Ata aki algun experencia di Gran Britania cu lo yuda bo mira dicon nunca nos mester perde speransa. Lo bo mira tambe con bo por, na moda di papia, ‘tira bo pan riba superficie di awa’ pa yuda esnan cu ainda no a tuma e berdad na serio.​—Ecl. 11:1.

Un cualidad cu sigur nos mester tin ta perseverancia. Bo tin cu pega na e berdad y na Jehova. (Deu. 10:20) Esey ta loke Georgina a haci. Tempo cu el a cuminsa studia Bijbel cu Testigonan di Jehova na aña 1970, su esposo Kyriacos a rabia masha hopi. El a purba tur manera pa stop e estudio: E no tabata laga e Testigonan drenta cas, y e tabata kita for di Georgina tur e publicacionnan di Testigonan di Jehova cu e por a haya.

Anto ora Georgina a cuminsa asisti na e reunionnan, el a bira mas furioso ainda. Un biaha, el a bay Salon di Reino cu e intencion di pleita. Un ruman muher cu a ripara cu Kyriacos ta papia Griego mihor cu Ingles a yama un ruman homber di habla Griego di un otro congregacion na telefon y pidie yudansa. Kyriacos a reacciona bon riba e manera bondadoso cu e ruman homber a trat’e y a hasta cuminsa studia Bijbel cu ne. Pero despues di algun luna, el a stop.

Despues di esey, Kyriacos a sigui opone Georgina tres aña largo. El a hasta bisa cu si Georgina batisa, e ta bay lag’e. Riba e dia di su bautismo, Georgina a resa fervientemente na Jehova pa Kyriacos no bandon’e. Ora e Testigonan a bin busca Georgina pa bay asamblea, Kyriacos a bisa nan: “Bay numa. Nos ta bin den nos mes auto.” El a asisti na e sesion di mainta y a mira su esposa batisa.

Despues di e dia ey, Kyriacos no tabata opone Georgina asina tanto mas, y gradualmente el a haci cambionan grandi. Anto despues di casi 40 aña cu Georgina a papia cu Testigonan di Jehova pa prome bes, Kyriacos a batisa! Kico a yuda Kyriacos? El a bisa: “Mi ta contento cu Georgina no a laga nada strob’e di sirbi Jehova.” Georgina a bisa: “A pesar cu mi esposo tabata opone mi, mi tabata determina pa sigui sirbi Dios. Tur e tempo ey, mi a sigui haci oracion na Jehova, y nunca mi a perde ­speransa.”

Un otro factor cu por yuda bo casa ta bo esfuerso pa cultiva cualidadnan cristian. Apostel Pablo a urgi esposanan: “Sea sumiso na boso esposo, ya cu si tin algun cu no ta obedece e palabra, boso por gana nan na e fe pa medio di boso conducta sin papia ni un pia di palabra.” (1 Ped. 3:1) Aunke Christine a sigui e conseho ey, a tum’e basta aña pa e gana su esposo na e fe. Ora Christine a batisa como Testigo di Jehova mas cu 20 aña pasa, su casa John no tabata kere den Dios. Maske John no tabata kier tin nada di haber cu religion, el a mira cu Christine su religion nobo tabata hopi importante p’e. John a bisa: ‘Mi por a mira cu su religion tabata hacie ­feliz. El a bira un persona mas fuerte, y esey tabata un gran yudansa pa mi durante varios situacion ­dificil.’

Christine nunca a forsa su esposo pa acepta su creencianan. John a confirma esey ora el a bisa: “For di un principio, Christine tabata sa cu mihor e no papia cu mi tocante religion. Pesey, cu pasenshi el a laga mi tuma mi tempo y siña na mi manera.” Ora Christine a haya cierto articulonan encuanto naturaleza of ciencia den E Toren di Vigilancia of ¡Despertad! cu lo por a interesa John, e tabata bis’e: “Segun mi, esaki ta algo interesante pa bo.”

Cu tempo, ora John a baha cu pensioen, el a cuminsa coy algun job como hardinero. Debi cu e tabatin mas tempo awor, el a cuminsa pensa seriamente tocante bida y tabata puntra su mes: ‘Ta pa casualidad nos ta aki of nos a ser crea cu un proposito?’ Un dia, un ruman homber cu tabata combersa cu ne a puntr’e: “Kico bo ta pensa di un estudio di Bijbel?” John a bisa: “Como cu mi a cuminsa kere den Dios, mi a acepta un estudio.”

Bo ta mira dicon tabata bon cu Christine no a perde speransa? Despues cu el a resa pidi Dios pa 20 aña largo pa John acepta e berdad, John a ­batisa. Awor, cu celo nan dos ta sirbi Jehova hunto. John a bisa: “Dos cos cu sigur a pone mi cambia ta e bondad y amabilidad di e Testigonan. Ademas, ora bo ta casa cu un Testigo di Jehova, bo tin un casa leal, confiabel y cu no ta egoista.” Si, Christine a aplica e conseho di 1 Pedro 3:1, y el a cosecha bon resultado!

Awor kico di studiantenan di Bijbel cu pa un of otro motibo ta perde e interes cu nan tabatin na principio? Rey Salomon a skirbi: “Sembra bo simia mainta, y no keda sin haci nada atardi; pasobra bo no sa si sembramento di mainta of di atardi lo tin exito, of si nan tur dos lo ta bon.” (Ecl. 11:6) Tin ­biaha, hopi aña ta pasa prome cu simia di e berdad ta crece y duna fruta. Pero finalmente, e persona por bin compronde e importancia di hala cerca Dios. (Sant. 4:8) Si, un dia cu bo no ta spera, bo por haya un grato sorpresa.

Tuma por ehempel e caso di Alice, kende a muda di India pa Inglatera. El a cuminsa studia Bijbel na aña 1974. Aunke e tabata papia Hindi, e kier a mehora su Ingles. El a studia Bijbel un par di aña y a asisti algun biaha na e reunionnan di un congregacion Ingles. E tabata sa cu loke e tabata studia ta e berdad, pero e no a tum’e na serio. Placa tabata masha importante p’e y e tabata gusta bay fiesta. Y cu tempo, Alice a stop di studia Bijbel.

Casi 30 aña despues, Stella, e ruman muher cu tabata studia cu ne, a ricibi un carta di dje cu a bisa: “Mi sa cu lo bo keda masha contento di tende cu bo studiante di 1974 a batisa na e ultimo congreso di districto. Bo a hunga un papel importante den mi bida. Bo a planta e simia di e berdad den mi. Y maske mi no tabata cla pa dedica mi bida na Dios e tempo ey, semper mi a conserva e simia aki den mi mente y curason.”

Dicon el a haci e cambio ey? Alice a conta cu e tabata hopi deprimi despues cu su esposo a muri na 1997. Y un biaha cu el a haci oracion na Dios, un dies minuut despues dos Testigo di habla Punjabi a yama na su cas y a dun’e e tratado Ki speranza tin pa stimánan cu a fayece? Alice a sinti cu Dios a contesta su oracion y a dicidi di tuma contacto atrobe cu Testigo di Jehova. Pero unda e por a haya nan? Den un agenda bieu, el a bin haya e adres cu ­Stella a dun’e di e congregacion Punjabi. Alice a bay e ­Salon di Reino ey y e rumannan a dun’e un caluroso bonbini. Alice a bisa: “M’a keda corda e manera amoroso cu e rumannan a trata mi, y esey a yuda mi sali for di mi depresion.”

Alice a cuminsa asisti regularmente na e reunionnan, el a cuminsa studia Bijbel atrobe y a siña papia y lesa Punjabi bon. Na aña 2003, el a batisa. Alice a termina su carta na Stella cu e palabranan aki: “Masha danki cu bo a planta e simianan ey 29 aña pasa den mi y pa e bon ehempel cu bo a pone pa mi.”

“Masha danki cu bo a planta e simianan ey 29 aña pasa den mi y pa e bon ehempel cu bo a pone pa mi.”​—Alice

Kico bo por siña for di e experencianan aki? Kisas ta tuma mas tempo cu bo ta pensa pa un persona progresa. Pero si e persona tin hamber pa e berdad y ta honesto y humilde, Jehova lo percura pa e simia di e berdad crece den su curason. Corda loke Hesus a bisa den su ilustracion: “E simia ta spruit y crece bira grandi; ma [e sembrador] no sa di ki manera. E tera di su mes ta produci gradualmente: prome, e blachinan manera yerba ta sali; despues, e tapushi ta forma; finalmente, tur e pipitanan di e tapushi ta hecha.” (Mar. 4:​27, 28) E crecemento ey ta sosode gradualmente y ‘di su mes.’ En realidad, niun publicador di Reino no sa con e proceso aki ta tuma luga. Pesey, sigui sembra abundantemente. Kisas, lo bo cosecha abundantemente.

Anto nos no mester lubida con importante ta pa haci oracion. Tanto Georgina como Christine a sigui haci oracion na Jehova. Pesey, si bo “persevera den oracion” y nunca perde speransa, ‘despues di dia’, bo por haya bek e ‘pan cu bo a tira riba superficie di awa.’​—Rom. 12:12; Ecl. 11:1.