Hende por tin prehuicio contra un persona no solamente debi na su nacionalidad, rasa, tribu of idioma, sino tambe debi na su religion, sexo of clase social. Tin hende ta husga otro hende robes debi na nan edad, educacion, limitacion fisico of apariencia. Pero toch, nan ta sinti cu nan no tin prehuicio.

Ta posibel cu abo a ser contagia cu prehuicio? Mayoria di nos ta ripara ora un hende tin prehuicio. Pero kisas ta mas dificil pa ripara ora anos tin prehuicio. E berdad ta cu nos tur, di un manera of otro, tin un cierto grado di prehuicio. Profesor David Williams, un sociologo, a bisa cu ora un hende ta pensa malo di un cierto grupo y despues ta cera conoci cu un persona di e grupo ey, “e lo trata e persona ey diferente sin cu e sa.”

Por ehempel, den un pais den zuidoost Europa, unda un hende homber cu yama Jovica ta biba, tin un grupo di stranhero. Jovica a bisa: “Mi a pensa cu niun hende di e grupo ey por ta bon hende. Pero mi no a pensa cu mi tabatin prehuicio pasobra mi a kere cu loke mi tabata pensa di nan ta berdad.”

Hopi gobierno ta pasa ley pa purba combati racismo y otro formanan di prehuicio. Pero toch nan no a logra caba cu prehuicio. Dicon no? Pasobra e leynan ey no ta gara e toro na su cacho, nan tin efecto solamente riba comportacion di un hende. Pero nan no tin efecto riba loke un persona ta pensa of sinti. Y prehuicio ta cuminsa den un persona su mente y curason. Acaso esey kiermen cu no ta bale la pena pa purba vence prehuicio? Ta posibel pa caba cu prehuicio?