CASUALIDAD OF DISEÑO?
Dicon e Fruminga Color di Plata di Sahara Por Wanta Hopi Calor?
E FRUMINGA color di plata di Sahara (Cataglyphis bombycina) ta un di e bestianan cu por wanta mas tanto calor. Merdia, den e higra di solo di Sahara, tur enemigo di e fruminga color di plata ta bay sconde den sombra. Esey ta e momento cu e fruminga aki ta core sali for di su neishi pa busca cuminda cu ta consisti di entre otro insectonan cu a muri pa motibo di e calor inmenso.
[50] μm
Pensa un rato riba lo siguiente: Loke ta proteha e fruminga color di plata ta un capa di cabey special cu e tin parti ariba y na banda di su curpa y tambe un capa special sin cabey cu e tin parti abou di su curpa. Su cabeynan (1, 2), lizo y color di plata briyante, ta manera tubonan triangular (driehoek) cu ta hopi chikito (3). Pues cada tubo tin tres banda. Dos banda ta keda parti pafo y tin manera lachinan microscopico cu ta core pareu cu e cabey, anto e parti cu ta keda paden ta lizo. E diseño aki tin dos funcion. Na prome luga, e cabeynan ta refleha rayonan cayente y invisibel di solo. Na di dos luga, e ta yuda e fruminga deshaci di e calor cu su curpa a absorba di e ambiente rond di dje. Y e parti abou di e curpa cu ta sin cabey ta refleha e rayonan invisibel cu ta sali for di e suela di e desierto. *
[10] μm
E diseño di e fruminga color di plata ta yuda e temperatura di su curpa keda bou di 53,6 grado Celsius. Esaki ta e temperatura maximo cu e por wanta. E insecto chikito aki a inspira cientificonan pa traha riba un coating special cu por fria algo sin uza fan of otro aparato.
Ki bo ta pensa? E proteccion cu e fruminga color di plata di Sahara tin a bin di evolucion of di creacion?
^ par. 4 E fruminga tin algun bentaha mas. E tin un proteina special den su curpa cu calor intenso no por daña facilmente. Ademas, e tin pata largo cu ta tene su curpa na un distancia for di e suela cayente y cu ta yud’e core lihe. Y como cu e por orienta hopi bon, e por yega masha lihe na su neishi bek.
