• E ta scogi pa Dios. “Ta ami ... a establece mi rey ... Lo mi duna bo e nacionnan como bo herencia, y e finnan di Tera como bo posesion.”—Salmo 2:6, 8.

• E ta un heredero di Rey David. “Un yiu a nace pa nos, un yiu homber ta duna na nos ... Lo no tin fin na e aumento di su gobernacion y di paz, riba e trono di David y riba su reino, pa establece esaki.”—Isaias 9:6, 7.

• El a nace na Betlehem. “Betlehem ... for di bo lo sali uno pa mi pa ta gobernante ... E lo ta grandi te na e finnan di Tera.”—Mikeas 5:2, 4.

• Hende a rechas’e y mat’e. “El a wordo desprecia, y nos no tabatin aprecio p’e ... El a wordo traspasa pa nos transgresionnan, el a wordo golpia pa nos inikidadnan.”—Isaias 53:3, 5.

• El a ser resucita y glorifica. “Lo bo no entrega mi alma na Seol [of, graf], tampoco lo bo no permiti bo santo mira corupcion ... Na bo man drechi tin delicia pa semper.”—Salmo 16:10, 11.

Den henter e historia di hende, tin un hende so cu ta cuadra cu e descripcion di un Gobernante ideal. Ken e hende ey ta? Wel, esey ta Hesucristo. Esaki a keda confirma ora un angel a bisa Maria, mama di Hesus: “Dios lo dun’e e trono di su tata David ... y lo no tin fin na su Reino.”—Lucas 1:31-33.

Hesus nunca a bira gobernante riba Tera, pero lo e goberna humanidad desde cielo como Rey di e Reino di Dios. Dicon e ta un Gobernante ideal? Wak kico Hesus a haci tempo e tabata riba Tera.

•   Hesus a mustra interes den hende y a yuda nan. Hesus a yuda tur hende, sea cu nan tabata hende homber, hende muher, hoben, chikitin, rico of pober. (Mateo 9:36; Marco 10:16) Ora un leproso a suplic’e: “Si bo kier, bo por cura mi”, Hesus a haya duele di dje y a cur’e.—Marco 1:40-42.

• Hesus a siña nos con pa agrada Dios. El a bisa: “Boso no por ta esclavo di Dios y di Rikesa.” Ademas, el a bisa cu nos mester trata otro hende manera nos kier pa otro hende trata nos; e principio ey ta ser yama e Regla di Oro. Tambe el a mustra cu Dios ta interesa den loke nos ta haci, pero no ta esey so, e ta interesa tambe den loke nos ta pensa y sinti. Pues, pa nos agrada Dios, nos mester controla loke nos ta sinti den nos curason. (Mateo 5:28; 6:24; 7:12) Y Hesus a enfatisa cu pa nos por ta realmente feliz, nos mester siña kico Dios kier pa nos haci, anto haci esey tambe.—Lucas 11:28.

• Hesus a siña nos con pa stima otro hende. Loke Hesus tabata bisa y haci tabatin un gran efecto riba esnan cu tabata scuch’e y e tabata touch nan curason. “E multitud a keda babuca di su manera di siña hende, pasobra e tabata siña nan manera un persona cu tin autoridad.” (Mateo 7:28, 29) Hesus a siña nan: “Stima boso enemigonan.” El a hasta haci oracion pa esnan cu tabata responsabel pa su morto. El a pidi: “Tata, pordona nan, pasobra nan no sa kico nan ta haci.”—Mateo 5:44; Lucas 23:34.

Hesus ta e mihor Gobernante pa humanidad pasobra e ta cla pa yuda y ta bondadoso. Pero na ki tempo lo e cuminsa goberna?