Dia 22 di februari 2023, Ruman Andrey Andreyev a sali for di prizon na Rusia. E tabata cera pa mas cu 3 aña.

E autoridadnan a rista cas di hopi testigo di Jehova na Kursk, y e autoridadnan a interoga hopi di nos rumannan na Kursk. Despues di esey, riba 16 di october 2019, e autoridadnan a aresta Ruman Andrey y varios otro ruman homber. Ruman Andrey tabata bou di aresto preventivo; e tabata cera pa casi 20 luna. Corte a dicta sentencia contra Ruman Andrey riba 3 di juni 2021. El a haya castigo di prizon.

Tempo cu Ruman Andrey tabata cera, el a haci tur loke e tabata por pa cuida su esposa, Svetlana, y nan dos yiu muhernan, Anzhelika y Albina. Den e cartanan cu Ruman Andrey tabata skirbi pa su famia, el a duna nan hopi animacion basa riba Bijbel. Ruman Andrey a hasta skirbi henter e discurso di casamento di su yiu muher, Anzhelika, den un carta. Anzhelika a casa tempo cu su tata tabata cera. Anzhelika a bisa: “E discurso tabata masha bunita. El a emociona tur hende cu tabata presente ... Tabata comosifuera mi tata tabata hunto cu nos riba e dia di mi casamento.”

Andrey su famia mester a biaha ocho ora den bus pa yega cerca Andrey. Maske e biaha ey tabata dificil, Svetlana a bisa cu e rumannan cu tabata biba cerca di e prizon semper tabata yuda e cu su yiu muhernan bon. E rumannan tabata duna Svetlana y su yiu muhernan un luga pa pasa anochi y cuminda. Ademas, e rumannan tabata hiba nan pa e centro di detencion y bek. Pa bo bishita un persona na e centro di detencion, bo mester para den rey. Algun di e rumannan tabata para den rey pa e famia. Hopi bes, e rumannan tabata para henter anochi den rey pa reserva un luga den rey pa e famia.

Bida den prizon tabata duro pa Ruman Andrey, pasobra nan tabata trata Ruman Andrey malo. Maske e tabata den prizon, el a keda cu un fe fuerte. E autoridadnan den prizon a haya hopi respet pa Ruman Andrey debi na su bon conducta y su bunita cualidadnan cristian. Debi na su bon reputacion, e autoridadnan a permiti su famia bishit’e mas tanto biaha, mas cu e otro prizoneronan. Ruman Andrey a bisa lo siguiente tocante e sentencia cu Corte a dicta contra dje: “Mi no ta rabia; mi no ta carga rencor, y mi no tin rabia riba niun hende. Danki na Jehova, mi a keda fiel na dje, y mi ta contento.”

Nos tin sigur cu Jehova lo sigui bendiciona Ruman Andrey pa su determinacion pa sigui mustra amor cristian.—1 Juan 4:16.