Unonan Pedro 5:1-14
5 Kanian, bilang sakey met a matatken ya akatasi ed saray impanirap na Kristo tan makaawat met ed gloria ya iparungtal,+ mikakasi ak* ed saray mamatatken ed limog yo:
2 Pastolan yoy pulok na Dios+ a walad panangasikaso yo, a manlingkor kayo bilang manangasikaso,* ya agnapapasootan, noagta mabulos yon gawaen itan diad arapan na Dios;+ aliwan lapud panangaro ed agmanepeg a nabang,+ noagta lapud labalabay yon gawaen itan;
3 tan agkayo pakakatawan ed saramay kayarian na Dios,+ noagta magmaliw kayon alimbawa ed pulok.+
4 Tan sano nipatnag lay manunan managpastol,+ awaten yoy maglorian korona ya ag-onkupas.+
5 Ontan met, sikayo ran kalangweran a lalaki, manpasakop kayo ed saray mamasiken.*+ Balet amin yo, isulong* yoy inkamapaabeba* diad pidedeneng yo ed sakey tan sakey, lapud say Dios et sumpad saray mapaatagey, balet iiter toy agnaparaan a kaabigan ed saray mapaabeba.+
6 Manpaabeba kayo sirin diad silong na mabiskeg a lima na Dios, pian iyatagey to kayo ed manepeg a panaon,+
7 tan ipaawit yod sikato so amin a kapagaan yo,+ lapud iyaansakit to kayo.+
8 Mantultuloy kayon manlikas tan manbantay!+ Say Diablo a kabusol yo et siber-siber a singa managlem a leon, a manaanap na buagen to.+
9 Balet sikatoy nepeg yon sumpaen+ ed panamegley na mabiskeg a pananisia yo, ta amta yo a saray onian klase na irap et naeeksperiensya met na amin ya agagi yo diad interon mundo.+
10 Balet kayari na panirap yon magano, say Dios na amin ya agnaparaan a kaabigan, ya anawag ed sikayo diad andi-anggaan a gloria to+ diad panamegley nen Kristo, et sumpalen toy pangipapasal tod sikayo. Gawaen to kayon mapekder,+ gawaen to kayon mabiskeg,+ iletneg to kayon malet.
11 Say pakayari et walad sikato ya anggad angga. Amen.
12 Diad panamegley nen Silvano,*+ ya ipapasen kon matoor ya agi, et sinulatan ta kayo na antikey pian pasesegen kayo tan masimoon kon tasian a saya so tuan agnaparaan a kaabigan na Dios. Bembenan yo itan a malet.
13 Manpapakumusta ed sikayo imay bii* a walad Babilonia, a pinili a singa sikayo, ontan met nen Marcos+ ya ana’ko.
14 Ibano yoy sakey tan sakey diad panamegley na inaagin angob.*
Niwala komon so kareenan ed sikayon amin a disipulo nen Kristo.
Paimanod leksab
^ Odino “oniay ibilin ko.”
^ Odino “a maalwar yon bantayan itan.”
^ Odino “kapaabebaan na nonot.”
^ Odino “ibalkes.”
^ Odino “mamatatken.”
^ Tinawag met a Silas.
^ Nayarin say tutukoyen na saya et sakey a kongregasyon.
^ Literal, “masanton angob.”
