PIGARAN taon lay apalabas, main-inaway bilay di Roald tan Elsebeth diad Bergen, say komaduan sankabalegan ya syudad diad Norway. Sayan sanasawa ya asingger lan man-50 años ed saman et masetseseg diad kongregasyon, kaibay anak dan si Isabel tan Fabian. Elder si Roald tan payunir si Elsebeth, tan makukulin manangipalapag si Isabel tan Fabian.

Balet nen Setyembre 2009, nandesisyon iyan pamilya ya salien day manpulong ya sakey simba ed nisulinek ya lugar. Kanian si Roald tan Elsebeth kaibay Fabian, ya 18 años tod saman, et nambiahe paonlad Nordkyn, diad probinsya na Finnmark, a walad bandad tagey na Arctic Circle. Nampulong irad baryo na Kjøllefjord, kaiba iray agagin namboluntaryo met ditan. “Diad gapo ni labat na saman ya simba,” so inkuan nen Roald, “malikeliket ak ta nanggawa ak na paraan pian makapibiang ak ed sayan sakey simban espisyal ya kimey.” Balet diad saman lanlamang ya simba, satan ya liket to et biglan asalatay paga. Antoy agawa?

Oniay istorya nen Roald: “Bigla kamin tinepetan nen Mario ya payunir ed Finnmark no labay mi manboluntaryo ed baley na Lakselv pian ontulong ed kongregasyon ya 23 so manangipalapag.” Ag-amta nen Roald so iyebat to. Oniay rason to: “Nononoten mi lan talaga nen Elsebeth so pambulontaryod lugar ya baleg so pankaukolan—balet diad arapen ni, no anggapo lad pudir mi ray anak mi.” Balet anggano pigpigaran agew labat di Roald ya nampulong ed sayan nisulinek ya lugar, anengneng ton labalabay na saray taga diman so manaral nipaakar ed si Jehova. Natan da la kakkaukolan so tulong, aliwan diad arapen ni. “Lapud saman ya tepet nen Mario, akonsiensia ak tan agko ni ingen akaugipan na pigaran labi,” so kuan to. Intagar nen Mario si Roald tan say pamilya to ed Lakselv, manga 240 kilometro so kaarawi tod Kjøllefjord. Labay nen Mario ya nanengneng dan mismo imay melag ya kongregasyon diman.

Kasabi da diman, inliber ira nen Andreas, sakey ed saray duaran elder ed Lakselv, pian nanengneng day teritorya tan say Kingdom Hall. Maar-aro iran in-welcome na kongregasyon tan imbaga dad si Roald tan Elsebeth ya malikeliket ira no makapanboluntaryoy pamilya ra diman. Makakaimis ya imbaga nen Andreas ya wala lay impa-eskedyul ton job interview parad si Roald tan Fabian! Anto kasi gawaen da?

Nen unona, say reaksion nen Fabian et: “Agkon balot ninonot so manayam dia.” Singa agto nayarian ya taynan iray maapit a kaaro tod kongregasyon da tan agto sarag so manayam ed melag a baley. Insan, agto ni asumpal so panaaral to pian magmaliw ya electrician. Balet nen si Isabel (say edad tod saman et 21) so tinepetan no labay to, inyebat to: “Abayag ko la ’tan ya labay a gawaen!” Balet oniay intuloy to: “No nononoten koy iyalis mi, naisip ko, ‘Ayos labat kasi? Ompan nailiw ko ray kakaarok. Mas marakep amo no dia ak labat ed kongregasyon mi ta agak nairapan.’” Si Elsebeth balet ey? “Say aliknak et inikdan kami nen Jehova na asainmin,” so kuan to, “balet sankanonot ko may kakkapan-renovate ya abung mi tan amin ya apabrika mid 25 taon.”

Nen asumpal la may sakey simba, sinmempet lad Bergen si Roald tan say pamilya to, balet sankanonot da nin siansia iray agagid Lakselv, manga 2,100 kilometro so kaarawi tod abung da. “Agmanunday pikakasik ed si Jehova,” so kuan nen Elsebeth, “tan tuloytuloy ni komunikasyon mi na saray kakaaro mi [diad Finnmark], manpapawitan kami litrato tan eksperiensya.” Imbaga nen Roald: “Kaukolan ko nin nonoten a maong so iyalis mi. Sakey ni, nepeg kon ikonsidera no kasin praktikal. Pangalaan mi pambilay mi ey? Aminpigan impikasik itan ed si Jehova tan nantongtongan min sankapamilya. Tan impanon kod saray eksperiensyadon agagi.” Oniay natandaan nen Fabian: “Legan kon nononoten itan, diman ko namomoria ya anggapon talagay rason kon onandi. Mabetbet ak ya nampikasid si Aman Jehova, kanian ag-abayag et labay ko lay manboluntaryo diman.” Si Isabel ey? Pian niparaan toy sarili to ed posiblin iyalis da, nampayunir diad mismon lugar da. Diad samay anem bulan ya impanpayunir to, seneryoso to met so personal a panagaral toy Biblia, kanian alikna ton sarasarag to lay onalis.

Sanen talagan labalabay la na sayan pamilya so ontulong ed lugar ya baleg so pankaukolan, nanggawa ray paraan pian nagawaan da itan. Anggano labalabay nen Roald so trabaho to tan baleg so sueldo to, kinerew tod amo to ya manbakasyon na sakey taon. Balet, imbaga na amo to ya sarag toy manpart-time—duaran simban mantrabaho, insan anemiran simba ya bakasyon. “Tua, baleg so abawas ed sueldok, balet maabig so nansumpalan to ’ya,” so kuan nen Roald.

Oniay inkuan nen Elsebeth: “Impananap to ak nen asawak na abung ed Lakselv tan impananap to ak met na manrenta ed abung mid Bergen. Abayag kami met ya nananap, ya anggad akalmo kamin siansia. Agmet abayag et akalmo met iray anak mi na part-time ya trabaho,” so kuan to, “kanian makakatulong irad gastos mid panangan tan gasolina.”

Imbaga nen Isabel: “Lapud melmelag imay baley ya inalisan mi, nairapan ak ya maong ya mananap na trabahon pansuportak ed pampapayunir ko. Wala ray panaon ya nanaekalan ak lay ilalo.” Anggaman  ontan, diad samay inmunan taon, si Isabel et aka-siameran part-time ya trabaho ya melag labat so sueldo, balet dugaruga ed gastos to. Si Fabian ey? “Pian nasumpal koy panaaral kon magmaliw ya electrician, kaukolan koy mantrabaho bilang apprentice. Kanian diad Lakselv ko la ’tan ginawa. Ag-abayag, akapasa ak ed eksamin tan akalmo ak na part-time bilang electrician.”

Labay met nen Marelius tan say asawa ton si Kesia so manlingkor ed lugar ya mas baleg so pankaukolan parad manangipalapag. Oniay inkuan nen Marelius ya 29 años to la natan: “Lapud saray paliwawa tan interbio ed kombension nipaakar ed panagpayunir, apaseseg ak ya palaknaben so panaglingkor ko.” Balet, parad si Kesia ya 26 años to la natan, singa agto nayariay onarawid pamilya to. “Agkon balot ninonot so onarawid saray inad-arok,” so kuan to. Sakey ni, mantratrabahon full-time si Marelius pian nabayaray abayes dad bangko. Imbaga to: “Diad tulong nen Aman Jehova tan lapud dakel ya pikakasi, akapanggawa kami paraan.” Unona, mas dakel a panaon so inusar dad panagaral na Biblia. Insan nen kien et inlako da may abung da, nan-resign irad trabaho da, tan nen Agosto 2011 et inmalis irad syudad na Alta a walad bandad amianen na Norway. Pian nasuportaan day pampapayunir da diman, nantrabahoy Marelius bilang accountant tan si Kesia et diad sakey a shop.

Apakiwas so sanasawan si Knut tan Lisbeth, a natan et 30 años da lan masulok, ed saray eksperiensyad Yearbook nipaakar ed saray nanlingkor ed lugar a mas baleg so pankaukolan parad manangipalapag ed Panarian. “Lapud sarayan eksperiensya, ninonot mi manlingkor ed arum a bansa,” so kuan nen Lisbeth, “balet manduaruwa ak ta liknaen kon ag-itan nayarian na ordinaryon toon singa siak.” Anggaman ontan, nanggawa ray paraan pian nadampot day kalat da. Inkuan nen Knut: “Inlako mi may apartment mi tan akiayam kamid nanay ko pian makatipon kami. Insan pian walay ideya mid panlingkor ed arum a bansa, inmalis kamid English congregation ed Bergen. Sakey taon mi diman tan akiayam kamid katulangan ko.” Ag-abayag, akaparaan lay Knut tan Lisbeth ya manboluntaryod arum a bansa, diad tua et arawin talaga—diad Uganda! Tinaon iran onsesempet ed Norway pian mantrabaho na duay bulan, diad ontan et walay pansuporta dad pampapayunir dad Uganda.

Panon ya abendisyonan irayan masakripisyon agagi? Oniay inkuan nen Roald: “Mas dakel so panaon min sankakaiba bilang pamilya diad sayan nisulinek a lugar nen say diman ed Bergen. Mas inmapit kamid sakey tan sakey. Bendisyon met so inyaligwas ed espiritual na ananak mi.” Inyarum to ni: “Agmi la natan pampapagaan iray materyal a bengatla. Amoria min agmet iratan manaya tanto importante.”

 Naisip nen Elsebeth ya kaukolan toy manaral na sananey ya lenguahe. Akin? Sakop na teritorya na Lakselv congregation so lugar ya Karasjok a ditan so panaayaman na dakel a Sami—katutubon totoo diad bandad amianen na Norway, Sweden, Finland, tan Russia. Pian mas epektibo iran napulongan nen Elsebeth, nanaral na salitan Sami. Natan et makakapitongtong lad sikara diad satan a lenguahe. Kasin maliket ed balon teritorya to? Oniay makakaimis ton imbaga: “Anemiray iyaaralan kod Biblia. Talagan malikeliket ak dia!”

Insalaysay nen Fabian, ya natan et payunir la tan ministeryal a lingkor, ya pinaseseg dan dua nen Isabel so taloran tinedyer ed balon kongregasyon da ya mibiang ed saray kimey ed kongregasyon. Natan et aktibo la ran talo ed ministeryo. Diad tua, say duara ed sikara et nampabautismo tan nan-auxiliary payunir nen Marso 2012. Amay sakey balet ya datin kalkalna lan onaarawid katuaan et akisalamat ed si Fabian tan Isabel lapud tinulongan dan “mansiansiad katuaan.” Inkuan nen Fabian: “Apabiskeg ak ed satan ya imbaga to. Makapalikliket so ontulong!” Oniay komento nen Isabel: “Diad sayan asainmin mi, talagan ‘atawayan tan anengneng kon si Jehova et maong.’” (Sal. 34:8) Inyarum to: “Talagan enjoy so manboluntaryo dia!”

Mas simpli panagbilay natan di Marelius tan Kesia, balet mas maliket ira. Wala lay 41 a manangipalapag diad samay namboluntaryoan dan kongregasyon ed Alta. Imbaga nen Marelius: “No nonoten ko, makapaseseg a talaga no panon ya anguma-uman so bilay mi. Misalsalamat kamid si Jehova lapud makakapanpayunir kami dia. Anggapo lay miparad saya.” Inyarum nen Kesia: “Naaralan koy manmatalek a maong ed si Jehova, tan agto kamin balot pinaulyan. Lapud arawi kamid pamilya mi, mas papablien ko la natan so panaon ya nakaiba ira. Agkon balot pagbabawiay desisyon mi.”

Komusta met si Knut tan Lisbeth ed Uganda? Oniay kuan nen Knut: “Abayag kami met ya nan-adjust ed balon lugar tan kultura. No maminsan problemay danum, silew, tan misasakit so eges mi—balet ayos labat ta agmi nasabaay iyaaralan mi na Biblia!” Inkuan nen Lisbeth: “Manga 30 minuto labat manlapud panaayaman mi, wala ray teritoryan agnin balot apulongan. Balet mabasay Biblia iray tagad ’man, kanian no onla kamin manpulong ed lugar da, sikara lay mangibagan iyaralan mi ra. Anggapoy makapiparad liket ed pambangat na mensahe na Biblia ed sarayan mapaabeban totoo!”

Seguradon malikeliket so Lider tayon si Kristo Jesus diad pakakanengneng to ya samay inggapo ton panagpulong a kimey et lalo nin onlalaknab diad interon mundo! On, ipapasen na amin a lingkor na Dios a baleg ya liket so mabulos a pangiyapay ed inkasikara pian gawaey ganggan nen Jesus ya ‘ibangat so totoo ed amin a nasyones pian magmaliw iran disipulo to.”—Mat. 28:19, 20.