Binidbir na Estonia so “Sakey a Baleg ya Agawaan”

I-PLAY

Say Balon Mundo a Patalos na Masanton Kasulatan ed lenguahen Estonian et in-nominate parad 2014 Language Deed of the Year Award diad Estonia. Diad 18 ya nominado, saya so akala na komatlon sankarakelan a boto.

Sayan balon patalos na Biblia, ya in-release nen Agosto 8, 2014, et in-nominate na eksperto ed lenguahe ya si Kristiina Ross na Institute of the Estonian Language. Imbaga ton say Balon Mundo a Patalos et “mainomay tan makapaliket ya basaen.” Inyarum to ni: “Say amin a kimey ya ginawa pian napawala iya et baleg so epekto tod panagpatalos ed lenguahen Estonian.” Si Rein Veidemann, sakey a propesor ed literatura tan kultura na Estonia, et tinawag ton “sakey a baleg ya agawaan” iyan balon patalos.

Say sankaunaan ya kompleton Biblia ed Estonian et im-publish nen 1739, tan manlapud saman et wala ray apawala ya arum nin patalos. Akin balet et nibagan “sakey a baleg ya agawaan” so Balon Mundo a Patalos?

Susto. Diad sakey ya kabkabat a Biblia ya Estonian, ya im-publish nen 1988, et impatalos so ngaran na Dios bilang “Jehoova” (Jehova) diad masulok ya 6,800 a beses diad Hebreon Kasulatan (Daan a Sipan). a Ontan met so ginawa ed Balon Mundo a Patalos ed Estonian tan mas dakel nin beses ya inusar itan a ngaran. No walay malinew a basiyan, uusaren met na Balon Mundo a Patalos so ngaran na Dios ed Kristianon Griegon Kasulatan (Balon Sipan).

Malinew. Kasin susto tan mainomay ya basaen so Balon Mundo a Patalos? Insulat na respetadon managpatalos na Biblia ya si Toomas Paul ed dyaryon Eesti Kirik (Simbaan na Estonia) ya say Balon Mundo a Patalos “et talagan nipatalos ya malinew ed Estonian.” Inyarum to ni: “Nibagak ya first time iyan agawaan.”

Minanabang ed Estonian ya patalos

Talagan agustoan na saray taga Estonia so Balon Mundo a Patalos. Sakey ya istasyon ed radyo so angusar na 40 minuto pian pantongtongan iyan balon Biblia. Wala ray pari tan membro na simbaan da ya nan-order na kopya ra ed saray Tasi nen Jehova. Nan-order met so sakey ya kabkabat ya eskuelaan diad Tallinn na 20 kopya na Balon Mundo a Patalos pian nausar ed sakey ed saray klase ra. Labalabay na saray taga Estonia so manbasay libro, tan maliket iray Tasi nen Jehova ya mangiter ed sikara na susto tan malinew a patalos na sankaabigan ya libron nisulat.

a Kayarin impaliwawa nen Ain Riistan, chairman na New Testament Studies at the University of Tartu, no panon ya nagmaliw ya “Jehoova” so balikas na saray Estonian ed ngaran na Dios, imbaga to: “Parad siak, dugaruga natan so balikas ya Jehoova. Antokaman so nanlapuan na satan, walaan itan . . . na importante tan aralem a kabaliksan ed dakel ya henerasyon—Jehoova so ngaran na Dios ya angibaki ed Anak to pian dondonen so totoo.”