Dios Ta Scucha Nos Oracionnan?
Bo a yega di puntra bo mes si Dios ta scucha bo oracionnan? Wel, abo no ta e unico. Hopi hende a haci oracion tocante nan problemanan, pero nan problemanan t’ey keto bay. Esey kiermen cu Dios no ta scucha nos oracionnan? Claro cu no! Bijbel ta bisa cu Dios ta scucha nos ora nos resa na dje na e manera corecto. Ban wak kico Bijbel ta bisa.
DIOS TA SCUCHA BO.
“Abo cu ta scucha oracion, cerca bo tur hende ta bin.”—Salmo 65:2.
Tin hende ta haci oracion pasobra nan ta bisa cu esey ta pone nan sinti mas mihor, aunke nan no ta kere cu tin un persona ta scucha nan. Pero oracion no ta djis algo cu nos mester haci pa nos sinti bon ora nos tin problema. Bijbel ta sigura nos cu Jehova * “ta cerca di tur esnan cu ta sclama na dje, cerca di tur esnan cu ta sclama na dje den berdad ... E lo tende nan sclamacion.”—Salmo 145:18, 19.
Pesey nos por tin sigur cu Jehova Dios ta tende oracion di su adoradornan. Yen di amor e ta bisa: “Boso lo sclama na mi y bin haci oracion na mi, y lo mi scucha boso.”—Jeremias 29:12.
DIOS KIER PA BO HACI ORACION NA DJE.
“Persevera den oracion.”—Romanonan 12:12.
Bijbel ta anima nos pa “haci oracion continuamente” y pa “sigui resa tur ora bay.” Nos por mira bon cla cu Jehova Dios kier pa nos haci oracion na dje.—Mateo 26:41; Efesionan 6:18.
Dicon Dios kier pa nos resa na dje? Wel, laga nos wak un ehempel. No ta asina cu tur tata lo keda contento si su yiu pidie: Papi, Papi por yuda mi cu algo? Claro cu un tata hopi biaha sa caba kico su yiu tin mester of kico e ta sinti, pero ora e tende su yiu bis’e e palabranan ey, e ta mira cu su yiu ta confi’e y tin un bon relacion cu ne. Asina tambe, ora nos resa na Jehova Dios, nos ta mustr’e cu nos ta confi’e y kier tin un bon relacion cu ne.—Proverbionan 15:8; Santiago 4:8.
DIOS DI BERDAD TA INTERESA DEN BO.
“Tira tur [bo] inkietud riba dje, pasobra e ta interesa den [bo].”—1 Pedro 5:7.
Dios kier pa nos haci oracion na dje pasobra e ta stima nos y ta interesa den nos. E sa kico tur ta preocupa nos y tur loke nos ta pasa aden, y e kier yuda nos.
Henter su bida, Rey David a pidi Jehova Dios pa yud’e y a bis’e kico e ta sinti y pensa. (Salmo 23:1-6) Kico Dios tabata sinti pa David? Dios a stima David y a scucha su oracionnan. (Echonan 13:22) Den nos caso tambe, Dios ta scucha nos oracionnan pasobra e ta stima nos.
MI TA STIMA JEHOVA, PASOBRA E TA TENDE MI BOS
Un di e escritornan di e salmonan cu tin den Bijbel a bisa e palabranan ey. E tabatin sigur cu Dios a tende su oracionnan, y esey a yud’e masha hopi mes. E tabata sinti cu e tin un bon relacion cu Dios y a haya forsa pa trata cu problema y tristeza den bida.—Salmo 116:1-9.
Ora nos ta sigur cu Dios ta tende nos oracionnan, nos lo sigui resa na dje. Ban wak e ehempel di Pedro. Pedro ta biba den e parti noord di Spaña. Su yiu homber di 19 aña a haya un accidente di auto y a fayece. Pedro tabata masha tristo mes. Pero el a haci oracion na Dios y a bis’e precies loke e tabata sinti; bes tras bes el a pidi Dios pa consol’e y sosten’e. Kico tabata e resultado? Pedro a bisa: “Jehova a contesta mi oracionnan pasobra e rumannan cristian a consola y sostene ami cu mi casa.”
Hopi biaha nos ta haya contesta pa nos oracionnan mediante consuelo y sosten di nos kerido amigonan
Ta berdad cu oracion no a duna nan nan yiu bek, pero toch oracion a yuda nan masha hopi mes. Su casa, María del Carmen, a bisa: “Oracion a yuda mi cu mi tristeza. Mi tabata sa cu Jehova Dios ta compronde mi pasobra ora mi tabata resa na dje mi a sinti un paz y trankilidad.”
Pues, tanto Bijbel como e ehempelnan cu nos a mira ta mustra bon cla cu Dios ta tende nos oracionnan. Ta berdad si cu Dios no ta contesta tur oracion. Dicon no? Ban wak esey den e siguiente articulo.
^ par. 5 Bijbel ta bisa cu Dios su nomber ta Jehova.—Revelacion 4:11.
You May Also Like
PREGUNTA CU BIJBEL TA CONTESTA
Dios Ta Yuda Mi ora Mi Haci Oracion?
Di berdad Dios ta interesa den nos problemanan?
