Si Marta, ya sakey ed saray Tasi nen Jehova ed Guatemala et manaaral na lenguahen Kekchi pian nipulong toy mensahe na Biblia ed saray totoon mansasalita na satan ya lenguahe. Aminsan, walay naimano ton laki ya paalis ed ospital. Diad itsura to, inisip nen Marta ya saman ya laki et tagad baryo na Kekchi ya walad mapalandey ya pasen tan mataltalag ya napulongan na saray Tasi nen Jehova. Inasinggeran nen Marta iyan laki tan kinatongtong to diad lenguahen Kekchi anggaman daiset labat so amta to ed satan ya lenguahe.

 Inyopresi nen Marta ed sayan laki so panaral na Biblia. Mabulbulos ton inawat itan balet imbaga tod si Marta ya anggapoy ibayar to. Impaliwawa nen Marta ya saray Tasi nen Jehova et libren mangiyaaral na Biblia ed saray totoo. Imbaga to met ed sayan laki ya sarag day manaral na Biblia panamegley na cellphone pian makapila met so interon pamilya to. Pinmayag imay laki. Lapud makasalita tan makabasa na Spanish imay laki, inikdan nen Marta na New World Translation of the Holy Scriptures diad lenguahen Spanish. Inikdan to met na kopya na libron Antoy Ibabangat na Biblia? diad lenguahen Kekchi. Diad tinmumbok ya simba, ginmapon manaral na Biblia panamegley na cellphone imay laki, kaibay asawa to, tan duaran ananak da. Mamidua ran manaral kada simba. “Lapud agak masyadon makasalita na Kekchi,” kuan nen Marta, “Spanish so lenguahen uusaren mi no manaaral kami na Biblia, tan ipapatalos na samay laki ed asawa to so aaralen mi. Natatalosan na ananak da so Spanish.”

 Samay laki et pastor ed simbaan da. Ibabangat to met ed saray membro ra so nanaaralan tod Bible study da. Agustoan da kanian labay da met ya naamtaan no iner so pakakaaralan tod saratan ya bangat. Imbaga tod sikara ya sikatoy manaaral na Biblia, ya anggad akila la rad sikato pian manaral met na Biblia. Ag-abayag, manga 15 so mantitipon kada simba pian manpaiyaral na Biblia ed si Marta panamegley na cellphone. Sinmabi panaon, nankarga ra na mikropono ed abay na cellphone pian narengel na amin.

 Nen imbaga iya nen Marta ed saray elder ed kongregasyon da, sakey ed sikara so linma ed saman ya baryo. Inimbitaan to ra ya onatendi ed publikon paliwawa na manangasikaso na sirkito a diad sakey ya baryo ya say kaarawi to et sakey oras ya biahe no manluganan insan duay oras ya akaren. Labinpito ya iyaaralan na Biblia so inmatendi.

 Kayari pigaran simba, say manangasikaso na sirkito tan arum nin Tasi et linma ed baryo na saray iyaaralan na Biblia tan apat agew irad man. Kada kabuasan, manbabantay iray video ya nibased Biblia ya walad jw.org diad lenguahen Kekchi, tan aaralen day brosyur ya Siopa ray Manggagawa na Linawa nen Jehova Natan? Kada ngarem et manbabantay iray video ed JW Broadcasting. Inyuksoy met na manangasikaso na sirkito ya kada sakey ya estudyante et walay mangiyaral ed sikato na Biblia.

 Legan na saman ya apatiran agew, nampulong met iray Tasi ed saray baryo ya asingger ed Kekchi tan inimbitaan da ray totoo parad espisyal ya aral. Diad satan ya aral, inopresian na agagi so 47 ya inmatendi na panangiyaral na Biblia. Labinsakey ya pamilya so angawat ed satan.

 Kayari pigaran bulan, inyuksoy na saray elder so sakey ya pantitipon diad baryo na Kekchi kada simba. Natan et manga 40 so regular ya onaatendi ed aral. Tan nen sinelebraan na agagi ditan so Memoryal na impatey nen Jesus, malikeliket ira ta 91 so inmatendi.

 No nanonotan nen Marta iyan eksperiensya to tan no panon iman ya ginmapo, kuan to: “Misalsalamat ak ed Aman Jehova. No maminsan, pakaliknak et daiset lay nagawaan ko. Balet sarag itayon usaren na Dios pian tulongan so arum. Amta nen Jehova no antoy walad puso na saramay manaayam ed saraman ya baryo, tan inyasingger to ra ed saray totoo to. Talagan inar-aro ira nen Jehova.”