Binmaleg ak ed Los Angeles, California, U.S.A., diad lugar ya balitadon dakel so gang tan manda-drugs. Anemira kamin sanaagi, siak so komadua.

Pinabaleg kami nen nanay ko ya relihyoso. Pero nen tinedyer ak la, nagmaliw ya doble so panagbilay ko. Kada no Simba, mimimisa ak tan mangakansion, ta membro ak na choir. Pero diad arum iran agew, manpa-party ak, manda-drugs, tan imoral so kabibilay ko.

Mipepetang so ulok. Anggan antoy nabembenan ko, usaren kon pilaban pian labat manalo. Agko iyuuloy nanaaralan kod simbaan. Dati, lanang kon ibabaga, “say Katawan so ombawi, tan siak so usaren to!” Nen high school ak, manga bandad sampot na 1960’s ed saman, naimpluensyaan ak na Black Panthers, sakey ya militantin politikal ya grupo ya ilalaban day karapatan da. Aki-join ak ed organisasyon na saray estudyante ya ilalaban day karapatan da. Aminpiga kamin namprotesta, tan kada gawaen mi ’tan, temporaryon isasara so eskuelaan mi.

Singa agak kontento ed pamproprotesta mi, labay ko mas bayolenti nen say satan. Kanian asangkot ak ed nanduruman krimen. Singa bilang, aminsan nen kaibak iray barkadak ya nan-sine, abantayan mi ya diad apalabas et pinairap ed United States iray ariripen ya African. Mansyodot kamid ginawa ra, kanian binubogbog mi ray amputin kabataan diad mismon sinean. Insan kami linmad lugar ya kulaan na saray amputi pian mananap na dakel nin nabogbog mi.

Anggapo ni 20’k, balitado lan siga kamin sanaagi. Naynay kamin mamanmanan na saray pulis. Amay sakey ya agik membro na kabkabat ya gang tan mimila ak met ed sikara, kanian lalon onuuges so bilay ko.

Walay sakey ya kaarok ya Tasi nen Jehova iray ateng to. Inimbitaan da ak ya miaral, tan akila ak. Dia ni labat ed gapo, anengneng ko la ya duma ray Tasi nen Jehova. Amin da et walay sarili dan Biblia, tan uusaren dad aral da. Anggan saray kabataan, walay parte dad programa! Mandinayew ak nen naaralan ko ya say Dios et walay ngaran to, Jehova, tan narerengel kon uusaren da. (Salmo 83:18) Nandurumay lahi na saramay walad kongregasyon, pero sankanengneng ya anggapoy diskriminasyon da.

Nen unaan, agko labay so manpaiyaral ed saray Tasi, pero, labalabay koy miaral. Aminsan ya labi, nen wala ak ed aral na saray Tasi, linmad concert iray kabarkadak. Diman, walay binogbog dan tinedyer anggad inatey ta agto iter so leather jacket to. Kaimbuasan to, ilalastog da may impamatey da. Elek-elek ni ra ingen nen lilitisen irad korte. Dakel ed sikara so asentensiaan na legay bilay ya pakapriso. Maong labat ta agak akilad sikara ed saman ya labi. Manlapu lad saman, nandesisyon ak ya umaney panagbilay ko tan nampaiyaral ak la na Biblia.

Lapud karakel na anengneng kon diskriminasyon, manbilib ak ed Saray Tasi nen Jehova ta duma ra. Singa bilang, nen kailangan na sakey ya amputin Tasi so onlad abroad, impaasikaso tod sakey ya andeket ya pamilya iray anak to. Insan, walay sakey ya amputin pamilya ya inampon day andeket ya kabataan. Akombinse ak ya dugarugad sikara may imbaga nen Jesus ya nabasad Juan 13:35: “Diad saya et naamtaan na amin a sikayo iray disipulok—no manaaroan kayo.” Amtak ya nalmok lay tuan impanaagi.

Diad panaaral koy Biblia, a-realize kon kailangan koy manguman pian walay deen na isip ko, tan anengneng ko ya aya so sankaabigan ya panagbilay. (Roma 12:2) Kalkalna ak ya inmaligwas. Nen Enero 1974, abautismoan ak bilang Tasi nen Jehova.

Balet, anggan nen abautismoan ak la, kailangan ko nin siansian aralen ya kontroley petang na ulok. Singa bilang, aminsan nen mankakabkaabungan kami, inusilan ko may matakew ya angibatik ed radio na luluganan ko. Nen ngalngalik la naabotan, inikbanan to may radyo, tan tinmakas la. Nen iistoryaen kod arum no panon kon abawi may radio’k, tinepetan to ak may elder ed grupo mi, “Stephen, no nabotan mod saman, antoy gawaen mo ey?” Apaisip ak tan apakiwas ya pansagpotan nin kontroley sarilik.

Nen Oktubre 1974, nanlingkor ak lan full-time bilang ministro, tan 100 oras so uusaren ko kada bulan pian ibangat so Biblia ed arum. Insan nen kien, apribilehyoan ak ya manvolunteer ed world headquarters na Saray Tasi nen Jehova diad Brooklyn, New York. Nen 1978, sinmempet ak ed Los Angeles pian asikasoen so nanay ko ya mansasakit. Kayari duay taon, nankasal kami nen Aarhonda. Baleg so nitulong na inad-arok ya asawa diad impangasikasod si nanay ko ya anggad impatey da. Asabi panaon, nanaral kami nen Aarhonda diad Watchtower Bible School of Gilead, tan niyasain kami ed Panama bilang misionero ya anggad natan.

Manlapu nen abautismoan ak, dakel iray situasyon ya asubok so pasensiak. No papasyodoten ak na arum, naaralan koy onalis lan tampol odino pakalmaen so situasyon. Dakel so mankokomenda ed siak, kaiba lay asawak, ta siansian kalmadoy reaksion ko ed ontan iran situasyon. Anggan siak agak makapanisia! Agko aalaen so dayew ed sayan impanguman ko. Imbes, manisia ak ya ebidensya iya na pakayari na Biblia ya umanen so bilay.—Hebreo 4:12.

Lapud Biblia, wala lay direksion na bilay ko tan naaralan koy manpasensya tan mikareenan ed arum. Agko la bobogbogen natan iray totoo, imbes tutulongan ko ran onabig ed espiritual. Inyaralan ko ni ingen na Biblia imay datin kalaban ko nen high school! Nen sikatoy abautismoan, nagmaliw kamin san-roommate. Tan close kami anggad natan. Diad kaplesan, wala lay masulok ya 80 ya atulongan mi nen asawak ya manaral na Biblia tan magmaliw ya Tasi nen Jehova.

Misalsalamat ak ed si Aman Jehova ta inikdan to ak na makabaliksan tan maliket ya bilay kaiba iray tuan agagik.