No pantongtongan yo nen asawam so sakey a problema, kasin singa mas aliwliway liknaan mo kayari yon mantongtong? No ontan, walay nagawaan yo pian nasolusyonan itan. Balet unona, kaukolan yon naamtaan ya mandumaan so paraan na pitotongtong na laki tan bii. *

Saray bibii et maslak ya labay dan itongtong so problema antis ya dengelen so solusyon. No maminsan, say solusyon labat et itongtong so problema.

“OK ak la basta nibagak lay naliliknak tan amtak ya natatalosan ak nen asawak. No nitongtong ko la itan, ayos ak la—maslak et pigaran minuto labat kayari min nantongtong.”—Sirppa. *

“Agko nalingwanan so problema no agko nibaga ed asawak so talagan naliliknak. No nitongtong ko la, anggapo lad siak itan.”—Ae-Jin.

“Singa ak detective. Legan kon itotongtong so problema, aaralen ko no antoy agawa tan aamtaen koy sengegan na problema.”—Lurdes.

Saray lalaki et mas nononoten day solusyon. Tua itan, ta nalilikna na laki ya walay kana to no walay naapiger to. Say pangiter na solusyon et paraan to pian ipanengneng ya makapandepende ed sikato so asawa to. Kanian mairap ton talosan no ag-inawat so solusyon ya ibabaga to. “Agko natalosan no akin ya ibagam so problema balet agmo labay so solusyon!” so inkuan nen Kirk ya sakey ya asawan laki.

Balet “nepeg ya mas makauna so pakatalos nen say suhestion,” so imbaga na libron The Seven Principles for Making Marriage Work. “Kaukolan mon ipaamta ed asawam ya natatalosan mo tan antam so nalilikna to antis kan mangibaga na solusyon. Maslak et aliwan solusyon so talagan kailangan na asawam ed sika—labay to labat ya ondengel ka.”

Parad asawan laki: Dengel mon maong so asawam tan talosan moy nalilikna to. Inkuan na sakey ya asawan laki ya si Tomas: “No maminsan, kayari na indengel ko et iisipen kon, ‘Singa anggapoy agawaan ko.’ Balet maslak et atan met labat so kaukolan nen asawak—say idengel ko.” Onia met so imbaga nen Stephen: “Anengneng kon mas marakep no paulyanan ko labat ya ibaga nen asawak so nalilikna to ya agak onsalet. Mabetbet, kayari to et ibabaga tod siak ya OK la.”

Salien iya: Diad onsublay ya pantongtongan yo nen asawam so problema, agka bastabasta mangiiter na solusyon. Nengneng mo ed mata, tan dengel mon maong so ibabaga to. Tanger ka pian ipanengneng mon natatalosan mo. Ulit mo no antoy punto to pian ipanengneng ya antam so labay ton ibaga. “No maminsan, kaukolan labat nen asawak ya naamtaan ya natatalosan ko tan wadia ak labat parad sikato,” so inkuan na sakey ya asawan laki ya si Charles. —Prinsipyo ed Biblia: Santiago 1:19.

Parad asawan bii: Ibagam no antoy labay mon gawaen na asawam. “Ompan iisipen tayon amta la na asawa tayo so labay tayo,” so inkuan na asawan bii ya si Eleni, “balet no maminsan et kailangan tayon ibaga itan.” Oniay suhestion nen Ynez: “Nayarin ibagak, ‘Walay labay kon itongtong ed sika, tan komon ondengel ka. Agmo kailangan ya solusyonan, labay ko labat ya natalosan mo no antoy naliliknak.’”

Salien iya: No say asawam et tampol ya mangiter na solusyon, agmo nononoten ya agto ikokonsidera so liknaan mo. Labay to ka labat ya tulongan. “Imbes ya onsyodot ak,” so inkuan na asawan bii ya si Ester, “iisipen ko ya say asawak et manmamalasakit tan labay toy ondengel ed siak, tan labay to met labat so ontulong.”—Prinsipyo ed Biblia: Roma 12:10.

Parad asawan laki tan bii: Walay tendensia tayon tratoen so arum unong ed labay tayo ya pantrato rad sikatayo. Balet, no pantongtongan yo ray problema, kaukolan yon ikonsidera no antoy labay na asawa yo ya pantrato yod sikato. (1 Corinto 10:24) Oniay inkuan na sakey ya asawan laki ya si Miguel: “No sakey kan asawan laki, kaukolan ya maong kan ondengel. No sakey kan asawan bii, kaukolan ya ondengel ka met ed solusyon no maminsan. No ikonsidera yon sanasawa so labay na sakey tan sakey, sikayon dua so minabang.”—Prinsipyo ed Biblia: 1 Pedro 3:8.