Kaslakan et ibabaga lanlamang na Biblia no siopay angisulat ed saray nabasa ditan. Singa bilang, wala ray parte ed Biblia ya diad gapo et oniay nabasa: “Saraya so salita nen Nehemias;” “say pasingawey ya anengneng nen Isaias;” tan “saya so mensahe nen Jehova a sinmabi ed si Joel.”—Nehemias 1:1; Isaias 1:1; Joel 1:1.

 Binirbir na dakel ya nansulat ed Biblia ya say insulat da et nanlapud si Jehova, say saksakey ya tuan Dios, tan inggiya to ira. Saray propeta ya angisulat ed Hebreon Kasulatan et masulok ya 300 beses dan imbaga: “Oniay inkuan nen Jehova.” (Amos 1:3; Miqueas 2:3; Nahum 1:12) Saray arum ya angisulat ed Biblia et naawat da so mensahe na Dios panamegley na saray anghel.​—Zacarias 1:7, 9.

 Say Biblia et insulat na manga 40 ya lalaki diad masulok ya 1,600 ya taon. Say arum ed sikara et inusar na Dios pian mangisulat na pigaran libro na Biblia. Diad tua, say Biblia et singa melag ya library ya walaan na 66 ya libro. Walaan na 39 ya libro so Hebreon Kasulatan ya kabkabat na dakel ed tawag ya Daan a Sipan, tan walaan na 27 ya libro so Kristianon Griegon Kasulatan ya kabkabat na dakel ed tawag ya Balon Sipan.