“Abayag Ko Lan Tatalaranan so Itawag Yo”
Say sankaunaan ya impan-telephone witnessing nen Ed tan say asawa ton si Jennie et nen 2010. a “Diad saman, agkon talaga iman agustoan,” so kuan nen Jennie. “Kuan kod si asawak, ‘Agko lan balot iman naulit!’” Pareho ira nen Ed na alikna. Kuan to, “Agko labalabay so makaawat na tawag manlapud saray telemarketer, kanian agko naimadyin so sarilik ya manpulong ed telepono.”
Insan sinmabi COVID-19 kanian tinmunda iray Tasi nen Jehova ya manpulong ed kaabungan. Balet lapud uunoren day ganggan nen Jesus ya ipulong so maong a balita, intultuloy day nampulong, kaslakan et panamegley na letter writing tan telephone witnessing. (Mateo 24:14; 28:19, 20) Saray Kristianon pantitipon balet, kaiba la ray pantitipon parad lawak na kimeyan et gagawaen panamegley na videoconference. Aminsan, nampakpel si Ed ya salien lamet so man-telephone witnessing. Antoy alikna to diad samay unonan intawag to? “Man-nerbiyos ak ya maong, kanian nampikasi ak!” so kuan to. “Insan ak la tinmawag. Diad saman et akabat koy Tyrone.” b
Manaayam si Tyrone tan say asawa ton si Edith ed sakey a baryo diad Kentucky, U.S.A. Makapuy lay pakanengneng nen Tyrone tan 83 lay taon to. Anggaman ontan, inawat toy inyopresi nen Ed ya panangiyaral na Biblia. Manguusar na magnifying glass si Tyrone no babasaen toy aaralen da nen Ed, tan regular iran manaaral na Biblia diad telepono.
Kayari na manga sakey bulan, ginapoan met la nen Tyrone tan Edith so onatendi ed saray aral diad asingger ya kongregasyon. Balet lapud anggapoy Internet da, ondedengel irad saray aral panamegley na telepono. Akin et nagmaliw ya interesado si Edith?
Legan ya mani-study si Tyrone, narerengel nen Ed tan Jennie si Edith ya tutulongan toy Tyrone ya onebat tan anapen iray teksto ed Biblia ra. Balet ta anggad man met labat so gagawaen to. “Nalikas mod boses to ya maer-ermen,” so kuan nen Jennie, “Balet ta agmi amta nen Ed no akin.”
Manpupulong si Ed tan Jennie panamegley na telepono
Aminsan, naisip nen Jennie ya kumustaen si Edith. Kanian diad matukoy ya panaon, imbaga tod Ed ya sikatoy mitongtong ed telepono. “Tyrone,” kuan to, “Narerengel koy boses na asawa yo, wala komoy labay kon ipabasa ed sikara ya sakey ya teksto tan sarag da met so mankomento.”
Aga akasel ya tampol si Edith, insan kayari to et nansalita. “Labalabay ko lay mitongtong ed sikayo,” so kuan to ed makalkalnan boses. Insan to imbaga: “Tasi nen Jehova ak. 40 years ak lan inactive.”
Abigbigla si Jennie. Kanian eksayted ton imbaga, “Kaagian mi ka manaya!” Insan ira manakis ya dua.
Ag-abayag, inikdan nen Ed si Edith na kopya na brosyur ya Pawil Ka Lad si Jehova. Kayari na pigaran simba, naimano nen Ed tan Jennie so balibalin pananguman ed si Edith. “Nen inmuna, nalikas mod boses to ya maer-ermen,” so kuan nen Ed. “Balet natan et malikeliket la.” Inmaligwas ed espiritual si Edith tan malikeliket ya manlilingkor lamet bilang manangipalapag na maong ya balita. Abautismoan so asawa to bilang sakey ya Tasi nen Jehova nen Hulyo 2022.
No nanonotan nen Ed so datin liknaan to ed panagpulong panamegley na telepono, nanonotan to met imay impantongtong da nen Tyrone. Kayarin imbasa nen Ed so Juan 6:44 ed sikato tan impaliwawa to ya iyaasingger nen Jehova iray totoo ed katuaan, inmabobon si Tyrone tan imbaga to: “Abayag ko lan tatalaranan so itawag yo.” Maliket met si Jennie ta akapampakpel ira nen asawa to ya manpulong ed telepono. “Talagan bendisyonan nen Jehova iray pansasagpot tayo,” so kuan to.
