Dakel so turista ya ompapasyar ed kabkabat ya falls diad asingger ed baley na Pagsanjan diad Pilipinas. Ditan binmaleg so tatay kon si Nardo tan mairap so bilay da. Lapud nanenengneng toy kurapsion ed gobierno, diad saray pulis, tan ed trabaho to, ansakit so linawa to tan nagmaliw ya mapasnok.

 Saray ateng ko et pinasyay pantratrabaho da pian pabalegen kamin waloran sanaagi. Maslak et mabayag ya anggapo rad abung ta aasikasoen da ray tanem da ed kapalandeyan. Mabetbet ya sikamin dua nen kuyak Rodelio so natitilak tan sikami lay mangaasikaso ed sarili mi, tan lanang kamin naeerasan. Nen ugugaw kami ni, matalag kamin makapanggalaw. Manlapud pitoy taon mi, amin min sanaagi et mankikimey lad plantasyon. Ambelat iray sasakbaten min sinako-sakon niyog tan ondadalan kamid mainget ya basbas diad palandey. No sobray belat to, igayugoy mi la.

 Bubugbogen kami nen tatay ko tan aanosan mi itan, pero say mas ansakit et no nanenengneng min bubugbogen toy nanay mi. Sasalien min patundaen, pero anggapoy nagawaan mi. Implano mi nen kuyak Rodelio ya pateyen si tatay mi no ombaleg kami la. Labalabay ko ya nawalaan na sakey ya aman mangaaro ed sikami!

 Lapud inkadismayak tan pasnok ko ed inkaruksa nen tatay ko, linmayas ak nen 14 so edad ko. Nanayam ak ed karsada, tan ginapoan koy mangusar na marihuana. Ag-abayag, nantrabaho ak ya bangkero tan iyaakar ko ray turista ed falls.

 Kayari na pigaran taon, nanaral ak ed unibersidad diad Manila. Balet lapud kaukolan koy onlad Pagsanjan no weekend pian mantrabaho, daiset so panaon kon manaral. Agaylay irap tan anggapoy direksion na bilay ko, tan agla napakepa na marihuana so kapagaan ko. Ginapoan koy mangusar na shabu, cocaine, tan heroin. Tan say pandruga et katekep toy seksual ya imoralidad. Apaliberan ak na kairapan ed panagbilay, ag-inkahustisya, tan paniirap. Kabkabusol koy gobierno tan tetetelen ko itan. Intepet kod Dios, “Akin et oniay bilay?” Balet anggapoy naromog kon ebat ed saray relihyon ya nilooban ko. Mas linmoor so panguusar koy druga pian iyamot so pakakadismayak.

 Nen 1972, saray estudyante ed Pilipinas et angorganisa na saray protesta kontrad gobierno. Akila ak ed sakey ed saraman ya protesta, tan magulogulo iman. Dakel so inaresto, tan kayari pigaran bulan, indeklara so martial law ed interon bansa.

 Nanayam ak lamet ed karsada, balet diad saya et lapud takot kod autoridad ta akila ak ed rebelyon. Pian nasuportaan so bisyok, mantatakew ak tan nagmaliw ak ya babayaran ya laki pian mangiter na imoral ya serbisyo ed saray mayaman tan nanlapud arum ya bansa. Anggapoy pibabalik no ompatey ak.

 Legan na satan, si nanay ko tan say yugtan kon laki et ginmapon nanaral na Biblia ed saray Tasi nen Jehova. Manpapasnok ya maong si tatay ko, tan pinoolan to ray literatura da. Balet nantultuloy ira tan nampabautismo ira bilang Tasi.

 Sakey agew, walay Tasi ya akitongtong ed tatay ko nipaakar ed promisa na Biblia ya diad arapen et niwalay tuan hustisya diad interon mundo. (Salmo 72:12-14) Agusgustoan itan nen tatay ko kanian nandesisyon ya manusisa. Diad Biblia et agto labat naamtaan so promisa na Dios nipaakar ed patas ya gobierno noagta pati saray ganggan na Dios ed asawan lalaki tan kaamaan. (Efeso 5:28; 6:4) Ag-abayag, sikato tan amin ya agagik et nagmaliw ya Tasi. Lapud arawi ak ed abung, anggapoy amtak ed saya.

 Nen 1978, linma ak ed Australia. Balet anggan wala ak ed sayan mareen tan mayaman ya bansa, aliwan mareen so nonot ko. Tuloytuloy so bisyok ya alak tan druga. Diad pansampot na satan ya taon, wala ray Tasi nen Jehova ya binmisita ed siak. Agustoan ko so impanengneng da ed siak diad Biblia nipaakar ed mareen ya mundo, balet agko labay so miulop ed sikara.

 Ag-abayag, nambakasyon ak na pigaran simba diad Pilipinas. Imbagad siak na saray agagik ya nansagpotan nen tatay so magmaliw ya maong a too, balet ansakit nin siansiay linawak kanian pinaliisan koy mitongtong ed sikato.

 Impaliwawa ed siak na agik ya bii manlapud Biblia no akin ya say bilay et napnoy irap tan ag-inkahustisya. Pandinayewan koy sakey ya tinedyer ya daiset ni eksperiensya tod bilay pero sarag ton ebatan iray tepet ko. Antis ak ya onalis, inikdan ak nen tatay ko na libron Makapambilay Kayo na Ando lan Ando ed Paraiso diad Dalin. a Imbaga tod siak ya tundaan ko lay mananap na ebat ed arum a paraan tan makatulong ed siak itan ya libro. Imbaga ton anapen ko ray Tasi nen Jehova diad Australia.

 Inunor koy bilin nen tatay ko tan akaromog ak na Kingdom Hall na Saray Tasi nen Jehova ya asingger ed abung ko diad Brisbane. Nampaiyaral ak na Biblia. Diad saray propesiya ed Biblia ya singa saray walad Daniel kapitulo 7 tan Isaias kapitulo 9 et naamtaan ko ya say gobierno na Dios, ya anggapon balot so kurapsion, so manuley ed sikatayo diad arapen. Naaralan ko ya panliketan tayoy Paraiso diad dalin. Labay kon awaten ak na Dios, balet amtak ya kaukolan kon kontrolen so emosyon ko, itundak so bisyok ya druga tan alak pati say imoral ya kabibilay ko. Akisian ak ed biin iyaamong ko, tan tinundaan ko ray bisyok. Nen ombibiskeg lay panagmatalek ko ed si Jehova, impikasik ya tulongan to ak ya manggawa ni arum ya pananguman.

 Kalkalna ya atalosan kon say nanaaralan ko et talagan sarag ton umanen so sakey a too. Ibabaga na Biblia ya no mansagpot tayo, sarag tayon isulong so “balon personalidad.” (Colosas 3:9, 10) Legan kon gagawaen iya, naisip ko ya samay ibabaga da nipaakar ed impanguman na personalidad nen tatay ko et nayarin tua. Imbes ya makalikna ak na pasnok tan panagbusol, labay koy mikareenan ed sikato. Aperdonak ya siansia si tatay ko tan nakal so pambusol ya eem-eman ko manlapu nen ugaw ak.

 Nen kabataan ak ni, lanang kon aaligen so makapuy odino mauges ya kagagawa na arum. Apaneknekan kon tua so simbawa na Biblia​—saray mauges ya kaulop so angibalang ed siak. (1 Corinto 15:33) Balet wala la ray napanmatalkan ya kaarok ed saray Tasi nen Jehova, tan tinulongan da ak ya magmaliw ya maong a too. Tan diad sikara et akabat ko met so maong ya asawak ya si Loretta. Saniba kamin mangibabangat ed arum no panon iran natulongan na Biblia.

 Misalsalamat ak ta lapud Biblia et anengneng koy impanguman nen tatay ko ya agkon balot naisip nensaman​—maaron asawa ed si nanay ko tan mapaabeba tan mareen ya Kristiano. Nen nannengneng kami kayarik ya abautismoan bilang Tasi nen Jehova nen 1987, diad unonan pankanawnawa et nilakap ak nen tatay ko!

 Diad masulok ya 35 a taon et saniban impulong nen tatay tan nanay ko so ilalon iiter na Biblia. Sikatoy makuli tan maasikaso tan kabkabat ya matulong ed totoo. Diad saraman a taon, naaralan kon respetoen tan aroen si tatay ko. Proud ak ya anak to ak! Sikatoy inatey nen 2016, balet maliket ak no nanonotan ko ta amtak ya pareho kamin nanggaway baleg iran pananguman ed personalidad mi legan min iyaaplika iray bangat na Biblia. Anggapo lan balot so naliliknak ya pambusol. Tan misalsalamat ak ya aromog ko so Amak ed tawen, si Jehova a Dios, ya impromisa ton ekalen ton amin so sengegan na paniirap na amin ya pamilya.