Siopa odino Anto so Salita na Dios?

I-PLAY

Say ebat na Biblia

Say “salita na Dios” et mabetbet ya ontutukoy ed sakey a mensahe odino nanduruman mensahe ya nanlapud Dios. (Lucas 11:28) Diad pigaran bersikulo ed Biblia, inusar bilang tawag o titulo so “Say Salita na Dios” odino “say Salita.”—Apocalipsis 19:13; Juan 1:14.

Mensahe ya nanlapud Dios. Mabetbet ya ibabaga na saray propeta ya saray mensahen ipapasabi da et salitan na Dios. Singa bilang, antis ya ibaga nen propeta Jeremias iray mensahe to, say ibabaga to ni et: “Dengel yoy salita nen Jehova.” (Jeremias 2:4; 31:10; 44:24, 26) Antis ya impaamta nen propeta Samuel ed si Saul ya sikatoy pinili na Dios ya ari, imbaga to: “Dia ka ni, ta ipaamtak ed sika so salitay Dios.”—1 Samuel 9:27.

Sakey a tawag o titulo. Inusar met ed Biblia so “Say Salita” bilang titulo parad si Jesu-Kristo nen sikatoy walad tawen bilang espiritu tan nen wadiad dalin bilang too. Niay pigaran rason no akin ya nibaga tayon ontan:

Say Salita et mabilay la antis nin ginawa so amin a bengatla. “Diad gapo et wala lay Salita . . . Sikatoy kaiba la na Dios diad gapo.” (Juan 1:1, 2) Si Jesus so “panguloan na amin a pinalsa . . . Sikatoy wala la antis na amin ni ran bengatla.”—Colosas 1:13-15, 17.
Say Salita et linma diad dalin bilang too. “Say Salita et nagmaliw a too tan akiayam ed sikatayo.” (Juan 1:14) Si Kristo Jesus et “tinaynan to so amin a walad sikato tan inawat toy kipapasen na sakey ya aripen tan nagmaliw a too.”—Filipos 2:5-7.
Say Salita et Anak na Dios. Kayarin imbaga nen apostol Juan ya “say Salita et nagmaliw a too,” intuloy to: “Anengneng tayo so gloria to, samay gloria ya aawaten na bogbogtong ya anak manlapud ama.” (Juan 1:14) Insulat met nen Juan: “Si Jesus et Anak na Dios.”—1 Juan 4:15.
Say Salita et walaan na saray ugali tan kualidad ya mipara ed Dios. “Say Salita et sakey a dios,” odino “singa dios.” (Juan 1:1; An American Translation) Si Jesus et “iyaaninag to so gloria na Dios tan sikato so mismon kaulibay na Dios.”—Hebreo 1:2, 3.
Say Salita et manuuley ya ari. Imbaga na Biblia ya diad ulo na Salita na Dios et walay “dakel a korona.” (Apocalipsis 19:12, 13) Say Salita et tinawag met ya “Ari na saray arari tan Katawan na saray katawan.” (Apocalipsis 19:16) Si Jesus et tinawag ya “Ari na saray arari tan Katawan na saray katawan.”—1 Timoteo 6:14, 15.
Say Salita so mensahero na Dios. Mapatnag ya say titulon “say Salita” et ontutukoy ed samay uusaren na Dios ya mangipasabi na saray impormasyon tan instruksion. Imbaga nen Jesus ya ginawa to iyan ingganggan ed sikato: “Say mismon Ama ya angibaki ed siak so angiter na ganggan no antoy ibagak. . . . Kanian antokaman ya ibagak et ibabagak lapud ontan so inkuan na Ama ed siak.”—Juan 12:49, 50.