Inyanak ak ed Mulhouse, northeastern France, diad melag a komunidad na saray miuupan trabahador tan kabkabat ya lugar a napnoy kaugsan. Nen ugaw ak ni, wala ray nanenengneng kon pamilya ed lugar mi ya grabe no mankokolkol ira. Diad pamilya mi, abebbebay pakanengneng ed saray bibii tan mataltalag ya aalaen so opinyon da. Say nibangat ed siak, say bii et para labat ed kusina, ya manserbi ed lalaki tan ananak.

Aliwan maliket so impanugaw ko. Nen samploy taon ko, inatey so tatay ko lapud sobran panag-inum na alak. Kayari limay taon, walay kuyak ya nambikkel. Diad saman met ya taon, anengneng kon walay pinatey legan na kolkolan ed pamilya mi, tan ataktakot ak ya maong. Imbangat ak na saray kapamilyak no panon so manbemben na kutsilyo tan paltog tan milaban no kaukolan. Lapud ugaw ak ni tan maguloy nonot ko, nampa-tattoo ak ed interon laman ko tan naaralan koy oninum.

Nen 16 taon ko, onaabot ed 10 anggad 15 bote na beer so iinumen ko kada agew, tan ag-abayag et ginapoan ko met lay mandruga. Pian walay isaliw koy alak tan druga, manlalako ak na scrap ya balatyang tan mantatakew ak. Nen 17 taon ko, asalik lay apriso. Ami-amin et 18 so sentensia ed siak lapud panagtakew tan arum nin krimen.

Nen masulok ya 20 taon ko, lalon linmoor so situasyon ko. Mansusungap ak na anggad 20 stick na marihuana kada agew tan manguusar ak met na heroin tan arum nin klase na druga. Aminpigan inatey ak lawari lapud nasosobraan koy panagdruga. Ginmapo ak met lan manlako na druga, kanian lanang ya walay awit kon kutsilyo tan paltog. Aminsan, walay lakin pinaltog ko, balet maong labat ta say bala et kinmena ed buckle na sinturon to! Nen 24 taon ko, inatey so nanay ko, tan mas naaruman so pasnok ko. No saray totoon manaakar ed karsada et nanengneng dan nitan ak la, ombaliw irad biek lapud natatakot ira. Lanang ya walay nakakalaban ko, kanian sinimba ak lawarin walad presinto odino diad ospital pian manpadait na saray sugat ko.

Nen 28 taon ko, angasawa ak. Nayarin naisip yo la ya agko rerespetoen so asawak. Iinsultoen tan sasakitan ko. Agkamin balot mantutulongan ya sanasawa. Say amtak, duga la basta lanang kon naiikdan na alahas ya tinakew. Insan, walay ag-iilaloan ya agawa. Ginmapon nanaral na Biblia so asawak ed saray Tasi nen Jehova. Diad unaan ni labat ya impanaral da, intunda to lay mansigarilyo,  agto la awaten iray kuartan tinakew, tan impawil to iray alahas ya inter ko. Masyadoy pasnok ko. Binawalan kon manaral na Biblia tan bubugaan koy asewek na sigarilyo so lupa to. Balawbalawen ko met ed saray kakaabay mi.

Aminsan ya labi, lapud abuek ak ya maong, apoolan koy apartment mi. Siak tan say limay taon ya anak mi et inligtas nen asawak. Nen amawmawan ak la, akonsiensia ak ya maong. Pakaliknak et agak lan balot naperdona na Dios. Anonotan ko may imbaga na sakey a pari ya saray mauges et onlad impierno. Anggan samay nampanengnengan kon doktor ed isip et kuan tod siak: “Anggapo lay pag-asam ya manguman!”

Lapud apoolan so panaayaman mi, akiayam kamid abung na katulangan ko. Nen binisita na saray Tasi so asawak, tinepet kod sikara, “Naperdona ak ni kasi na Dios ed amin ya kasalanan ko?” Impabasa dad siak so Biblia diad 1 Corinto 6:9-11. Akalista ditan iray kagagawa ya aglabay na Dios, balet inkuan to met: “Ontan so arum ed sikayo nensaman.” Impaseguro na satan ya sarag koy manguman. Insan imbaga na saray Tasi ya inaro ak na Dios tan imbasa dad siak so 1 Juan 4:8. Apabiskeg ak, kanian impaiyaralan ak na Biblia ed sikara ya mamidua ed sakey simba, tan ginapoan koy onlad saray pantitipon da. Lanang ak lan manpipikasi ed si Jehova.

Kayari sakey bulan, intundak lay druga tan alak. Balet singa walay manlalaban ed loob na laman ko! Aliwliwa ray nakukugip ko, naynay ya ansakit so ulok, ansakit so lamalaman ko, tan nambabangil ni naliliknak lapud impangitundak ed bisyok. Anggaman ontan, aliknak ya singa bebembenan nen Jehova so limak tan papabiskegen to ak. Tinulongan ak na Dios a singa ginawa tod si apostol Pablo, ya oniay insulat to: “Ta diad amin a bengatla et ombibiskeg ak diad panamegley na samay mangiiter ed siak na pakayari.” (Filipos 4:13) Asabi panaon, nitundak met lay panagsigarilyo.​—2 Corinto 7:1.

Diad tulong na Biblia, naayos koy bilay ko tan nagmaliw ya maliket so pamilyak. Anguman so panagtratok ed asawak. Rerespetoen ko la natan tan ibabagak lay “ipangasim pa” tan “salamat.” Nagmaliw ak met lan responsablin ama ed anak mi. Kayari sakey taon na panaaral koy Biblia, nandesisyon ak ya lingkoran si Jehova tan nampabautismo ak, a singa ginawa nen asawak.

Segurado ak ya saray prinsipyo ed Biblia so angiligtas ed bilay ko. Anggan saray aliwan Tasi ya kapamilyak et inamin da ya no aliwan lapud saratan, ompan inatey ak la lapud inkaadik ed druga odino pilalaban.

Anguma-uman so bilay na pamilyak lapud saray bangat na Biblia ya angipalinew ed siak na saray responsabilidad ko bilang asawa tan ama. (Efeso 5:25; 6:4) Mantutulongan kami la natan bilang pamilya. Tan imbes ya para labat ed kusina so asawak, sikatoy maliket kon susuportaan ed saray kimey to bilang full-time ya managpulong. Maliket to ak met ya susuportaan ed responsabilidad ko bilang elder ed kongregasyon.

Baleg so epektod siak na panangaro tan panangasi nen Jehova a Dios. Sikatoy labalabay kon ipakabat ed saramay ipapasen ya anggapo lay pag-asa, ta onman so pakanengneng dad siak nensaman. Amtak ya sarag na Biblia ya tulongan so anggan siopa ya naromog so malinis tan walay direksion ya bilay. Aglabat imbangat ed siak na Biblia ya aroen tan respetoen so arum, lalaki tan bibii, noagta imbangat to ak met ya respetoen so sarilik.