21 DI FEBRUARI 2022
RUSIA

Algun Ruman Homber Ta Fortalece Nan Fe cu Yudansa di Otro Ruman

PLAY

Corte di e stad Petrozavodsk di Republica di Karelia pronto lo anuncia su veredicto den e caso di e rumannan Maksim Amosov, Mikhail Gordeev, Nikolay Leshchenko y Dmitriy Ravnushkin. Ainda fiscal no a bisa ki sentencia lo e pidi pa nan.

Algun Suceso Cu A Tuma Luga

31 di juli 2019

Agente di FSB a rista cas y luga di trabou di 16 testigo di Jehova
2 di augustus 2019

E recherche cu ta investiga e caso a prohibi Maksim di bay for di e pais. E autoridadnan a cuminsa un caso penal contra Nikolay y prohibie pa bay for di e area
6 di augustus 2019

E recherche cu ta investiga e caso a acusa Maksim y Nikolay di e “crimen” di studia Bijbel
5 di september 2019

Agente di FSB a detene Mikhail na su luga di trabou y bay cu su computer. E recherche cu ta investiga e caso a cuminsa un caso penal contra Mikhail
20 di september 2019

Agente di FSB a rista Dmitriy su luga di trabou y bay cu su telefon. E recherche cu ta investiga e caso a interoga Dmitriy pa cuater ora, cuminsa un caso penal contra dje y prohibie pa bay for di e area
18 di october 2021

E caso penal a cuminsa den corte

Informacion Personal

Mikhail Gordeev

Naci na: 1959

Background: E gusta landa y scucha musica

For di un edad jong, e tabatin pregunta tocante Dios y e proposito di bida. Su prome casa a fayece ora nan yiu homber tabata jong. Ora e tabata busca consuelo, el a papia cu un testigo di Jehova, y el a siña kico Dios su nomber ta. Varios aña despues, el a bolbe topa cu testigonan di Jehova y mesora el a acepta un curso di Bijbel. El a batisa na aña 1996

El a casa cu Yelizaveta na aña 1999. Nan tin dos yiu muher cu ta biba na cas

Loke Nos Ruman A Bisa

Con bo a prepara bo famia pa enfrenta persecucion?

Ora nan a prohibi testigonan di Jehova den e pais, ... mi a realisa cu nos fe lo ser poni na prueba. Pues, mi a haci sigur pa fortalece mi fe y fe di mi famia. Regularmente, nos tabata lesa Bijbel y haci oracion hunto, y nos tabata pidi Jehova pa curashi. Ademas, nos tabata lesa tocante e perseverancia di nos rumannan.

Bo ta corda un ocasion cu Jehova a yuda bo na un manera special?

Mas o menos un luna despues cu nan a rista mi cas, [e recherchenan] a aresta mi na trabou. Nan a hiba mi nan oficina pa interoga mi, y nan a bisa mi di ki crimen mi a ser acusa. Durante e interogacion, nan a purba di intimida mi. Nan a menasa mi cu nan lo manda mi prizon si mi nenga di duna declaracion contra mi rumannan. Esey tabata un tempo dificil pa mi. Mi a haci oracion na Jehova, y mi a pidie pa sabiduria y forsa. El a yuda mi persevera y pa no traiciona mi rumannan.

Nikolay Leshchenko

Naci na: 1962 (Poltava, Ucrania)

Background: El a casa cu Svetlana na aña 1984. Na aña 1988, nan a conoce un pareha Testigo tempo cu Nikolay tabata un soldaat staciona na Polonia. Na aña 1989, nan a asisti na Memorial pa prome bes. Na aña 1993, despues cu nan a bay bek Rusia, nan a cuminsa studia Bijbel y mas despues e aña ey nan a batisa

Loke Nos Ruman A Bisa

Con Jehova a yuda bo durante e tempo aki cu bo no por biaha?

Na final di aña 2019, mi a bira deprimi. Svetlana tabata asisti na un congreso na Varsovia, Polonia. Eynan, el a topa cu algun di nos amigonan cu e tempo ey tabata biba na Polonia. Svetlana a haci un areglo cu nos amigonan pa mi por a papia cu nan via un conferencia di video. Mi no ta corda exactamente kico nan a bisa, pero djis e echo cu mi por a papia cu nan a pone mi sinti hopi mas mihor ... Mi por a mira cu Jehova tabata uzando e oportunidad aki pa yuda mi.

Nos ta masha contento cu nos rumannan na Rusia ta sigui cana den e berdad a pesar di persecucion.—3 Juan 4.

a b Nos no por a haci e ruman pregunta.

COMUNICADO