Naisip mo la iratan? Diad tua, iisipen met na totood interon mundo iray importantin tepet ed bilay. Naromog mo kasi ray ebat?

Minilyon so mangibagan, “On!” Akin ey? Lapud aromog dad Biblia iray ebat ed tepet da. Labay mon naamtaan no antoy ibabaga na Biblia? Seguradon minabang ka ed libren panagaral na Biblia ya iyoopresi na Saray Tasi nen Jehova. *

Tua, no tepetan mo ray totoo no labay day manaral na Biblia, wala ray mangibagan: “Busy ak.” “Mairap.” “Ompan agko lanlamang natumbok.” Balet wala ray labay day manaral na Biblia. Nengnengen pa irayan alimbawa:

• “Akaloob ak lad simbaan na Katoliko tan Protestante, templo na Sikh, monasteryo na Budista, tan nanaral ak na theology ed sakey ya unibersidad. Balet dakel so tepet kon agnaebatan. Aminsan et walay Tasi nen Jehova ya tinmoktok ed abung mi. Panbiliban ko ray ebat to ya base ed Biblia, kanian inawat koy panagaral na Biblia.”​—Gill, England.

• “Dakel so tepet kod bilay, tan agak kontentod ebat na pastor mi. Balet walay Tasi nen Jehova ya naebatan to ray tepet ko, tan Biblia labat so inusar to. Nen tinepetan to ak no labay kon mas dakel ni naaralan ko, inmesel ak ya tampol.”​—Koffi, Benin.

• “Labay kon naamtaan no antoy kipapasen na inaatey. Manisia ak ya sarag na inaatey ya sakitan iray mabilay, balet labay kon naamtaan no antoy ibabaga na Biblia. Kanian nampaiyaral ak na Biblia ed kaarok ya Tasi.”​—José, Brazil.

• “Sinalik ya basaen so Biblia balet agko natalosan. Insan wala ray Tasi nen Jehova ya linmad abung mi tan impaliwawa day pigaran propesiya ed Biblia. Labay ko ni makaaral.”​—Dennize, Mexico.

• “Iisipen ko no kasin inaro ak na Dios. Kanian nandasal ak ed samay Dios ya ibabaga na Biblia. Kaimbuasan, tinmoktok iray Tasi ed abung mi tan inawat koy panagaral na Biblia.”​—Anju, Nepal.

Ipapanonot na saratan ya eksperiensya imay imbaga nen Jesus: “Maliket iramay manonot ed espiritual a pankaukolan da.” (Mateo 5:3) On, kaukolan na too ya kabaten so Dios. Tan Dios met labat so makapangiter ed satan ya pankaukolan panamegley na Salita to, say Biblia.

Balet panon ya gagawaen so panagaral na Biblia? Panon kan minabang? Naebatan irayan tepet diad ontumbok ya artikulo.