Bilang Tasi nen Jehova, labalabay min ibagad arum so tungkol ed pananisia mi anggan antoy relihyon da, pero agkami mibibiang ed interfaith odino say pandayew ed Dios ya kaiba iray duma so papanisiaan da. Ibabaga na Biblia ya saray tuan Kristiano et “mantutunosan.” Pian nagawa itan, dapat pareparehoy papanisiaan mi. (Efeso 4:16; 1 Corinto 1:10; Filipos 2:2) Aliwa iyan basta pangipanengneng na maong iran ugali singa say aro, panangasi, tan panamerdona. Saray papanisiaan mi et base ed suston kakabatan ya walad Biblia, ta no andi anggapoy gunggona na pananisia mi.​—Roma 10:2, 3.

 Say pandayew ed Dios kaiba na saray totoon duma so papanisiaan da et inkompara na Biblia ed paniba na duaran klase na ayep ed saksakey ya pako, ta posiblin pakaderalan itan na pananisia na sakey a Kristiano. (2 Corinto 6:14-17) Kanian ag-inabuloyan nen Jesus iray disipulo to ya mibiang ed interfaith. (Mateo 12:30; Juan 14:6) Sakey ni, diad samay Ganggan ya inter na Dios ed si Moises, binawalan to ray Israelita nensaman ya mibiang ed panagdayew na saray kakaabay da. (Exodo 34:11-14) Kanian diad inlabas na panaon et ag-inawat na saray Israelita so iyoopresin tulong na saray dumay relihyon da ta ompan naimpluensyaan da rad palson panagdayew da.​—Esdras 4:1-3.

 On. Singa si apostol Pablo, labay min naamtaan no anto ray nononoten tan papanisiaan na ‘dakel ya totoo’ diad ministeryo mi. (1 Corinto 9:19-22) Diad pitotongtong mid arum, uunoren mi so bilin na Biblia ya ipanengneng so “aralem a respeto.”​—1 Pedro 3:15.