JOHN su tata a batisá komo un Testigu di Yehova na final di añanan ’50 den un pueblito na Gujarat, India. Tantu John komo su sinku rumannan i nan mama tabata katóliko deboto. Debí na esei, nan tabata kontra e tata su kreensianan.

Un dia, John su tata a pidié pa hiba un ènvelòp pa un di e rumannan di e kongregashon. Pero e mainta ei, John a kòrta su dede gravemente ora e tabata habri un barí. Ma komo ku e kier a obedesé su tata, el a lora un lapi di paña rònt di su dede ku tabata sangra i a kana bai hiba e ènvelòp.

Ora John a yega na e kas, e esposa di e ruman, kende tambe tabata un Testigu di Yehova, a tuma e ènvelòp. El a ripará ku John a kòrta su dede i a ofresé pa yud’é. E ruman a kue su kaha di promé ousilio, a desinfektá e herida i a mara e dede ku verbant. Despues el a traha te pa John, anto turesten e tabata papia kuné tokante Beibel na un manera masha amabel.

Pa e momento ei, ya John a kuminsá kambia su pensamentu pa ku e Testigunan. Pues el a puntra e ruman pa splik’é dos kreensia ku John i su tata no tabatin mesun punto di bista tokante dje, esta, si Hesus ta Dios i si kristiannan mester resa na Maria. Komo ku e ruman a siña gujarati, John su idioma materno, e ruman a kontest’é for di Beibel i a dun’é e foyeto “E Bon Notisia Akí di e Reino.”

Despues, segun ku John tabata lesa e foyeto, el a sinti ku e tabata lesa bèrdatnan di Beibel pa promé bes. El a bai serka su pastor i a hasié e mesun dos preguntanan ku el a hasi e ruman. No a tarda mashá ku e pastor a pèrdè pasenshi, a tira un Beibel riba dje i a grit’é: “B’a bira Satanas! Unda Beibel ta bisa ku Hesus no ta Dios? Unda e ta bisa ku no mester adorá Maria? Mustra mi!” E pastor su reakshon a laga John keda boka habrí, i el a bisa e pastor: “Nunka mas lo mi bolbe pone un pia den un iglesia katóliko.” Dicho echo, hamas el a bolbe hasié!

John a kuminsá studia Beibel ku e Testigunan, a para firme pa adorashon berdadero i a kuminsá sirbi Yehova. Ku tempu, vários miembro di su famia a hasi meskos. Awe, ainda John tin un sikatris na su wijsvinger, kaminda mas o ménos 60 aña pasá el a kòrt’é. E tin grato rekuerdo di kon un akto di bondat kristian a yud’é haña adorashon berdadero.—2 Kor. 6:4, 6.