Hesus a bisa: “Nashon lo lanta kontra nashon i reino kontra reino, i lo tin temblor grandi, i den un lugá tras di otro lo tin pèst i skarsedat di kuminda.” (Lukas 21:10, 11) Meskos ku e liñanan riba bo dede ta forma un fingerprint, asina tur e susesonan akí huntu ta forma un señal bon kla. I meskos ku un fingerprint ta yuda identifiká un hende, asina e susesonan akí, ku lo tuma lugá den e mes tempu, lo indiká ku “e Reino di Dios ta serka.” Akaso e susesonan ei ta tumando lugá den e mes tempu rònt mundu? Laga nos wak.

1. GUERA

Na 1914, un guera a kuminsá ku a afektá mas hende i mas lugá ku nunka promé. E historiadónan hopi biaha ta bisa ku aña 1914 a kambia historia pasobra e aña ei tabata e promé biaha ku un guera mundial a tuma lugá. Durante e guera ei, tabata promé biaha ku nan a usa un kantidat grandi di tanki di guera, bòm aéreo, mitrayùr, gas venenoso i otro arma mortal. Despues, un di dos guera mundial a tuma lugá i nan a inventá i usa bòm atómiko pa promé biaha. Desde 1914 padilanti, hopi guera a tuma lugá den un lugá tras di otro, i e gueranan ei a mata miónes di hende.

2. TEMBLOR

E ensiklopedia Britannica Academic ta bisa ku tur aña mas o ménos 100 temblor ku ta sufisiente fuerte pa kousa “daño konsiderabel” ta tuma lugá. I Servisio Geológiko di Merka ta bisa ku “na armonia ku registro (desde 1900) por spera alrededor di 16 temblor grandi tur aña.” Aunke ku algun sientífiko ta bisa ku e kantidat di temblor a oumentá debí ku por detektá temblor mas mihó, echo ta ku temblor grandi ta kousa mas sufrimentu i morto ku ántes.

 3. SKARSEDAT DI KUMINDA

Skarsedat di kuminda hopi bes ta konsekuensia di guera, korupshon, problema ekonómiko grandi, mal maneho riba tereno di agrikultura i falta di planiamentu pa enfrentá desaster natural. E rapòrt di 2018 di Programa Mundial di Alimentashon ta bisa: “Rònt mundu, 821 mion hende ta pasa hamber i 124 mion ta kore peliger di muri.” I tur aña, malnutrishon ta kousa morto di mas o ménos 3,1 mion mucha. Na aña 2011, esaki a kousa kasi mitar di e mortonan infantil rònt mundu.

4. MALESA I EPIDEMIA

Un publikashon di Organisashon Mundial di Salú ta bisa: “Ya kaba hopi epidemia grandi a tuma lugá den siglo 21. Malesa bieu manera kólera, morto pretu (yersinia pestis) i keintura hel a lanta kabes. I malesa nobo a presentá, manera SARS, influenza ku ta afektá hopi hende, Síndrome Respiratorio di Medio Oriente, Ebola i Zika.” Último, nos a haña nos ku e pandemia COVID-19 tambe. Aunke e sientífikonan i e dòkternan a deskubrí hopi kos tokante malesa, nan no a logra haña kura pa tur enfermedat.

5. UN OBRA MUNDIAL DI PREDIKASHON

Hesus a papia tambe tokante un otro aspekto di e señal. El a profetisá: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.” (Mateo 24:14) Miéntras ku mundu ta eksperensiá problema grandi, mas ku ocho mion hende di tur nashon ta deklará e bon notisia di e Reino di Dios den 240 pais i na mas ku 1.000 idioma. Nunka promé esei no a yega di sosodé den historia.

E susesonan ku ta forma parti di e señal ku Hesus a duna ta tumando lugá awor. Dikon ta importante pa nos sa esei? Pasobra Hesus a bisa: “Ora boso mira e kosnan akí sosodé, boso por ta sigur ku e Reino di Dios ta serka.”—Lukas 21:31.

E señal ku Hesus a duna huntu ku kalkulashon basá riba Beibel ta yuda nos komprondé ku Dios a establesé su Reino den shelu na aña 1914. a E aña ei, el a instalá su Yu, Hesukristu, komo Rei. (Salmo 2:2, 4, 6-9) Pronto, e Reino di Dios lo kuminsá goberná mundu, eliminá tur gobièrnu humano i kombertí tera den un paradeis kaminda hende por biba pa semper.

Pronto, e palabranan di e orashon modelo ku Hesus a siña nos lo kumpli: “Laga bo Reino bini. Laga bo boluntat sosodé, meskos ku den shelu, tambe riba tera.” (Mateo 6:10) Pero kiko e Reino di Dios ta hasiendo desde ku el a kuminsá goberná na aña 1914? I kiko nos por spera ora e Reino kuminsá goberná mundu? Ban wak esei den e siguiente artíkulo.