Tata selestial. Miéntras ku kreashon ta duna nos un invitashon indirektamente pa bira bon amigu di Dios, Beibel ta hasi esei direktamente: “Hala serka Dios, i lo e hala serka boso.” (Santiago 4:8) Echonan 17:27 ta bisa: “E no ta masha leu for di kada un di nos.”

Mas tempu bo dediká na siña konosé Dios, mas konvensí lo bo bira ku “e ta interesá den [bo].” (1 Pedro 5:7) Kiko ta e benefisionan ora bo ta konfia den Yehova?

Laga nos wak e kaso di Toru, un mener di Hapon. Aunke su mama a hasi esfuerso pa lant’é komo un kristian, el a desviá i a drenta e mundu violento di mafia hapones ku yama yakuza. E ta konta: “Mi tabata pensa ku Dios ta odia mi, i ku morto di mi hendenan, spesialmente di esnan ku mi tabata stima, tabata Dios su forma di kastigá mi.” Toru ta rekonosé ku e ambiente violento ei a hasié bira “un persona kruel i sin heful.” Tokante su ambishonnan, e ta kòrda: “Mi kier a muri yòn i bira famoso matando un hende ku tin mas fama ku mi.”

Sinembargo, ora Toru ku su esposa, Hannah, a studia Beibel, Toru a hasi kambionan grandi den su bida i a kambia su punto di bista. Hannah a bisa: “Mi a mira ku mi propio wowo kon mi esposo a kambia.” Awor, Toru no tin duda mas, el a  bisa: “Dios ta eksistí i e ta stima kada un di nos. E no ke pa ningun hende muri i e ta dispuesto pa pordoná esnan ku arepentí di kurason di nan pikánan. Nos por kont’é kosnan ku nos lo no konta ningun hende i ku ningun hende lo no komprondé. Pronto Yehova lo kaba ku tur problema, sufrimentu i doló. Asta awor, e ta yuda nos na maneranan inesperá. E ta stima nos i ta yuda nos ora nos ta deprimí.”—Deuteronomio 32:36.

Manera nos por a mira den kaso di Toru, ora un hende sa ku Dios por i pronto lo kaba ku tur loke ta pone nos yora di tristesa, no solamente esei ta duna nos un speransa konfiabel pa futuro, sino tambe un mihó bida awor. Asina mes, asta den un mundu yen di sufrimentu, bo por benefisiá di e amor di Dios.