Grabe injury to may aka-sparring ko nen asipak so eleng to. Nakokonsiensia ak ya maong tan sankanonot ko no kasin ituloy ko ni martial arts. Anggano agko man ginagala, akin balet et naisip kon itunda iyan sport anta labalabay ko? Antis kon ebatan itan, ipaliwawak nin magano no panon ak ya ginmapo ed martial arts.

 Binmaleg ak ed lugar ya asingger ed Buffalo, New York, U.S.A., diad sakey ya mareen tan debotado ya Katolikon pamilya. Nanaral ak ed saray Katolikon eskuelaan tan nanserbi ak bilang sakristan. Labay na atateng ko ya maong so pansumpalan mi nen atsik kanian pinayagan da ak ya onsali ed saray sports diad eskuelaan mi odino mantrabaho ya part time basta agko napaulyanay grades ko. Kanian anggano uga-ugaw ak ni, naaralan ko lay magmaliw ya disiplinado.

 Nen 17 lay edad ko, ginapoan koy manaral na martial arts. Pigay taon ya taloy oras ak ya manprapraktis kada agew, ya anem agew kada simba. Tan diad kada simba, pigay oras ko met ya iprapraktis ed nonot ko iray teknik tan saray galaw na laman, tan manbabantay ak met na saray video pian lalo ak nin ondunong ed martial arts. Labalabay koy manpraktis ya akapereng anggano walay awit kon armas. Sarasarag kon palduaen so sakey ya tabla odino brick diad sakey labat ya poniti. Nagmaliw ak ya marundunong ed sayan sport tan dakel so naawat kon trophy. Say martial arts so sankaimportantian ed bilay ko.

 Nabot kon siansia iray papangarapen ko ed bilay. Wala ray award ko nen nan-graduate ak ed unibersidad. Nantrabaho ak ed sakey ya kompanya bilang computer systems engineer. Dakel so benepisyo ya naaawat ko ed kompanya, wala met lay sarilik ya abung, tan walay girlfriend ko. Singano wala lad siak ya amin pero wala ni ray importantin tepet ko ed bilay ya agni naebatan.

 Pian naalmok so ebat ed saray tepet ko, ginapoan koy mimisa ya mamidua ed sakey simba tan manpikasi ed Dios ya tulongan to ak komon. Aminsan, walay akatongtong kon kaarok tan manlapu lad saman et anguma-uman so bilay ko. Tinepetan ko: “Kasin naisip mo la no akin ya wadia tayod mundo?” Insan kuan ko: “Dakdakel so problema tan ag-inkahustisya ya nagagawa!” Imbaga tod siak ya ontan met iray tepet to nensaman tan aromog to ed Biblia iray makakombinsin ebat. Inikdan to ak na libro ya say title to et You Can Live Forever in Paradise on Earth. a Imbaga tod siak ya abayag lan iyaaralan na saray Tasi nen Jehova. Diad unaan, singa manaalangan ak ya basaen man ya libro ta nanlapud arum ya relihyon. Balet lapud labalabay kon naamtaan iray ebat ed amin ya tepet ko, sinalik ya amtaen no kasin duga so ibabangat na saray Tasi.

 Pambiliban koy ibabangat na Biblia. Naaralan ko ya say talagan gagala na Dios parad too et manbilay ya anggapoy anggaan diad paraison dalin, tan agbalot anguman itan ya gagala To. (Genesis 1:28) Abigbigla ak nen abasak ed mismon King James version ya Biblia’k so ngaran na Dios ya Jehova, tan naamtaan kon atan so ngaran to may Dios ya bibitlaen ko ed samay dasal ya “Ama Mi.” (Salmo 83:18; Mateo 6:9) Naamtaan ko met so rason no akin ya temporaryon aabuloyan na Dios so paniirap na totoo natan. Malinlinew so amin ya nanaaralan ko! Kanian agaylay liket ko.

 Agkon balot nalingwanan imay nen first time koy inmatendi ed aral na saray Tasi nen Jehova. Makaaro iran amin tan labay dan naamtaan so ngaran ko. Diad saman et walay espisyal ya paliwawa nipaakar ed no anton klase na pikakasi so dedengelen na Dios. Talagan agusgustoan ko iman ya paliwawa, lalo la ta abayag ak lan manpipikasi ed Dios ya tulongan to ak komon. Insan inmatendi ak met ed Memoryal na impatey nen Jesus. Anengneng ko ed saratan ya aral ya anggan saray ugugaw et nenengnengen da ed Biblia da iray teksto ya babasaen. Diad unaan, agko amta no panon ya anapen iray teksto, balet tinulongan ak na saray Tasi no panon ya usaren so Biblia.

 Legan ak ya onaatendi ed saray aral, mas onaaralem so apresasyon ko ed malinlinew ya panagbangat na saray Tasi. Dakel so nanaaralan ko ed saray aral tan lanang ak ya napapaseseg tan naiinawaan. Insan da ak inopresian ya man-Bible study.

 Anengneng ko so baleg ya pidumaan na saray Tasi nen Jehova ed samay datin relihyon ko. Anengneng ko ya walay pankakasakey na saray Tasi tan talagan gagawaen day anggaay nayarian dan paliketen so Dios. Akombinse ak ya nanengneng ed sikara imay pakabidbiran na tuan Kristiano, walay panangaro da ed sakey tan sakey.—Juan 13:35.

 Diad tuloytuloy ya panaaral ko na Biblia, dakdakel so inuman kod sarilik pian naunor koy estandarte na Biblia. Balet singa agko sarag ya itunda so martial arts. Labalabay koy manpraktis tan onsali ed saray kompetisyon. Nen imbagak ed samay Tasi ya mangiyaaral ed siak na Biblia so naliliknak, maar-aro to ak ya pinaseguroan, “ltuloy mo labat so manaral na Biblia, amtak ya makapandesisyon ka lanlamang na duga.” Aman so kakkaukolan kon narengel. Nen tuloytuloy kon aaralen so Biblia, lalon labalabay ko ya paliketen si Jehova a Dios.

 Anguma-uman so bilay ko lapud samay agawa ya abitlak ed gapo, nen asipak ed eleng imay ka-sparring ko. Lapud saman et apaisip ak no kasin sarag koy magmaliw ya mareen ya patumbok nen Kristo no ituloy koy martial arts. Naaralan ko ya impasakbay na Isaias 2:3, 4 ya saramay ontutumbok ed saray instruksion nen Jehova et ‘agla ra manaral a miguerra.’ Tan imbangat itayo nen Jesus ya agtayo nepeg ya magmaliw a bayolenti, anggano makapuy so panagtrato na arum ed sikatayo. Kanian, tinaynanan koy sport ya labalabay ko.

 Kayari to, inunor koy bilin na Biblia ya “ipasal moy sarilim, a say gagalam et nipatnag moy debosyon ed Dios.” (1 Timoteo 4:7) Amin ya panaon tan sagpot ya datin uusaren ko ed martial arts et uusaren ko la natan parad espiritual iran kimey. Aglabay na girlfriend ko iray nanaaralan kod Biblia, kanian nan-break kami. Abautismoan ak bilang sakey ya Tasi nen Jehova nen Enero 24, 1987. Ag-abayag, nanlingkor ak bilang full-time ya ministro ya uusaren koy panaon ko pian ibangat ed arum so nipaakar ed Biblia. Manlapu lad saman, tuloytuloy ak lan nanlingkor ya full-time tan walay panaon ya nanlingkor ak met ed world headquarters na Saray Tasi nen Jehova diad New York, U.S.A.

 Natan ya naamtaan ko lay katuaan nipaakar ed Dios, nalmok lay abayag ko lan aanapen. Aliwan singa dati ya walay kulang ed bilay ko, natan et wala lay gagala na bilay ko tan ilalok ed arapen, tan mas maliket ak. Siansia nin nai-enjoy koy regular ya pan-exercise, balet aliwa lan say panangipasal ed laman so sankaimportantian ed bilay ko natan. Say panlingkor ed si Jehova a Dios so manuna ed bilay ko.

 Nen wala ak nid martial arts, alerto ak ya lanang ed saray totoo ya walad kaliberliber ko ta sankanonot kon lanang no panon kon idepensay sarilik no walay onataki ed siak. Natan et alerto ak nin siansia ed saray totoo ed kaliberliber ko, balet duma lay rason—pian natulongan ko ra. Atulongan ak na Biblia pian magmaliw ya maiter tan mas maaron asawa ed magangganan asawak, si Brenda.

 Dati labalabay koy martial arts, balet mas balibali insalat kod satan. Oniay marakdakep ya impangibaga na Biblia: “Say panangipasal ed laman et makagunggona na daiset, balet say debosyon ed Dios et makagunggona ed amin a bengatla, lapud isisipan na satan so bilay natan tan say bilay diad arapen.”—1 Timoteo 4:8.