Na 1949, mi tata a emigra di Alemania pa Australia. El a bay busca trabou den un area di mina y industria cu ta genera coriente, anto a bay biba den un cunucu na Victoria. Eynan el a casa cu mi mama, y mi a nace na 1953.

Un par di aña despues, mi mama a tuma un curso di Bijbel cerca e testigonan di Jehova. Debi na esey, el a lanta mi segun e siñansanan di Bijbel. Pero, mi tata no tabata kier sa nada di ningun religion. El a bira violento, y mi mama tabatin miedo di dje. Pero toch mi mama a sigui cu su estudio di Bijbel den secreto y a bin stima siñansanan biblico. Ora mi tata no tabata na cas, mi mama tabata siña ami cu mi ruman muher e cosnan cu e tabata siña. E tabata conta nos di e futuro paradijs y con nos por ta feliz si nos aplica normanan biblico.— Salmo 37:10, 29; Isaias 48:17.

Cu 18 aña di edad, mi a haya mi obliga ta bay for di cas debi cu mi tata tabata hopi violento. Aunke mi tabata kere loke mi mama tabata siña mi for di Bijbel, mi no a balora e siñansanan y no a aplica nan den mi bida. M’a cuminsa traha como electricien na un mina di carbon. Cu mi 20 aña m’a casa. Nos prome yiu muher a nace tres aña despues, y esey a pone mi pensa atrobe riba kico tabata importante den mi bida. Mi tabata sa cu Bijbel por a yuda nos famia, pues m’a cuminsa un curso di Bijbel cu testigonan di Jehova. Pero mi casa tabata hopi contra. Ora m’a bishita un di nan reunionnan, mi casa a duna mi un ultimatum: sea stop mi estudio di Bijbel of bay for di cas. M’a sinti cu mi no por a haci nada, m’a cede na su exigencia anto separa mi mes for di e Testigonan. Despues mi a lamenta cu mi no a para pa loke mi tabata sa cu ta corecto.

Un dia, mi coleganan di trabou a introduci mi na pornografia. Tabata algo excitante pero na mes momento repugnante, y m’a sinti mi sumamente culpabel. Ora m’a corda loke m’a siña for di Bijbel, m’a echt kere cu Dios lo a castiga mi. Pero mas mi tabata wak potretnan inmoral, mas mi actitud pa cu pornografia a cambia. Cu tempo mi a bira adicto na dje.

Durante e 20 añanan cu a sigui, m’a drif bay mas y mas leu for di e normanan cu mi mama a purba di siña mi. Mi comportacion  tabata refleha loke mi tabata hinca den mi mente. Mi manera di papia y chistenan tabata vulgar. Mi a haya un punto di bista troci di sex. Aunke mi tabata biba ainda cu mi casa, mi tabatin otro hende muher. Un dia mi a wak mi mes den spiel y m’a pensa: Mi no gusta bo. En bes di tin respet propio, mi a cuminsa odia mi mes.

Mi matrimonio a fracasa, y mi bida a cay den otro. E ora ey mi a haci oracion na Jehova cu henter mi curason. Aunke 20 aña a pasa, m’a bolbe cuminsa cu mi estudio di Bijbel. Ya pa e tempo ey, mi tata a fayece y mi mama a batisa como un testigo di Jehova.

Tabatin un diferencia hopi grandi entre e manera cu mi tabata hiba mi biba y e normanan di Bijbel. Pero e biaha aki mi tabata determina pa haya e paz mental cu Bijbel ta priminti. M’a dicidi di drecha mi vocabulario y domina mi rabia. Mi a dicidi tambe di bandona mi bida inmoral, stop di hunga wega di placa, bebe di mas y horta mi doño di trabou.

Mi coleganan di trabou no por a compronde dicon mi tabata kier haci cambionan drastico asina. Pa tres aña largo nan a purba di provoca mi pa mi bay bek na mi manera di haci di antes. Si mi a comete un fayo, manera grita, rabia of bisa un palabra malo, nan tabata grita: “Aha! E Joe di antes ta bek.” E palabranan ey tabata haci mi hopi dolor. Hopi bes mi a sinti cu mi a fracasa.

Mi luga di trabou tabata pesta cu pornografia, tanto electronico como imprimi. Hopi biaha, mi coleganan tabata manda potretnan erotico pa mi via computer, manera mi tabata haci antes. Mi tabata purba di vence mi adiccion, pero nan tabata determina pa pone mi faya. Mi a busca yudansa y animacion cerca e Testigo cu tabata studia Bijbel cu mi. El a scucha mi cu pasenshi segun cu mi tabata desahoga mi mes cerca dje. El a uza textonan specifico di Bijbel pa mustra mi con mi por lucha contra mi adiccion, y el a anima mi pa sigui busca Jehova su yudansa mediante oracion.—Salmo 119:37.

Un dia mi a yama mi coleganan pa un reunion. Ora nan a bin, mi a bisa nan pa duna dos di nos coleganan cu tabata alcoholico cerbes. Tur e coleganan a grita y protesta, bisando: “Bo no por haci e cos ey. Nan tin problema cu adiccion.” Mi a responde: “Si, wel ami tambe.” Desde e dia ey padilanti, nan a reconoce cu mi tabata lucha contra mi adiccion na pornografia, y nan no a pone presion mas riba mi.

Cu tempo y cu hopi yudansa di Jehova, mi a logra vence mi adiccion. Na 1999, mi a batisa como testigo di Jehova, agradecido cu mi a haya un chens mas pa hiba un bida decente y feliz.

Awor mi ta compronde dicon Jehova ta odia loke mi tabata stima pa asina tanto tempo. Como un Tata cu ta stima nos, e tabata kier proteha mi di e dañonan cu pornografia ta causa. Ta net manera Proverbionan 3:5 y 6 ta bisa: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.” E normanan di Bijbel no solamente ta proteha nos, sino tambe ta yuda nos haya exito den bida.—Salmo 1:1-3.

Den pasado, mi tabata disgusta cu mi mes, pero awor mi tin respet propio y paz mental. Mi ta hiba un bida limpi, y mi ta sinti cu mi tin Jehova su apoyo y pordon. Na 2000, mi a casa cu Karolin, un bunita Testigo cu ta stima Jehova mes tanto cu mi. Den nos cas ta reina paz. Ta un gran privilegio pa forma parti di un hermandad mundial cu ta caracterisa pa amor y pureza moral.