No manabusado so duay taon ya anak mo, sobray panurangal, pankuyangyang, tan pankulansag to. Ompan isipen mo: ‘Normal kasi yay anako? Wala amoy gagawaen kon aliwa? Manguman ni kasi?’

Natulongan mon manguman so duay taon ya anak mo. Balet amtaen tayo nin unona no anto kasi rason na panaalburoto to.

Agni sarag ya kontrolen na melag ya ugaw so emosyon to. Atan so sakey ya rason no akin ya manaalburoto. Balet wala ni arum.

Isipen pay pananguman ya naeeksperiensya na ugaw no manduay taon la. Manlapu nen inyanak, iiter na ateng to so amin ya kaukolan to. Alimbawa, no onakis, batiken dan tampol. ‘Ompan mansasakit? Narasan? Labay toy manpaeba? Napno lay diaper to?’ Amin et gawaen na ateng pian agla onakis. Tan duga met labat ta akadepende ni so melag ya ugaw diad ateng to.

Balet no duay taon to la, nalikas ton sandaraiset ya nababawasay pangaasikaso ed sikato na atateng to. Diad tua, imbes ya iter dan amin so pankaukolan to, iilaloan dan unoren to so labay da. Duma la natay situasyon, tan lapud ag-itan apasalan na ugaw, manreklamo—idalan tod panalburoto.

Onsabi panaon, natalosan met lanlamang na ugaw ya saray atateng to et aliwa labat ya managkomis to, noagta managbangat to met. Natalosan to met komon ya kaukolan ton ‘tuloken so atateng to.’ (Colosas 3:20) Balet no duay taon to ni labat, suboken toy anos na atateng to diad panalburoto to lan panalburoto.

Talosan mo. Say anak mo et aliwan melag ya adulto. Lapud agto lanti nakontrol so emosyon to, manalburoto no agniiter so labay to. Iyan moy sarilim ed situasyon to.—Prinsipyod Biblia: 1 Corinto 13:11.

Kalmado ka labat. No manaalburotoy ugaw, anggapoy nagawaan na pampasnok mo. Anggad nayari, agmo papansinen so panaalburoto to, tan agka manpapaapekto. Nonot mon lanang no akin ya ontan to pian kalmado ka labat.—Prinsipyod Biblia: Uliran 19:11.

Agka unor-unor ed labay to. No iter mo lanlamang so amin ya labay na anak mo, seguradon manalburoto no wala lamet so sananey ya labay to. Diad maaron paraan et ipanengneng mon seryoso kad ibabagam.—Prinsipyod Biblia: Mateo 5:37.

Anosan mo. Agmo iisipen ya naandin tampol so panalburotoy anak mo, lalo la no impasal mon naala to lanlamang so labay to no manalburoto la. Balet no duga tan agmanguman-uman so ipapanengneng mo, nayarin nabawasay panaabusado to, ya anggad talagan naandi la. Say kuan na Biblia: “Say aro et walaan na andukey a panag-anos.”—1 Corinto 13:4.

Salien met iraya:

• No onggagapo lan manalburoto so anak mo, lakap mon maong (no posible), tan pigilan mon mankulansag, balet amay agnasakitan. Agmo eeyagan. Alagar mon ontunda. Nalikas to lanlamang ya anggapoy agawaan na impan-alburoto to.

• Nepeg ya walay lugar ed abung ya pangiyakaran mod anak mo no manaalburoto. Awit mod man tan ibagam ed sikato ya makapaway labat no tinmunda la, insan mo la taynan.

• No manaalburotoy anak mo et dakel so too, iyarawim. Agmo iiter so labay to lapu labat ta nababaingan kad saray makakanengneng. Ta no ontay gawaen mo, isipen ton naala ton amin so labay to no manalburoto.