“Si bo kier echt siña mas tocante Dios, sigui studia cu e testigonan di Jehova.” M’a keda asombra di tende e comentario ey. Na e momento ey, mi tabatin un poco tempo ta studia cu e testigonan di Jehova. Pero pa yuda bo compronde mi reaccion, laga mi conta bo un tiki di mi bida.

 Mi a nace na Quezaltepeque, un stad na El Salvador. Mi tabata e di seis di 15 yiu. Mi mayornan a purba siña mi pa ta honesto y cumpli cu ley. Ademas, Leonardo y otro testigonan di Jehova de bes en cuando tabata bin siña nos tocante Bijbel. Pero mi no a haci caso di loke mi tabata siña y a tuma un decision robes tras di otro. Ora mi tabatin 14 aña, mi a cuminsa bebe alcohol y uza droga cu mi amigonan di scol. Un pa un, nan tabata kita for di scol pa join un gang y mi a sigui nan mal ehempel. Nos tabata pasa nos dianan riba caya ta exigi hende pa duna nos placa y ta horta pa por a sigui cu nos bicionan.

 E gang a bira mi famia. Mi tabata kere cu mi a debe nan mi lealtad. Por ehempel, un dia un miembro di gang cu tabata bou di influencia pisa di droga a ataca un di mi bisiñanan. Durante e pelea ey, mi bisiña a logra domina mi amigo y a yama polis. Mi a bira furioso y a cuminsa bati e auto di mi bisiña cu un bate pisa pa oblig’e pa laga mi amigo bay. Mi bisiña a roga mi pa stop mientras mi tabata kibra un bentana tras di otro y bati e auto kibra, pero mi no kier a tende.

 Tempo mi tabatin 18 aña, nos gang tabatin un confrontacion cu polis. Net ora mi tabata pa bay tira un bom traha na cas, el a explota den mi man. Con bin, mi no sa. Unico cos cu mi ta corda ta cu mi a wak mi man tur destrosa y mi a cay flauw. Ora mi a bin bij den hospital, mi a haya sa cu mi a perde mi man drechi, mi oido na banda drechi y cu mi a bira casi ciego na mi wowo drechi.

 Ora mi a sali di hospital, toch mi a bolbe na mi gang, a pesar di mi lesionnan. Anto, poco tempo despues, polis a aresta mi y mi a bay prizon. Eyden mi relacion cu e gang a bira mas fuerte. Nos tabata pasa henter dia ta haci tur cos hunto, for di desayuno, ora nos dal nos prome sigaria di marihuana, te ora cu nos bay drumi.

 Ora mi tabata den prizon, Leonardo a bishita mi. Mientras nos tabata combersa, el a mustra riba e tattoo cu mi tin riba mi man drechi. El a puntra mi: “Bo sa kico e tres puntonan di e tattoo ey ta nifica?” Mi di: “Con polaga: sex, droga y rock and roll.” Pero Leonardo a contesta: “Ami lo bisa cu nan ta nifica hospital, prizon y morto. Bo tabata den hospital caba, awor bo ta den prizon, y ya bo sa loke ta sigui.”

 Loke Leonardo a bisa a shock mi. E tabatin rason. Cu mi manera di biba, mi tabata cobando mi mesun graf. Leonardo a ofrece mi un estudio di Bijbel y mi a acepta. Loke mi a siña for di Bijbel a convence mi pa cambia mi bida. Por ehempel, Bijbel ta bisa cu “mal compania ta daña bon custumber.” (1 Corintionan 15:33) Pues, un di e prome cosnan cu mi tabatin cu haci ta busca amigo nobo. Pesey mi a stop di bay e reunionnan di gang y na luga di esey mi a cuminsa bay e reunionnan cu e testigonan di Jehova tabata tene den prizon. Na e reunion aki, mi a topa un preso cu yama Andres, cu a batisa como testigo di Jehova den prizon. El a invita mi pa desayuna hunto cu ne. Djey padilanti, mi no a cuminsa mi dia mas cu sigaria di marihuana. Na luga di esey, nos tabata trata un versiculo di Bijbel tur mainta.

 Den poco tempo e miembronan di gang a ripara cu mi tabata cambiando. Pesey un di e lidernan di e gang kier a papia cu mi. Mi a spanta. Mi no tabata sa kico lo e haci cu mi ora e haya sa ki intencion mi tabatin, pasobra ta casi imposibel pa sali for di un gang. El a bisa mi: “Nos a ripara cu bo no ta bin nos reunionnan mas sino cu bo ta bay e reunionnan di e testigonan di Jehova. Ki intencion bo tin?” Mi a bis’e cu mi kier sigui studia Bijbel y cu mi kier cambia mi bida. Pa mi sorpresa, el a bisa mi cu e gang lo respeta mi decision basta mi demostra cu di berdad mi kier bira un testigo di Jehova. Despues el a bisa: “Si bo kier echt siña mas tocante Dios, sigui studia cu e testigonan di Jehova. Nos ta verwacht cu bo ta stop di haci cos malo. Mi ta felicita bo. Bo ta riba e bon caminda. E Testigonan di berdad por yuda bo. Ami a yega di studia cu nan na Merca y algun di mi famianan ta testigo di Jehova. No tene miedo. Sigui asina.” Ainda mi tabata spanta, pero na e mesun momento, mi tabata masha contento. Mi a gradici Jehova den mi curason. Mi a sinti mi manera un parha cu a sali liber for di su haula. Mi a compronde e palabranan di Hesus ora el a bisa: “Boso lo conoce e berdad, y e berdad lo haci boso liber.”​—Juan 8:​32.

 Algun di mi amigonan di antes tabata purba di test mi y tabata ofrece mi droga. Mi tin cu admiti cu tabatin bes cu mi a entrega na e presion y a cay den tentacion. Pero cu tempo, despues di hopi oracion ferviente, por fin mi a logra vence mi bicionan.​—Salmo 51:10, 11.

 Despues cu mi a sali for di prizon, hopi hende a pensa cu lo mi a bay bek na mi estilo di bida di antes, pero no. Al contrario, varios biaha mi a bay bek na e prizon si, pero pa comparti loke mi a siña for di Bijbel cu e otro presonan. Finalmente, mi amigonan di antes a mira cu di berdad mi a cambia. Lamentablemente, esey no tabata e caso cu mi enemigonan di pasado.

 Un dia mi a sali bay predica, y diripiente algun miembro arma di un gang rival di antes a rondona ami y mi compañero di sirbishi, y nan kier a mata mi. E ruman cu tabata hunto cu mi a splica nan na un manera amabel, pero cu curashi, cu mi no ta un miembro di gang mas. Mientrastanto, ami a purba di keda trankil. Nan a bati mi y a menasa mi pa no drenta e bario ey mas. Despues, nan a baha nan arma y a laga nos bay. Bijbel a echt cambia mi bida. Antes lo mi a purba busca venganza. Pero awor, mi ta aplica e conseho di 1 Tesalonicensenan 5:​15, cu ta bisa: “Zorg pa ningun di boso no paga malo cu malo, ma semper sigui tras di loke ta bon pa otro y pa tur sobra hende.”

 For di dia cu mi a bira testigo di Jehova, mi ta haci esfuerso pa ta un hende honesto. Esey no tabata facil. Pero cu yudansa di Jehova Dios, e consehonan di Bijbel y e apoyo di mi amigonan nobo, mi a logra. Nunca mas lo mi kier bolbe na mi bida anterior.​—2 Pedro 2:​22

 Mi tabata un hende violento y cu hopi rabia. Mi tin sigur cu lo mi no tabata na bida si mi a sigui hiba e bida violento ey. Loke mi a siña for di Bijbel a cambia mi. Mi a stop cu mi bicionan. Mi a siña pa ta na paz cu e enemigonan cu mi tabatin. (Lucas 6:​27) Y awor mi ta disfruta di amistad cu ta yuda mi cultiva bon cualidad. (Proverbionan 13:20) Mi ta feliz y mi bida tin proposito, sirbiendo un Dios cu tabata dispuesto pa lubida tur e cosnan malo cu mi a haci.​—Isaias 1:​18.

 Na aña 2006, mi a bay e scol di entrenamento special pa predicador cristian soltero. Algun aña despues, mi a casa cu mi kerida esposa, y nos tin un yiu muher. Awor mi ta uza mayoria di mi tempo pa siña otro hende e principionan di Bijbel cu a yuda mi. Ademas, mi ta sirbi como anciano den e congregacion local y mi ta purba di yuda e hobennan evita di comete e mesun erornan cu ami a comete tempo mi tabatin nan edad. En bes di coba mi mesun graf, mi ta traha awor pa e bida eterno den futuro cu Dios ta priminti den Bijbel.