Ora bo ke siña konosé un hende, e promé kos ku probablemente lo bo puntr’é ta: “Kon yama bo?” Awor, si bo por a hasi Dios e pregunta ei, kiko lo el a kontestá bo?

“Ami ta Yehova. Esei ta mi nòmber.”​—Isaías 42:8, NW.

Pasobra Dios mes ta hañ’é importante. Ningun hende no a duna Dios su nòmber; ta e mes a skohe su nòmber. Yehova a bisa: “Esaki ta mi nòmber pa semper, i esaki ta mi nòmber konmemorativo di generashon pa generashon.” (Éksodo 3:15) Den Beibel, e nòmber di Dios ta aparesé mas tantu biaha ku kualke título di dje, manera Todopoderoso, Tata, Señor òf Dios, i mas ku kualke otro nòmber di hende, manera Abraham, Moises, David òf Hesus. Ademas, Yehova ke pa hende sa su nòmber. Beibel ta bisa: “Pa hende por sa ku abo, kende su nòmber ta Yehova, abo so ta e Haltísimo riba henter tera.”​—Salmo 83:18, NW.

E nòmber di Dios ta importante pa Hesus. Den e orashon Nos Tata, Hesus a siña su siguidónan pa hasi orashon na Dios asin’akí: “Bo nòmber sea santifiká.” (Mateo 6:9) I Hesus mes a bisa Dios den orashon: “Tata, glorifiká bo nòmber.” (Huan 12:28) Hesus a haña ku ta masha importante pa glorifiká e nòmber di Dios, i ta p’esei e por a bisa den orashon: “Mi a hasi bo nòmber konosí na nan i lo mi sigui hasié konosí.”​—Huan 17:26.

E nòmber di Dios ta importante pa tur hende ku konosé Dios. Den pasado, Dios su sirbidónan tabata sa ku nan salbashon i protekshon tabata konektá ku Dios su nòmber úniko. “E nòmber di Yehova ta un toren fuerte. E hustu ta kore drenta den dje i ta haña protekshon.” (Proverbionan 18:10, NW) I Beibel ta bisa tambe ku “tur hende ku invoká e nòmber di Yehova lo ser salbá.” (Echonan 2:21)  Ademas, Beibel ta mustra ku e nòmber di Dios lo identifiká su sirbidónan. “Pasobra tur pueblo, di nan parti, lo kana kada un den e nòmber di nan dios; pero nos, di nos parti, lo kana den e nòmber di Yehova nos Dios te na tempu indefiní, asta pa semper.”​—Mikéas 4:5, NW; Echonan 15:14.

E nòmber di Dios ta revelá na un manera úniko ken Dios ta. Hopi eksperto riba tereno di Beibel ta konkluí ku e nòmber Yehova ta nifiká “E Ta Kousa pa Bira.” Yehova Dios a yuda nos komprondé nifikashon di su nòmber ora el a bisa Moises tokante su mes: “Lo Mi Bira Loke Mi Ta Skohe pa Bira.” (Éksodo 3:14, NW) Pues, e nòmber di Dios ta identifik’é komo Kreador di tur kos. Ademas, su nòmber ta nifiká ku e tin tantu e kapasidat komo e abilidat di laga tantu su mes komo su kreashon bira tur loke ta nesesario pa e kumpli ku su propósito. Dios su títulonan ta deskribí su posishon, outoridat òf poder, pero ta solamente su nòmber, Yehova, ta representá tur loke e ta i por bira.

E nòmber di Dios ta demostrá ku e ta interesá den nos. Nifikashon di Dios su nòmber ta indiká ku e ta stima su kreashon, inkluso nos. Ademas, e echo ku Dios a hasi su nòmber konosí ta indiká ku e ke pa nos siña konos’é. Al fin i al kabo, el a tuma inisiativa pa revelá su nòmber hopi tempu pasá, promé ku nos tabata na bida òf promé ku nos por a pensa riba e asuntu akí. Ta klaru ku Yehova no ke pa nos mir’é komo un spiritu ku ta leu for di nos ni pa nos pensa ku ta imposibel pa nos tin un amistat kuné; mas bien, Dios ke pa nos mir’é komo un Persona real ku nos por hala serka dje.​—Salmo 73:28.

Ora nos ta usa Dios su nòmber, nos ta demostrá ku nos ta interesá den dje. Imaginá ku bo ke bira amigu di un hende i bo ta pidié pa e yama bo na bo nòmber. Ta kon lo bo sinti si e persona ei ta nenga di yama bo na bo nòmber? Kisas lo bo kuminsá duda ku e persona ei di bèrdat ke bira bo amigu. Den kaso di Dios ta meskos. Yehova a revelá su nòmber na hende i e ke pa nos us’é. Ora nos ta usa su nòmber, nos ta mustra Yehova ku nos ke hala serka dje. Imaginá bo, e ta asta presta atenshon na “esnan ku ta pensa riba [òf, “balorá,” nota] su nòmber”!​—Malakías 3:16, NW.

Haña sa kon yama Dios ta e promé paso importante pa siña konos’é. Pero nos no mester keda te einan. Nos mester siña konosé su personalidat, esta, sa kon e ta.