Dominio propio ta enserá

• siña warda

• dominá bo mes

• kumpli ku e tareanan ku bo no ta gusta

• konsiderá otro hende mas importante ku bo

Un yu ku tin dominio propio por resistí tentashon, asta ora e tentashon ta algu ku e gusta masha hopi mes. Pero un yu ku no sa kon pa dominá su mes tin e tendensia di

• bira agresivo

• bira deprimí

• kuminsá huma, usa droga òf bebe di mas

• kome loke no ta saludabel

Segun un estudio, un yu ku tin dominio propio tin ménos chèns di haña problema ku salú, problema finansiero i problema ku hustisia ora nan bira grandi. E estudio ei a yuda Angela Duckworth, un profesora di e Universidat di Pennsylvania, yega na e konklushon akí: “No ta eksistí ‘demasiado’ dominio propio.”

Siña bisa nò i tene bo na bo palabra.

PRINSIPIO DI BEIBEL: “Laga boso ‘sí’ ta sí, i boso ‘nò,’ nò.”—Mateo 5:37.

Tin biaha un yu chikitu ta kuminsá grita òf yora pa tèst su mayornan—kisas asta den públiko—pa e haña loke e ke. Si e mayor bai na su amèn, e yu lo sigui usa e strategia ei pa logra loke e ke.

Pero si e mayor bisa nò i ten’é na su palabra, e yu ta siña un bèrdat fundamental di bida: No ta semper nos por haña loke nos ke. Sikólogo David Walsh a skirbi: “Pa straño ku por parse, hende ku ta siña e lès ei ta parse di ta mas felis. Nos no ta yuda nos yu si nos siñ’é ku mundu lo dun’é tur loke e ke riba un teblachi.” *

Si bo siña bisa bo yu nò awor, bo ta entren’é pa despues e por bisa nò na droga, sèks promé ku kasa òf na kualke otro práktika ku no ta bon.

 Yuda bo yu mira kiko lo pasa ora e komportá su mes bon i ora e komportá su mes malu.

PRINSIPIO DI BEIBEL: “Kiko ku un hende sembra, esei lo e kosechá tambe.”—Galationan 6:7.

Ta importante pa bo yu komprondé ku su akshonnan tin konsekuensia, p’esei falta di dominio propio lo tin resultado indeseabel. Por ehèmpel, si tur ora bo yu ta pèrdè dominio propio ora e rabia, otro hende lo purba di evit’é. Pero si e ta siña dominá su mes ora e rabia—òf ta siña warda ku pasenshi sin interumpí ora otro hende ta papia—hende lo gust’é. Yuda bo yu komprondé ku bida lo ta mas mihó si e tin dominio propio.

Siña bo yu kiko ta e kosnan mas importante.

PRINSIPIO DI BEIBEL: “Hasi sigur kiko ta e kosnan mas importante.”—Filipensenan 1:10.

Dominio propio ta yuda nos pa no hasi loke ta malu, i e ta yuda nos tambe pa hasi e kosnan ku nos mester hasi, pero ku kisas nos no ta gusta hasi. Ta importante pa bo yu siña disidí kiko ta mas importante i hasi e kosnan ei promé. Por ehèmpel, e mester hasi hùiswèrk promé, i despues e por bai hunga.

Sea un bon ehèmpel.

PRINSIPIO DI BEIBEL: “Mi a duna boso un ehèmpel, pa boso tambe hasi manera mi a hasi ku boso.”—Huan 13:15.

Bo yu ta opservá kon bo ta reakshoná ora algu ta pone bo rabia. Laga bo yu mira na bo ehèmpel ku kos lo bai bon ora un persona tin dominio propio. Por ehèmpel, kiko abo lo hasi si bo yu ta pone bo pasenshi na prueba, lo bo rabia òf lo bo keda trankil?