AGMANUNDA iray advertisement natan. Antoy labay ya nagawa na saray advertiser? Labay dan ipalikna ya kaukolan tayo so produkto ra anggano andi met. Amta ran mabetbet ya say emosyon so mangidiktad pansaliw tayo. Kanian ginawa ran makapaingganyo iray patalastas tan saray shopping mall.

Oniay imbaga na libron Why People Buy Things They Don’t Need: “No plano na sakey so mangaliw, nambabangil lay imadyinen ton pananapan, pakaromogan, tan pangaliw ed satan.” Iisipen na saray eksperto ya lapud masyadon eksayted iray arum ya kustomer, sobray ligsa ra. Oniay impaliwawa na sakey a marketing expert a si Jim Pooler: “No nalikas na manlalako ya eksayted so kustomer, samboten to iyan pankanawnawa pian nalakoan to.”

Antoy gawaen mo pian agka nabiktima na taktika ra? Agka padidiktaan ed emosyon mo, tan ikomparam so ibabaga ra ed no antoy tua.

Natural labat ya labay tayon oninaway bilay tayo. Lanang ya ipapalikna na saray advertiser ya saray labalabay tayon nagawa a singa say maksil ya laman, maligen a bilay, pakaekal na stress, tan maong ya relasyon ed arum et naala tayo no duga ray sasaliwen tayo.

SAY TUA:

No kapigan ondadakel so gamit tayo, nayarin diman met onaliway bilay tayo. Kaukolay dakel ya oras tan kuarta pian naasikasoy amayamay a gamit. Makapa-stress so panremedyoy pambayar ed utang, tan ondaiset so oras parad pamilya tan kakaaro.

Prinsipyo: “Anggano dakdakel so kayarian na sakey a too, ag-iratan makapangiter ed sikato na bilay.”—Lucas 12:15.

Pigpigaray onamin ya mangasaliw ira pian manpasikat. Balet, oniay naimano nen Jim Pooler: “No mansha-shopping iray totoo, say manunaan ya mamapakiwas ed sikara et say pilaslasan ed kakaaro, kakaabay, katrabaho tan kakanayon.” Lapud saya, mabetbet ya saray sikat tan mayayaman so aalaen a man-endorso ed saray produkto. Say mensahen ipapasabi na saratan ya advertisement et: “Magmaliw kan onia!”

SAY TUA:

No lanang tayon ikokomparay sarili tayo ed arum pian naipasikat no siopa tayo, lanang tayo met ya nadismaya. Kada no walay nasaliw tayo, tatalaranan tayo lamet so mas balo nen say satan.

Prinsipyo: “No maaro kad kuarta agkan balot napenek.”—Eclesiastes 5:10, Maung a Balita.

Oniay paliwawa na libron Shiny Objects: “Say maslak ya gagawaen tayo pian nipaamtad arum no siopa tayo (odino no antoy labay tayon pagmaliwan) et diad saray uusaren tayo tan pangidispley ed kaykayarian tayo.” Amta na saray advertiser iya kanian pansasagpotan dan ipalikna ya say sakey a tatak—lalo la no mabli—et walay koneksion to ed no siopa ka.

Antoy pakanengneng mod sarilim, tan antoy labay mon isipen na arum ed sika? Sosyal ka? Maporma ka? Antokaman so labay mo, ipropromisa na saray advertiser ya basta dugay saliwen mon tatak, nipanengneng mo no siopa.

SAY TUA:

Anggapoy produkton makapanguman ed no siopa kan talaga odino makapangiter ed sika na maong iran ugali, ya singa say pagmaliw a matua tan matoor.

Prinsipyo: “Napatnagan komon so ganggana [o inkaguapo] yo, aliwan diad . . . panagsulong na saray alahas a balitok odino ilalatop iran kawes, noagta diad inkatoo a walad dalem na puso.”—1 Pedro 3:3, 4.