Imagina bo e siguiente escena: Julia ta wak den spiel y e unico cos cu e ta mira ta cu e ta gordo. E ta bisa den su mes: Mi tin cu baha di peso. Pero su mayornan y su amigonan ta bis’e cu e ta hopi flaco.

Julia tin un par di dia caba ta pensa ki medida drastico e por tuma pa baha maske ta 2 kilo. Unico cos cu e tin cu haci ta keda sin come pa un par di dia ...

Si bo ta sinti mescos cu Julia, kico lo bo haci?

No ta malo pa bo ta preocupa cu bo apariencia. Bijbel ta papia di e bunita apariencia di diferente homber y muher, manera Sara, Raquel, Abigail, Jozef y David. Bijbel ta bisa cu un muher cu yama Abisag tabata “masha bunita.”—1 Reynan 1:4.

Pero tin hopi hoben cu ta obsesiona cu nan apariencia. Esey por hiba na problemanan serio. Considera lo siguiente:

• Un investigacion a mustra cu 58 porciento di mucha muher tabata pensa cu nan ta mucho gordo, pero en realidad ta 17 porciento so tabatin sobrepeso.

• Un otro investigacion a mustra cu 45 porciento di hende muher cu eigenlijk tabata bou di peso tabata pensa cu nan ta mucho gordo.

• Algun hoben, den nan esfuerso pa baha di peso, a bira victima di anorexia, esta, un miedo abnormal di bira gordo cu ta pone un hende keda sin come y hasta muri di hamber.

 Si bo tin sintomanan di anorexia of cualkier otro problema cu comemento, busca yudansa. Cuminsa na papia cu un mayor of un otro adulto cu bo ta confia. Bijbel ta bisa: “Un amigo ta stima tur ora bay, y un ruman ta naci pa tempo di adversidad.” —Proverbionan 17:17.

En realidad, ta e persona cu bo ta di paden ta determina cu bo ta atractivo of no. Wak por ehempel Absalon, yiu di Rey David. Bijbel ta bisa di dje:

“No tabatin ningun hende cu tabata ricibi tanto elogio pa su bunitesa; ... no tabatin ningun defecto na dje.”—2 Samuel 14:25.

Pero, e hoben aki tabata hopi orguyoso, ambicioso y traicionero. Pesey, Bijbel no ta papia mucho bon di Absalon; e ta pint’e como un homber sinberguensa y desleal, cu tabatin asina tanto odio cu e tabata capaz pa mata.

Cu bon motibo anto Bijbel ta duna nos e conseho aki:

“Bisti e personalidad nobo.”—Colosensenan 3:10.

“No laga boso adorno ta di pafo so, ... ma laga esey ta e hende cu boso ta di paden.”—1 Pedro 3:3, 4.

No ta nada malo si bo kier tin un bon apariencia, pero bo personalidad ta mucho mas importante cu esey. Ta bo bon cualidadnan ta haci bo bunita pa otro hende, y no un curpa hancra of un bunita figura. Un mucha muher cu yama Phylicia ta bisa: “Si bo ta bunita, bo ta atrae hende su bista hopi lihe, pero e persona cu bo ta di paden y bo bon cualidadnan ta loke mas nan ta keda corda.”

Bo ta contento cu bo apariencia?

Bo a yega di pensa pa haci cirugia plastico of tene un dieet streng pa drecha algo cu bo no ta gusta na bo apariencia?

Si bo por a cambia algo na bo apariencia, kico lo bo a cambia?

• HALTURA

• PESO

• CABEY

• FORMA DI CURPA

• CARA

• COLOR DI CUERO

Si bo a contesta si, na e prome dos preguntanan ariba, y bo a marca un ronchi rond di tres of mas di e caracteristicanan na e di tres pregunta, considera lo siguiente: Probablemente otronan no ta mira bo den e mesun forma negativo cu bo ta mira bo mes. Ta facil pa bay den extremo y preocupa mucho hopi cu bo apariencia.—1 Samuel 16:7.