NO A-DIAGNOSE ka odino say inad-arom na makapatey ya sakit, antam ya talagan makapaaburido itan. Likud ed samay sakit ya mismo, apektado met so emosyon. Lalo kan natatakot tan napagaan lapud makapanerbiyos iran appointment ed doktor, mairap so makalmoy paraan tan ibayar ed pampatambal, odino aliwliway epekto na saray tambal. No naynay ya nonoten so graben sakit, makapakapuy itan.

Iner so pangalaan tayoy tulong? Dakel so aligliwan maong lapud pampipikasi rad Dios tan pambabasa day makaligliwa iran mensahe ya walad  Biblia. Makatulong met so panangaro tan suporta na kapamilya tan kakaaro.

“Manmatalek kad Dios,” so kuan nen Robert ya mantaon na 58, “tan tulongan to ka pian nasarag mo itan. Manpikasi kad si Jehova. Ibagam ed sikatoy naliliknam. Kerew kay masanton espiritu. Patulongan kad sikato ya magmaliw kan positibo tan makapabiskeg ed pamilyam tan mansiansian kalmado legan mon aanosan so sakit mo.

“Baleg so nitulong na pamilyam no wadtan ira parad sika pian tulongan da kad emosyonal a paraan. Kada agew, makakaawat ak na sakey odino duaran tawag tan itepet da, ‘Kumusta ka la?’ Napapabiskeg ak met na saray kaarok ya walad nanduruman lugar. Onliligsa ak, tan ontutulong itan pian agak onsuko.”

No ompasyar kad kaarom ya mansasakit, tandaan mo ’yay imbaga nen Linda: “Seguradon say labay na pasyente et normal nin siansiay bilay to ya singa dati tan ompan agto labay ya naynay ya pantongtongan so sakit to. Kanian say itongtong mo et saramay kaslakan ya pantotongtongan yo.”

Diad tulong na Dios tan ligliwan manlalapud Biblia, kaiba lay suporta na maaron kapamilya tan kakaaro, makaseguro tayo ya walay kana na bilay, anggano walay graben sakit tayo.